《台语荒漠甘泉（全罗版）》

 | | | 转寄

"Tio̍h khí-lâi"

作者 陈清俊 翻译 2012.03.11

listen

Saⁿ ge̍h cha̍p-it (Saⁿ ge̍h cha̍p-it ji̍t)

"Iâ-hô-hoa ê lô͘-po̍k Mô͘-se sí liáu-āu, Iâ-hô-hoa hoan-hù Lùn ê kiáⁿ Iok-su-a, chiū-sī kun-sûi Mô͘-se ê kóng, Góa ê lô͘-po̍k Mô͘-se sí liáu lah; taⁿ lí tio̍h khí-lâi, kap chèng peh-sìⁿ kè chit ê Iok-tàn, khì Góa só͘ siúⁿ-sù Í-sek-lia̍t lâng ê tōe." (Iok-su-a 1:1,2)

Chang lí tú-tio̍h tōa pi-siong thòng-khó͘ ê sū, hiān-chāi lí chhù-lāi ná khang-khang. Lí chiàu kám-chêng, beh hòng-khì it-chhè, choa̍t-bāng teh chē, bô sím-mi̍h goān-bōng. Lí m̄-thang siū-tio̍h che iú-he̍k, in-ūi lí sī tī chiàn-tàu ê chiân-sòaⁿ, gûi-hiám sûi-sî beh kàu, tiû-tû tia̍p-á-kú iā beh siong-tio̍h Chú ê kang-tiâⁿ ê chìn-hêng. Pa̍t-lâng ê seng-oa̍h iā beh in-ūi lí ê tiû-tû siū sún-hāi. Chit-sî bô-tit thêng teh, liân pi-siong iā sī ke ê.

Chi̍t ūi chhut-miâ ê chiong-kun kóng ka-kī chhin-sin tú-tio̍h ê pi-thiàⁿ ê kò͘-sū. I ê kiáⁿ sī chi̍t ūi phàu-peng ùi-koaⁿ, tng te̍k-jîn hoat-tōng kong-kek ê sî, i sī sut-niá choân-su chìn-kong, teh chhiong-kè chiàn-tiûⁿ tui-kong ê sî, thu̍t-jiân khòaⁿ tio̍h chi̍t ūi chiàn-sí ê phàu-peng kun-koaⁿ tó tī hia, i chi̍t-khòaⁿ chiū chai sī i ê kiáⁿ. Chiong-kun pē-kiáⁿ kám-chêng chhim, chiàu lí, eng-kai kūi tī kiáⁿ-jî sin-si lâi ai-siong, chóng-sī chek-jīm só͘ tì, i pit-su kè-sio̍k chìn-kong. I chí ū chim chi̍t-ē chiū kín-kín lī-khui, kè-sio̍k chip-hêng i ê jīm-bū.

Tī hûn-bōng piⁿ siong-sim tōa khàu, éng-oán bōe thang tit hôe í-keng sit-khì pó-kùi ê kū thiàⁿ, koh-khah m̄-bián siūⁿ kóng, tùi siong-sim tit-tio̍h sím-mi̍h chiok-hok. Pi-siong só͘ chō-sêng ê, sī chhim-chhim ê siong-hûn khek tī siū-siong ê sim, bōe bōe-kì-tit ê kò͘-sū. Tāi-chì kè-liáu, sim-chêng bô koh khó-lêng kap í-chêng siāng-khoán. Nā-sī ēng chiàⁿ-bīn ê thāi-tō͘ lâi jím-siū pi-siong, m̄-nā hō͘ lán koh-khah sêng-se̍k, iā ōe tùi pa̍t-lâng koh-khah ū tông-chêng kap thiàⁿ-sim. Chin-chiàⁿ, bô pi-siong, á-sī siū-khó͘ ê lâng sī chin khó-lîn. Tī lán thâu-chêng ê khoài-lo̍k (Hi-pek-lâi 12:2) hō͘ lán ê pi-siong piàn kng-bêng, chhin-chhiūⁿ ji̍t-thâu tùi hûn-ni̍h chiò lo̍h-lâi ê chhàn-lān. Siōng-tè hō͘ lán chiàu só͘ tiāⁿ-tio̍h ê bo̍k-piau ióng-kám chìn-hêng, sī chòe lán siōng chin, siōng hong-hù ê an-ùi. Nā-sī chē teh siong-pi, hō͘ lán ê sim-chêng ná hām-lo̍h tī koh-khah o͘-àm ê kéng-kài, lán ê le̍k-liōng beh ná sit-khì. Só͘-í pàng-hē iu-siong, sìn-khò Siōng-tè ê ho͘-tiàu, lán beh koh-khah kng-bêng, lán ê lêng-le̍k koh-khah kiông-tōa. -- J.R. Miller

Chū-su ūi ka-kī lâu ba̍k-sái,
Kiat-kó sī siū chōe kap siong-hāi.
Lí só͘ ūi goán chún-pī ê, sī úi-tāi,
Pí goán só͘ siūⁿ ê khah si̍t-chāi.

Pó-pòe êng-iāu ê mi̍h,
Siūⁿ beh ka-kī chiàm-iú, beh sit-khì.
Nā-sī khîⁿ-tiâu I ê chhiú, tit chin-lí,
Chiàu I ê chí-ì,
Beh ū pêng-an, tiⁿ-bi̍t ê hoaⁿ-hí,
Beh ū hí-lo̍k lêng-le̍k ê iû boah lí. -- Helen Hunt Jackson


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org