《台语荒漠甘泉（全罗版）》

 | | | 转寄

"An-chēng tī Chú bīn-chêng"

作者 陈清俊 翻译 2007.06.17

listen







La̍k ge̍h cha̍p-chhit ji̍t

"Tī in thâu-khak-téng kiong-chhong ê téng-bīn ū siaⁿ; in thêng ê sî, si̍t chiū pàng lo̍h-lâi." (Í-se-kiat 1:25)

“In thêng ê sî, si̍t chiū pàng lo̍h-lâi,” sī sím-mi̍h ì-sù? Lâng siông-siông mn̄g, góa án-chóaⁿ chiah ōe thiaⁿ tio̍h Chú ê siaⁿ-im? Hit ê pì-koat chāi-tī-chia: chiah ê “oa̍h-mi̍h” (Í-se-kiat 1:5) thiaⁿ-tio̍h siaⁿ-im … thêng ê sî, chiong si̍t pàng lo̍h lâi.

Lán iā bat khòaⁿ tio̍h chiáu-á hioh tī chhiū-ki téng, chóng-sī in ê si̍t iáu teh iô chi̍t-ē, iô chi̍t-ē. Tān-sī tī chi̍t chat kóng, “In thiaⁿ tio̍h siaⁿ-im, chiū thêng lo̍h-lâi, si̍t iā pàng lo̍h lâi.”

Lí kiám bat tī Chú ê bīn-chêng chē á-sī kūi ê sî, lí ê lêng ê si̍t iáu teh iô mah? Nā-sī án-ni, lí tī Siōng-tè ê bīn-chêng chiū bô chin-chiàⁿ ê an-chēng.

Chi̍t ê lâng bô kúi ji̍t chêng kā góa kóng, “Góa ūi tio̍h bó͘ chi̍t hāng sū kî-tó, chóng-sī iáu-bōe tit-tio̍h hôe-tap.” Chiū-sī kóng, i bô an-chēng lo̍h lâi thiaⁿ Siōng-tè ê ōe chiū lī-khui, chiàu ka-kī ê siūⁿ-hoat khì chòe, kiat-kó chhòng kàu loān-chhau-chhau, to̍h ài koh têng lâi.

Ah, lán lōng-hùi jōa-chōe keng-le̍k, in-ūi lán kū-choa̍t chiong lán ê sim-lêng ê si̍t pàng lo̍h-lâi, bōe thang tī Siōng-tè ê bīn-chêng oân-choân an-chēng lo̍h-lâi, tì-kàu sún-sit chōe-chōe ê sî-kan? Be̍k-sióng lán tī I ê bīn-chêng an-chēng thèng-hāu I ê hôe-tap só͘ tit-tio̍h ê an-chēng, hio̍h-khùn kap pêng-an!

Liáu-āu, kàu-sî, lán beh “cháu-lâi cháu-khì, chhin-chhiūⁿ sih-nà teh sih.” (Í-se-kiat 1:14) iā ti̍t-chiap khì “sîn só͘ beh khì ê só͘-chāi.” (Í-se-kiat 1:20)

An-chēng! Chit-sî an-chēng tiāⁿ-tiāⁿ!
Lêng só͘ bōe bat thiaⁿ,
M̄ sī chiáu-á-siaⁿ,
M̄ sī hong, éng á-sī chhiⁿ ê iáⁿ,
Sī tùi hn̄g-hn̄g Siōng-tè hia,
Hō͘ su-hiong ê lêng-hûn hoaⁿ-hí bô pí,
Tī chēng-chēng ê sî, chiah ōe thiaⁿ-kìⁿ.

An-chēng! Chit-sî an-chēng tiāⁿ-tiāⁿ!
Un-hô tiⁿ-bi̍t ê iáⁿ,
Bô thiaⁿ tio̍h jīm-hô kha-pō͘ siaⁿ,
Sī Iâ-so͘ só͘ chhē An-ùi-chiá,
Kà-sī I ê chin-lí, sîn-sèng,
Chhiong-móa tī goān-ì thèng-hāu ê lêng,
Lí nā beh thiaⁿ I ê sìn-sit, kong-chèng,
Chhin-ài ê sim-lêng! Ài an-chēng!

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw