《台语荒漠甘泉（全罗版）》

 | | | 转寄

"Ià-siān"

作者 陈清俊 翻译 2012.12.23

listen


Cha̍p-jī ge̍h jī-saⁿ (Cha̍p-jī ge̍h jī-cha̍p-saⁿ ji̍t)

"Khí-lâi chia̍h ah, in-ūi lō͘ chin hn̄g; lí kiâⁿ bô hoat-tit. " (I Lia̍t-ông-kì 19:7)

Siōng-tè án-chóaⁿ tùi-thāi ià-siān ê lô-po̍k Í-lī-a? I hō͘ i khùn, koh hō͘ i chia̍h. Í-lī-a chòe chin chōe tāi-chì, "tī A-hap ê thâu-chêng cháu kàu Iâ-su-lia̍t ê siâⁿ-mn̂g." (I Lia̍t-ông-kì 18:46) In-ūi i cháu chin chōe lō͘, ēng liáu chin chōe thé-la̍t, soah hō͘ i sit-chì, ì-chì siau-tîm lo̍h khì. Tī chit chióng chêng-hêng hā, lâng sī su-iàu hioh-khùn, sin-thé su-iàu tiâu-ióng, Í-lī-a ê sin-thé iā-sī án-ni.

Ū chin chōe úi-tāi ê lâng, in lóng kap Í-lī-a ū siâng-khoán ê chêng-hêng, ēng khì-liáu chin chōe thé-la̍t, "kàu chi̍t châng lô-têng-chhiū kha," (I Lia̍t-ông-kì 19:4) chiū ì-chì siau-tîm. Chú ê ōe chin an-ùi lâi kóng, "khí-lâi chia̍h ah, lō͘-tô͘ iáu chin hn̄g." Ōaⁿ ōe kóng, "Góa beh hō͘ lí hoe-hok thé-la̍t."

Lán m̄-thang chiong sin-thé ê ià-siān kap sim-lêng ê loán-jio̍k khòaⁿ chòe siâng-khoán lâi tùi-thāi.

Góa ià-siān bōe tàng sìn-khò, bōe tàng kî-tó,
Thé-la̍t ēng kè-thâu, soah poa̍h-tó,
Chi̍t-hāng góa siūⁿ beh chò,
Chiū-sī pàng-hē it-chhè khì bîn-chhn̂g tó.

Lí siūⁿ Siōng-tè ōe goân-liōng?
Góa chhin-chhiūⁿ iⁿ-á khùn an-siông,
I bô mn̄g góa sī-m̄-sī ū le̍k-liōng,
Thái-ōe liân óa-khò kî-tó iā bô iōng?

Chhin-ài ê, Siōng-tè ōe goân-liōng mah? Siūⁿ khòaⁿ-māi.
Tī lí iáu bōe-hiáu kóng-ōe ê sî-tāi,
Lí ê lāu-bú kiám m̄-sī án-ni kā lí khoán-thāi,
Á-sī chiong lí phō tī I sim-hoâi?

Lí bô kiû, I kiám hō͘ lí khiàm-ēng,
I kiám hō͘ I ê kiáⁿ chòe bōe-lâi ê sū-chêng?
Á-sī chiong lí un-jiû phō tī I heng-chêng,
Kò͘-siú lí an-bîn, pêng-chēng.

Lāu-bú ê thiàⁿ-sim hō͘ I ū châi-tiāu,
Chai iⁿ-á bô ì-sek ê su-iàu,
Tī lí siān kàu liân sìn-khò kî-tó iā bōe-hiáu,
Tng lí kè-thâu ēng thé-la̍t oh oan-khiau.

Pàng-hē it-chhè, an-hioh lâi,
Chhin-chhiūⁿ an-siông tī lāu-bú hoâi-lāi,
Chú chai it-chhè, chhin-ài ê Chú liáu-kái,
Ná iⁿ-á khùn kah lóng m̄-chai.

M̄-bián mn̄g ē-sái á bōe-sái,
I chai I ê kiáⁿ-jî siān kàu kî-tó bōe lâi,
I bô ēng chhut-siaⁿ kî-tó chòe koat-sài,
I bêng-pe̍k sím-mi̍h sî lí su-iàu jîn-ài.

I chai lí ōe kî-tó, ōe sìn-khò,
Chai loán-jio̍k sin-thé tùi thô͘ chō,
Ah, Ki-tok hô-téng ê koan-hoâi koh khó-khò,
Tī pòaⁿ-mî lâi kā ha̍k-seng so.

I tùi in kóng, an-sim khùn,
Tú sī tī I siū choân jîn-lūi ê chōe tîⁿ-khún
Chiong lí ê sìⁿ-miā kau-thok I siōng an-ún,
M̄-bián kiaⁿ, an-sim hó-khùn pêng-sūn.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org