《台文通讯精选》

 | | | 转寄

你去做兵

作者 李秀毓 2006.08.13

旧年ê九月初一 你去做兵
你去做兵 带走了阮ê心
烦恼你犹原铁齿ê脾气
惊惶你无爱妥协ê坚持
夜夜来梦起 担忧hit阵ê你

你去做兵 虽然是m̄甘mā是ài分开
长长ê头鬃ài lu金金
破破ê牛á裤mā bē使穿
外表ê改变m̄是你愿意 内心ê意志
Koh khah讨厌辅á去干涉你

Kap咱理想无仝ê人 笑你gōng
连身躯边斗阵ê朋友 mā笑你khong
阮知影koh khah艰苦ê操练 你mā thú会落去
Koh khah无理ê要求 mā请你忍耐吞过去
你讲你有家己ê坚持kap意志 却
将你ê温柔参目屎留阮孤单 挂念你

你tī深山ê军营内底 khiā卫兵
阮tiàm繁华ê寂寞中 siàu念你
你去做兵阮陪你 所以
你tio̍h-ài细腻保护你家己

阮ê日历 是为你活ê日子
阮ê日记 ta̍k工详细为你记
日头若落山 tō koh划去了一日
一日一暝 一暝一日 只要koh划去一个年
阮tio̍h会欢喜见着一个 真新ê你