《台语荒漠甘泉（全罗版）》

 | | | 转寄

"Bô khó-lêng ê sū"

作者 陈清俊 翻译 2011.11.27

listen

Cha̍p-it ge̍h jī-chhit (Cha̍p-it ge̍h jī-cha̍p-chhit ji̍t)

"In-ūi Siōng-tè só͘ kóng ê ōe, bô chi̍t kù bô la̍t." (Lō͘-ka 1:37)

Tī Au-chiu siōng koâiⁿ ê soaⁿ, A-lí-phí-sú soaⁿ (Alpine) ê soaⁿ kok tiong, Siōng-tè ta̍k-nî chiū teh chhòng-chō kî-chek. Ji̍t-sî ū tōa thài-iông chiò, àm-sî ū peng-seh tàng, khì-hāu piàn-hòa chin tōa. Chóng-sī tī peng-seh khah po̍h ê só͘-chāi, ū chi̍t chióng hoe-chháu, ōe tùi peng ê tiong-kan puh chhut-lâi chin chhàn-lē ê hoe-lúi. Che sió-sió ê hoe, kiò chòe “ko-san cheng hoe” (soldanelle plant). I thài ōe ū chiah nih tōa ê lêng-le̍k ah?

Goân-lâi chit chióng hoe-chháu, tng joa̍h-thiⁿ ê sî, i chiong hio̍h chhun tī tē ni̍h chin khoah, thang khip-siu ji̍t-thâu ê kng kap jia̍t, chiah ê lêng lóng chûn tī i ê kun ê lāi-bīn. Tng chhun thiⁿ kàu, seh ni̍h ê sìⁿ-miā khai-sí chhíⁿ khí-lâi, sió-sió ê hoe-chháu puh gê, kî-biāu lâi hoat chhut sòe-sòe ê jia̍t-khì, chiām-chiām chiong téng-bīn ê seh iûⁿ chhut chi̍t ê khì-lông.

Chit ê si̍t-bu̍t ná tōa-châng, tī téng-bīn ê khì-lông chiū ná tōa lia̍p, it-ti̍t kàu hoe-m̂ an-choân ê hêng-sêng hó-sè. Siōng-bé, khàm-tī téng-bīn ê peng-seh hō͘ khì-lông tōa kàu phòa chi̍t khang. Si̍t-bu̍t ê hoe-m̂ chiū tùi chit ê khang chhèng chhut-lâi seh téng, khui chhut sòe-sòe chí-sek ê hoe, i ê hoe-phìⁿ kim-siak-siak, ná chhin-chhiūⁿ keng-kè chi̍t tōaⁿ chin thòng-khó͘ ê hêng-têng só͘-tì ê kì-hō.

Chit chióng sòe-sòe chhùi-jiok ê hoe hō͘ góa ê sim ū tōa-tōa ê kám-chhiok, m̄-sī tī kē ê soaⁿ-phiâⁿ tiong hoe-chháu só͘ khui chiok súi ê hoe só͘ hō͘ góa ê kám-chhiok chi̍t-iūⁿ. Lán ài khòaⁿ bô khó-lêng ê sū piàn chòe khó-lêng, koh chiâⁿ chòe sū-si̍t. Siōng-tè iā sī án-ni.

Só͘-í, lán ài kian-chhî, jím-nāi, chiong lán ê khùn-kéng, jîn-lūi ê o͘-tiám, hoâi-gî, m̄-sìn, lóng-chóng ê khùn-lân, hoán-tùi Siōng-tè ê chok-ûi, lóng thui-sàng tī Siōng-tè ê téng-bīn, iā sī bōe-thang chó͘-tòng Siōng-tè ê kî-biāu, chhòng-chō kî-chek ê lêng-le̍k. Goān lán ōe choan-sim sìn-khò I, in-ūi I sī "ōe chòe-chhut put-khó-lêng" ê Siōng-tè.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org