《台语荒漠甘泉（全罗版）》

 | | | 转寄

"Kàng hō͘, sù hok"

作者 陈清俊 翻译 2008.06.15

listen

La̍k ge̍h cha̍p-gō͘ (La̍k ge̍h cha̍p-gō͘ ji̍t)

"Siōng-tè hō͘ góa tī góa siū-khó͘ ê tōe-hng heng-ōng." (Chhòng-sè-kì 41:52)

Chi̍t ūi si-jîn khiā tī I ê thang-á chêng teh khòaⁿ gōa-bīn teh lo̍h sai-pak-hō͘, sī chin tōa hō͘, lo̍h kàu chin lī-hāi. Chóng-sī si-jîn só͘ khòaⁿ ê, m̄-sī kan-ta chi̍t chūn hō͘ nā-tiāⁿ, i khòaⁿ tio̍h siū hō͘ lūn-te̍k ê thó͘-tē hoat-chhut kok-chióng ê hoe-lúi, choân-tē chhiong-móa súi kap phang-bī. I gîm kóng,

Lo̍h ê m̄-sī hō͘, sī chúi-sian-hoe,
Múi-tih hō͘ tih tī soaⁿ-phiâⁿ, khòaⁿ-tio̍h chi̍t tōa phiàn iá-hoe,
O͘-hûn tà lâi, jia-khàm choân-chhī thong-koe,
Lo̍h ê m̄-sī hō͘, sī mûi-kùi hoe.

Chòe Siōng-tè ê kiáⁿ-jî, khó-lêng tú-teh siū tio̍h chhì-liān, tùi Siōng-tè kóng, “Siōng-tè ah, kin-mî lo̍h chiah tōa ê hō͘, chhiau-kè góa só͘ ōe jím-siū ê. Chiong góa ê kè-ōe chhiong khì, góa sit-bāng, thiat-té sit-pāi. Góa phī-phī-chhoah ê sim siū ke̍k-tōa ê thòng-khó͘, ai-siong. Khó͘-thàng ê hō͘, tāng-tāng phah tī góa ê lêng.”
Pêng-iú, lí oân-choân gō͘-kái lah! Siōng-tè bô ēng hō͘ lâi phah lí, sī kàng hō͘ sù hok-khì. Siong-sìn Siōng-tè ê ōe, lí beh chai, tōa hō͘ tiong, sī ōe chhut-hiān sio̍k-lêng ê hoe-lúi. Chiah ê hoe pí lí tī bô hong bô hō͘ ê sìⁿ-miā só͘ khui ê hoe khah phang khah súi.
Tng lí khòaⁿ-kìⁿ hō͘, lí kiám ū khòaⁿ tio̍h hoe mah? Chiah ê khó-giām teh hō͘ lí siū-khó͘, lí kiám chai, tī lí ê jîn-seng tiong ū bí-lē sìn-sim ê hoe ōe chhut-hiān. Lí siūⁿ beh siám-pī thòng-khó͘, Siōng-tè só͘ khòaⁿ-tio̍h ê sī tùi lí ê lêng beh ū tông-chêng, un-jiû ê sim hoat-seng. Ke̍k-tōa ê siong-pi khó͘-lān hō͘ lí ê sim kiu-thè, tān-sī Siōng-tè beh hō͘ lí ê sìⁿ-miā koh-khah hong-sēng.
Pêng-iú, m̄-sī! Hiòng lí lo̍h ê hō͘ m̄-sī thòng-khó͘, sī un-jiû, thiàⁿ-thàng, tông-chêng, un-chû, jím-nāi, téng-téng Sèng-lêng só͘ siⁿ ê chióng-chióng hoe-lúi kap ké-chí. Lí sìⁿ-miā ê lêng só͘ tit tio̍h ê hong-hù, tī sè-kan it-chhè an-e̍k tiong sī bōe thang sán-seng ê. --- J.M.M.

Po̍k-hong-hō͘ ê koa-si

Khiā-khîm tī khong-khì tiong pêng-chēng,
Ji̍t-kng lo̍h tī chheng-chheng phang-hoe téng,
Ko͘-to̍k lú-kheh Iu-lū têng-têng,
Thàu-chá kàu àm teh chiàn-cheng,
Tùi bô-koa ê khîm-hiân siūⁿ beh hoat-chhut goa̍t-seng,
Tôaⁿ koh tôaⁿ iā bô hoán-èng,
Ti̍t kàu kiông-hong po̍k-hō͘ lûi-tân bô thêng,
Chú ê chhiú hōaⁿ tī po̍k-hong bīn-chêng,
Hoàn-chhíⁿ liáu bí-biāu im-ūn,
Kiông-hong ná chiàn-sū khí heng-hùn,
Hoat-chhut sèng-lī ióng-kám ê hō-kak,
Hong-hō͘ chhiùⁿ chhut Siōng-tè thiàⁿ ê im-ga̍k.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw