《台语荒漠甘泉（全罗版）》

 | | | 转寄

"Thè-khì piⁿ-a"

作者 陈清俊 翻译 2012.01.22

listen


Chiaⁿ ge̍h jī-jī (It ge̍h jī-cha̍p-jī ji̍t)

"Iâ-so͘....thè-khì khòng-iá, ka-kī tòa;" (Má-thài 14:13)

Ga̍k-phó͘ lāi ū hiu-sek hû-hō. Chi̍t tiâu koa ê ga̍k-chiong siông-siông lí ōe khòaⁿ tio̍h tī-chia, tī-hia lóng ōe chhut-hiān hiu-sek hû-hō. Jîn-seng ê ga̍k-chiong, iā sī án-ni, tī chia, tī hia siông-siông ū hiu-sek hû-hō ê chhut-hiān, chóng-sī tng lâng tú-tio̍h hiu-sek hû-hō ê sî, lia̍h chòe sī jîn-seng ê chiong-tiám lah. Siōng-tè ēng phòa-pīⁿ, ēng sit-bōng ê kè-ōe, bô kiat-kó ê ló͘-le̍k, chòe hiu-sek-hō, kiò lâng ài hioh-khùn. Jîn-seng ê ha̍p-chhiùⁿ tiong, tú-tio̍h hiu-sek-hō, lán ê siaⁿ bô khì-ah, lán beh àu-náu mah? Chí-hui, im-ga̍k-ka khòaⁿ hiu-sek-hō sī ga̍k-chiong ê chi̍t pō͘-hūn, i pēng bô thêng-chí, iáu teh kè-sio̍k phah-phek, sî-kan chi̍t-ē kàu, bô khah tn̂g, iā bô khah té, chiū koh kè-sio̍k ē-bīn ê im-hû, hiu-sek-hō ná chhin-chhiūⁿ bô tòng-tiām chi̍t-iūⁿ. Lán jîn-seng ê ga̍k-chiong, Siōng-tè siá ê sî, lóng ū chi̍t-ê kè-ōe, lán só͘ chòe ê, sī ha̍k-si̍p hit ê koa-tiāu, hiu-sek-hō ê sî, chiū tio̍h nāi-sim thèng-hāu, chit-sî iā bōe sái tāi-ì, á-sī hut-lio̍k, soah phòa-hoāi tio̍h chéng-kô ê ga̍k-chiong, á-sī piàn-tiāu. Lán ài gióng-bōng Siōng-tè, I teh sǹg sî-kan, chí-iàu jīn-chin khòaⁿ Siōng-tè, ē chi̍t ê ga̍k-chiong I beh chheng-chheng chhó-chhó chí-sī lán. Lán bô su-iàu iu-iu chhiû-chhiû tùi ka-kī kóng, hiu-sek-hō, thiaⁿ bōe tio̍h lán ê siaⁿ-im, beh án-chóaⁿ neh? Ài chai hiu-sek-hō sī ga̍k-chiong ê chi̍t pō͘-hūn. Seng-oa̍h kè-thêng siông-siông sī bān-bān koh khó͘-thàng, Siōng-tè khiok ū nāi-sim lâi kà-sī lán, m̄-nā kà, koh nāi-sim thèng-hāu lán o̍h tio̍h che kong-khò. --- John Ruskin

Thè-khì piⁿ-a,
Tùi bô-êng khoài-lo̍k ê kang-chok,
Tùi sè-kan bōe-thêng ê lô-lo̍k,
Chìn kàu thiⁿ-téng im-ńg an-lo̍k,
Lâi kàu chiām-sî hiu-sek thian-kok.

Thè-khì piⁿ-a,
Hông-hun, ji̍p bô-lâng ê hoe-hn̂g,
Chú kap lí tī-teh, m̄ sī pàng lí hn̄g-hn̄g,
Thiaⁿ I iu-bí ê siaⁿ sòe-sòe teh khǹg,
"Kiáⁿ ah, lí beh kap góa hióng-siū che an-chēng ē-hng?"

Thè-khì piⁿ-a,
Kap Chú Ki-tok sàn-pō͘,
Lim oa̍h-chôaⁿ kam-lō͘,
Kap I chhin-bi̍t kau-pôe,
Chiap-kūn thiⁿ-téng siong-hōe.

Thè-khì piⁿ-a,
Kap I tan-to̍k, bat I ná chhim,
Tī ún-ba̍t tiong, kèng-ka thiàⁿ-sim,
Àm-mî iu-siong sî tit ha̍k-si̍p,
I un-jiû chhin-chhiat bô tio̍h-kip.

Thè-khì piⁿ-a,
Kám-siā Lí tì-ìm kap an-chēng,
Kám-siā Lí thiàⁿ ê lō͘-kèng,
Kap Lí tī-teh, put-koán goán khàu, goán kéng-séng,
Kám-siā Lí sù àm-mî Khek-se-má-nî ê an-lêng.

Thè-khì piⁿ-a,
Tiām-chēng siūⁿ, I chòe it-chhè oân-bí,
Bông hok kám-siū, kap Ki-tok tâng khiā-khí,
Hioh tī Lí si̍p-jī-kè im-iáⁿ ē-kha,
Kám-siā Lí, Chú ah, kiò goán thè-khì piⁿ-a.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org