《台语荒漠甘泉（全罗版）》

 | | | 转寄

"Bēng-lēng, kau-tài, hoan-hù Siōng-tè"

作者 陈清俊 翻译 2007.06.24

listen







La̍k ge̍h jī-cha̍p-sì ji̍t


"Góa ê chhiú só͘-chòe ê, lín thang kau-tài Góa." (Í-sài-a 45:11)
Chú Iâ-so͘ tùi Siōng-tè ê thāi-tō͘ sī án-ni, I kóng, "Pē ah, lí só͘ hō͘ góa ê, góa ài in tī góa só͘ tī-teh ê só͘-chāi, ia̍h kap góa saⁿ-kap tī hia." (Iok-hān 17:24) Iok-su-a tit-tio̍h tōa sèng-lī ê sî, giâ i ê chhiú hiòng beh lo̍h ê ji̍t tōa-siaⁿ kiò kóng, "Ji̍t-thâu ah, lí tio̍h thêng tī Ki-piàn ê téng-bīn." (Iok-su-a 10:12) Í-lī-a iā ēng chit chióng ê thāi-tō͘ chó͘-chí thiⁿ lo̍h-hō͘; saⁿ nî pòaⁿ liáu-āu, koh kiû hō͘ kàng lo̍h-lâi. Lō͘-tek Má-teng (Martin Luther) tī i ê tông-sū Me-lán-tóng Hui-li̍p (Philipp Melanchthon) beh sí ê chìn-chêng kūi teh kî-tó kóng, m̄-chún sí-bông toa̍t-khì i. Siōng-tè iau-chhiáⁿ lán kap I ū chit chióng bí-biāu ê koan-hē. Sèng-keng kóng, "Góa chhin-chhiú tián-khui chiah ê thiⁿ, thiⁿ-téng ê bān-siōng ia̍h sī Góa só͘ bēng-lēng ê." (Í-sài-a 45:12) Lán chai Siōng-tè ê lêng-le̍k chiah tōa. Lán nā chai, Siōng-tè iau-chhiáⁿ lán thang bēng-lēng, (kau-tài, hoan-hù) I, lán kap I ê ji̍t-siông ê koan-hē beh ū siūⁿ bōe-tio̍h ê kái-piàn! Chit chióng thāi-tō͘, kap lán siông-siông bô sìn-sim ê kî-tó, hoâi-gî, bô tiāⁿ-tio̍h, sī ū jōa tōa ê chha-pa̍t! Lán siông-siông tiông-hok ê kî-tó, iā hō͘ kî-tó chhin-chhiūⁿ lāi-to, sit-khì i ê lāi-tō͘. Hôe-sióng Iâ-so͘ tī tē-chiūⁿ thoân-tō ê sî, siông-siông kiò lâng bēng-lēng I. I kap ha̍k-seng beh lī-khui Iâ-lī-ko ê sî, Iâ-so͘ khiā teh, hôe-èng kiò hit nn̄g ê chhiⁿ-mî lâng lâi, kóng, "Lín ài góa chòe sím-mi̍h?" (Má-thài 20:29-32) Ná chhin-chhiūⁿ I ê ì-sù sī kóng, "góa goān hō͘ lí sú-iōng, hō͘ lí chhe-kah." Lán kiám bōe-kì-tit, Iâ-so͘ ū thiaⁿ chi̍t ūi Hi-lia̍p lâng, sī Sū-lī-hui-nî-ki lâng ê chhéng-kiû. Si̍t-chāi I ì-sù kóng, lí só͘ su-iàu ê ka-kī thang chīn-liōng the̍h. (chham-khó Má-khó 7:24-30) Lâng kiám ōe chhiong-hun liáu-kái Siōng-tè chiong I ê kiáⁿ-jî hē tī chiah koâiⁿ tē-ūi ê ì-gī mah? I ná chhin-chhiūⁿ kóng, "Góa ê it-chhè le̍k-liōng lóng hō͘ lí sú-iōng." "Lín tī góa ê miâ, hoān só͘ kiû ê, góa beh kiâⁿ i;" (Iok-hān 14:13) --- F.B. Meyer
Tùi soaⁿ kóng, Khì Khì tó tī hái-ni̍h, Bô giâu-gî, I beh thiaⁿ-thàn lí, Bô hoâi-gî, it-tēng sêng, Hōng Chú ê miâ tùi lí ê soaⁿ hā lēng!
Chhéng-kiû siū-sio̍k koan-hē, Ēng Chú pó-huih lâi bóe, Liân-ha̍p Sam-ūi it-thé, Chiâⁿ-chòe chin-si̍t bān-sè, It-tēng sêng, sū beh án-ni sêng, Hōng Chú ê miâ tùi lí ê soaⁿ hā lēng!
Chū-su, pīⁿ-thiàⁿ, pi-siong kap chōe-ok, Chú ūi I só͘ thiàⁿ ê lâng siū khó͘-to̍k, Tī hit ji̍t I tam-tng, Hō͘ lí tit chū-iû khoài-lo̍k, Khò I ê ōe, it-tēng sêng, Hōng Chú ê miâ tùi lí ê soaⁿ hā lēng!
Ûi-khún te̍k-jîn siâⁿ-chhiûⁿ, Ēng bô siaⁿ kî-tó ê chhiú, Hō͘ i tó-lo̍h-khì, Hoah-chhut o-ló sèng-lī. It-tēng sêng, sìn-sim pó-chèng, Hōng Chú ê miâ tùi lí ê soaⁿ hā lēng!
Kian-kò͘ tâng-mn̂g thih-chhòaⁿ, Lóng-chóng phah phòa, Tiong-sìn ê lâng chìn-ji̍p, Cheng-ho̍k múi chi̍t sòaⁿ, Bô kiaⁿ te̍k-jîn, it-tēng sêng, Hōng Chú ê miâ tùi lí ê soaⁿ hā lēng!
Lia̍h-tiâu Siōng-tè sìn-si̍t, chin-lí, Bô chi̍t tiám á giâu-gî, Giâ sîn-jiah ê koái lâi kí, Chiong it-chhè iu-lū pàng-lī Khiā tī Siōng-tè èng-ún, it-tēng sêng, Hōng Chú ê miâ tùi lí ê soaⁿ hā lēng!

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw