《台语荒漠甘泉（全罗版）》

 | | | 转寄

"Siū-khó͘ ê kè-ta̍t"

作者 陈清俊 翻译 2013.06.02

listen


La̍k ge̍h chhoe-jī (La̍k ge̍h jī ji̍t)

"A-pek-la̍h-hán tī bô thang ǹg-bāng ê tiong-kan, tùi ǹg-bāng lâi sìn, ... i ê sìn bô nńg-chiáⁿ;" (Lô-má 4:18-19)

Góa éng-oán bōe bōe-kì-tit tōa sìn-sim Siōng-tè ê po̍k-jîn Mu-lá (George Mueller) só͘ kóng ê chi̍t kù ōe. Ū lâng mn̄g i án-chóaⁿ pó-chhî kian-kiông ê sìn-sim, i án-ni hôe-tap kóng, “Î-it beh pó-chhî sìn-sim ê hong-hoat sī ài jím-siū tōa ê khó-giām. Góa o̍h tio̍h sìn-sim sī khiā tiâu tī giâm-keh ê chhì-thàm.”

Chin tio̍h! Tng kî-thaⁿ lóng sit-khì lah, lí pit-su sìn-khò Siōng-tè.

Chhin-ài ê lêng-hûn ah, lí khó-lêng iáu bōe liáu-kái lí hiān-chāi ê kè-ta̍t. Nā-sī lí chit-sî tú-tú siū tio̍h tōa khó͘-thàng, lí sī khiā tī tōa sìn-sim ê goân-thâu. Siōng-tè ēng o͘-àm ê khoân-kéng kà-sī lí án-chóaⁿ khîⁿ tiâu I ê pó-chō, chí-iàu lí goān-ì óa-khò I.

“Bo̍h-tit kiaⁿ, chí ū tio̍h sìn.” (Má-khó 5:36) Ká-sú lí ōe kiaⁿ, chiū giâ thâu gióng-bōng kóng, “Góa tī kiaⁿ-hiâⁿ ê sî, góa beh óa-khò Lí.” (Si-phian 56:3) Jiân-āu lí ōe kám-siā Siōng-tè ēng pi-siong lâi hùn-liān lí, hō͘ lí ê sìn-sim tit sêng-tióng. --- A. B. Simpson

Tōa sìn-sim sī tùi siū-kè tōa chhì-giām lâi sán-seng ê.

Siōng-tè siōng tōa ê un-sù sī thong-kè tōa khùn-khó͘ lâi tit ê. Tī lêng-sèng siōng á-sī chū-jiân-kài, nā bô keng-kè tōa ê lô-khó͘, ló͘-le̍k, lâu ba̍k-sái, lí kiám ōe tit-tio̍h sím-mi̍h kè-ta̍t ê mi̍h mah? Jīm-hô tōa kái-kek, tōa hoat-kiàn, tōa lêng-hûn ê kak-chhíⁿ, hok-heng, nā bô keng-kè jīn-chin ló͘-le̍k, lâu-kōaⁿ lâu-huih lâi phah-piàⁿ kiám ōe tit-tio̍h? Chiah ê lâng hù-chhut khó͘-lān ê tāi-kè, chhin-chhiūⁿ seng-sán ê tīn-thiàⁿ. Ūi-tio̍h khí sèng-tiān, Tāi-pi̍t ōe jím-siū kiông-lia̍t ê thòng-khó͘. Ūi-tio̍h tùi Iû-thài thoân-thóng thoân-chhut un-tián ê hok-im, Pó-lô it-seng chiū jím-siū kú-kú tn̂g-tn̂g ê khó͘-lān.

Ià-siān, tāng-tàⁿ ê sim lâi kàu Lí ê si̍p-jī-kè chêng,
Tùi siōng tōa ê sún-sit beh chiâⁿ siōng tōa ê siu-sêng.
Hi-seng, hō͘ lí ná ko-kùi, ná sîn-sèng.
Chiâⁿ chheng chiâⁿ bān ê hoe-lúi chiah liān chhut chit tih phang-cheng.

In-ūi hong-thai chhe, khí tōa éng,
Hái-chúi ná piàn chheng,
Khong-tiong siōng súi kéng-tì bô tī tiong-tàu hoat-seng,
Lûi-tân, sih-ná sih, hong-hō͘ āu, thiⁿ chiah chhut chhái-khēng.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org