《台语荒漠甘泉（全罗版）》

 | | | 转寄

"Chheng-chá peh khí"

作者 陈清俊 翻译 2013.04.14

listen
Sì ge̍h cha̍p-sì (Sì ge̍h cha̍p-sì ji̍t)

"In-ūi Chú beh pún-sin tùi thiⁿ lo̍h-lâi, ū tōa âu-kiò, ū chì tōa thiⁿ-sài ê siaⁿ, iā ū Siōng-tè ê sàu-kak, chiū hiah ê sio̍k Ki-tok í-keng sí ê lâng, beh tāi-seng khí-lâi. Āu-lâi lán iáu oa̍h-teh ê lâng beh kap in siū chiap-la̍p tī hûn-lāi, ji̍p khong-tiong ngiâ-chih Chú; án-ni lán chiū éng-oán kap Chú saⁿ-kap tī-teh." (I Thiap-sat-lô-nî-ka 4:16-17)

"Thiⁿ phú-kng" (Lō͘-ka 24:1) á-sī "thiⁿ iáu-bē kng," (Iok-hān 20:1) Iâ-so͘ tùi sí koh-oa̍h. Chí-ū chhiⁿ-sîn, bô thài-iông chiò tī I ê hûn-bōng, tng hûn-bōng khui ê sî, Iâ-lō͘-sat-léng ê iā-bō͘ iáu-bē bô khì, bîn-chiòng iáu teh hó khùn. Tī àm-mî iáu teh hó khùn ê sî, Chú koh-oa̍h lah. I ê koh-oa̍h pēng bô phah chhíⁿ choân-siâⁿ ê an-bîn.

Tī thàu-chá, thiⁿ iáu-bē kng, chí-ū chhiⁿ-sîn teh chiò ê sî, Ki-tok ê sin-thé, chiū-sī I ê kàu-hōe, kap I chi̍t-chôe oa̍h khí-lâi, I ê sèng-tô͘ beh chhíⁿ khí-lâi. Hit mî, o͘-àm ê kiáⁿ iáu tī sí-bông tiong khùn, sèng-tô͘ bô chhá tio̍h jīm-hô lâng, choân sè-kài iā bô thiaⁿ tio̍h in ê siaⁿ-im, sèng-tô͘ peh khí-lâi. Iâ-so͘ bat hō͘ sèng-tô͘ chēng-chēng tó tī in ka-kī ê hûn-bōng lāi, chhin-chhiūⁿ iⁿ-á tī lāu-bú ê hoâi-lāi, sî chi̍t ē kàu, I iā beh chēng-chēng un-jiû kiò in peh khí-lâi. Tùi múi chi̍t ê, beh sù in oa̍h-miā ê ōe, "tó tī tîn-ai ê ah, lín tio̍h cheng-sîn khí-lâi chhiùⁿ-koa." (Í-sài-a 26:19) Thàu-chá, tē it khai-sí ê êng-kng chiò tī in ê bōng, sèng-tô͘ tī siōng-chá ê hiok-kng tiong, tang-hng ê hûn tiām-tiām teh thoân-chhut koh-oa̍h ê sìn-sit. Chheng-chá ê khì-bī, i ê an-lêng, i ê chheng-sin, tiⁿ-bi̍t ê thiàⁿ-thàng, an-siông ê sûn-kiat, chhiong-móa liáu hi-bāng, lóng sio̍k-tī in.

Ah! chit ê hok-khì kap tú-tú kè ê àm-mî sī ū jōa-tōa ê tùi-pí! Chit ê chiok-hok kap tú-tú thoat-lī ê hûn-bōng sī ū jōa-tōa ê chha-pia̍t! In pōaⁿ sin-chiūⁿ ê thô͘-hún, tû-khì ōe pháiⁿ ê mi̍h, tòa tio̍h êng-kng ê sin-thé chiūⁿ khí-lâi, "tī khong-tiong kap Chú saⁿ tú-tio̍h." "Kng-kng ê khé-bêng-chhiⁿ" (Khé-sī-lio̍k 22:16) beh ín-chhōa in kiâⁿ chi̍t tiâu choân-sin ê lō͘, thàu-chá ê chhiⁿ kng beh chhin-chhiūⁿ Pek-lī-hêng ê chhiⁿ chhōa lō͘ kàu Siōng-tè ê bīn-chêng. "Kui-mî sui-jiân ū thî-khàu, Chá-khí sî chiū ū hoaⁿ-hí." (Si-phian 30:5) --- Sèng-si chok-chiá Horatius Bonar

Hoah Hô-sàn-ná, tùi thiⁿ kàng,
Êng-kng ê sèng-tô͘ kap thiⁿ-sài saⁿ-tâng,
Un-tián kap êng-kng ûi-sûi múi chi̍t phāng,
Iâ-so͘ lâi chiap, sio̍k I ê lâng.

"Tio̍h, góa kín-kín kàu. À-bēng; Chú Iâ-so͘ ah, lí tio̍h lâi." (Khé-sī-lio̍k 22:20)
Ū chi̍t ê sū-peng án-ni kóng, "Góa sí liáu, m̄-thang pûn song-chòng ê koa, ài kā góa pûn khí-chhn̂g, thàu-chá khí-lâi ê hō."


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org