《台语荒漠甘泉（全罗版）》

 | | | 转寄

"I-tī tōa pi-siong ê sū-hōng"

作者 陈清俊 翻译 2008.05.04

listen

Gō͘ ge̍h chhoe-sì (Gō͘ ge̍h sì ji̍t)

"I hō͘ lâng thàng-thiàⁿ, chiū kā i pau-ba̍t; I siong lâng, iā I ê chhiú i-hó i." (Iok-pek-kì 5:18)

Tng góa kiâⁿ tī soaⁿ-lûn ê sî, kám-kak tē tōa iô, ū tōa tē-tāng. Chit ê phò-hoāi liáu-āu, hui-siông ê pêng-chēng. Si̍t-chè-siōng, tùi soaⁿ-téng khòaⁿ soaⁿ-kha chit ê chēng-chēng ê chúi-tî, hoán-siā chhut chúi-liân-hoe ê bí-kéng. Lô͘-úi tī tî piⁿ hō͘ hong bî-bî-á chhe teh iô, hiong-chhoan iā koh khí khí-lâi, bô koh kì-liām chá-sî hiah ê hûn-bōng. Tē-tāng tōa phò-hoāi í-āu, lé-pài-tn̂g ê chiam-thah teh soan-kò chiáng-koán choân-tē ê Siōng-tè iáu teh pó-hō͘, iáu teh thiaⁿ lâng ê kî-tó, kian-kò͘ choân-tē, chiàu-kò͘ choân jîn-lūi. --- John Ruskin

Tē-tāng, tē tōa tín-tāng,
Ò͘ chhut chhim chhim ê liah-phāng,
Pîⁿ-iûⁿ iô ná phû-tāng,
Soaⁿ, kok iā bô koh saⁿ siâng,

Hit kûn soaⁿ ê soaⁿ phāng,
Chiong pì-bi̍t tī heng-khám chhàng,
“Siōng-tè éng-oán ê pêng-an-pâng,”
Sī an-hioh-chiá ê bîn-bāng.

I chng chèng-soaⁿ bí-iông,
Chòe un-tián ê ka-hiong,
Thàu-chá lâi hiòng,
Ji̍t-thâu só͘ chiò tī in ê kéng-siōng,

Sìn-sit sûi hong tòa,
Chhe kàu tōa lō͘-thâu khoan-khoah,
Lo̍h kàu ta̍k kok, chiūⁿ-kàu ta̍k soaⁿ,
Hong-hō͘ só͘ tòa lâi ê ài-chêng koa.

Soaⁿ sī hô-liû ê khí-goân,
Sī hûn-chhái ê khai-toan,
Chióng-chióng chéng-lūi ê ka-oân,
Chū-chú, chū-iû, chū-jiân, kap an-choân.

Ià-siān ê to͘-chhī lâng,
Lâi chiūⁿ sèng-só͘ kî-tó tháu-pàng,
Siōng-tè beh sù khùi-la̍t khí-tāng,
I kui kang keng-kè siūⁿ ài pang-bâng.

Khòaⁿ! Góa lia̍h tio̍h soaⁿ ê pì-koat,
Súi bô pí chin si̍t ê pān-hoat,
Khò sìn-sim, tng jîn-seng iu-būn bōe thoat,
Á-sī seng-oa̍h khùn-khó͘ toān-choa̍t.

Siōng-tè lê tī chèng-soaⁿ,
Soaⁿ chiū chhut chúi-chôaⁿ,
Un-tián, chheng-sin sù lí kap góa,
Pêng-an lêng-chēng bōe piàn-ōaⁿ. --- William C. Garnett

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw