《台语荒漠甘泉（全罗版）》

 | | | 转寄

"Chhim ê thô͘"

作者 陈清俊 翻译 2007.09.09

listen


Káu ge̍h chhoe-káu (Káu ge̍h káu ji̍t)

"Ū-ê (chéng-chí) ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín; nā-sī ji̍t chhut pha̍k i; in-ūi bô kun, chiū ko͘-tâ." (Má-thài 13:5)

Bô chhim! Tùi chit ê iā chéng-chí ê phì-jū, thô͘ ê chhim-chhián kap lán tōa-tōa ū koan-hē. Kiat-si̍t pah pē ê chéng-chí sī lo̍h-tī "hó thô͘" (Má-thài 13:8), chiū-sī sêng-si̍t, siān-liông ê sim-tiân nih. Góa siūⁿ hiah ê "thô͘ bô chhim" chhián-po̍h ê lâng, in ê sìⁿ-miā bô sím-mi̍h bo̍k-tek, chin iông-ī ūi-tio̍h un-hô ê chhéng-kiû, hó-thiaⁿ ê káng-tō, kán-tan ê im-ga̍k siū chó-iū. Piáu-bīn khòaⁿ, in ūi Siōng-tè chòe kang, chóng-sī "thô͘-chhián", chòe lâng bo̍k-piau bô chhim-tō͘ bô chin-sêng, bô chin-chiàⁿ jīn-bat Siōng-tè ê chí-ì khì chip-hêng ê sim. Só͘-í lán tio̍h hó-hó lâi pôe-ióng lán sim-lêng ê thô͘.

Tng chi̍t ê chhōa-lō͘-chiá, á-sī tō-iû, tùi chi̍t ê Lô-má ê sū-peng kóng, ká-sú lí kian-chhî beh kiâⁿ chit tiâu lō͘, khó-lêng beh sòng-sit sìⁿ-miā. Sū-peng hôe kóng, "Góa bô kiâⁿ chit tiâu bōe-sái, m̄-sī bô oa̍h bōe-sái-tit." Che chiah sī chin-chiàⁿ ū chhim-tō͘ ê siong-sìn. Lán tio̍h ū kian-sìn, chiah ū chok-ûi. Hu-chhián ê sìⁿ-miā só͘ khò ê sī chhiong-tōng, piáu-bīn hiān-siōng, ti̍t-kak, pún-lêng kiû seng-chûn, tōa-pòaⁿ khòaⁿ khoân-kéng. Nā-sī chhim-sìn phín-keh ê lâng, gán-kong ōe chhiau-chhut chiah ê, kha-pō͘ ún-ún, hiòng-chêng chìn. I khòaⁿ hiah-ê iu-siong, bo̍k-chêng piáu-bīn ê sit-pāi, chhò-chiat, lóng beh siū kái-ōaⁿ, péng kè-lâi. In sái-chûn, chǹg-kè po̍k-hong-hō͘, o͘-hûn, chìn-kàu tī teh tán in ê chhàn-lān tùi-hōaⁿ.

Siōng-tè it-tàn kā lán chhim-hòa, hō͘ lán bêng-liâu chhim-ji̍p ê tō-lí, liáu-kái siōng-chhim ê ò-pì, koh ōe chiong khah tōa ê koân-pèng kau-tài lán. Chú ah, chhōa goán chìn-ji̍p Lí sìⁿ-miā ê chhim-chhù. Chiong goán sìⁿ-miā hu-chhián ê thó͘-tē thê-seng piàn chhim khí-lâi!

Hō͘ sîn-sèng īⁿ-siōng kàu khoan-khoah tiûⁿ-só͘,
Hō͘ Sìn-sim kap thiàⁿ-sim kàu koâiⁿ, chhim ê tē-pō͘,
Chìn-chêng, hiòng-siōng, oân-choân thé-hōe khîⁿ-tiâu
I tùi thiⁿ-téng lâi ê ho͘-tiàu. --- A.B.Simpson


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw