《台语荒漠甘泉（全罗版）》

 | | | 转寄

" Èng-ún "

作者 陈清俊 翻译 2011.10.23

listen
Cha̍p ge̍h jī-saⁿ (Cha̍p ge̍h jī-cha̍p-saⁿ ji̍t)

“kìⁿ-nā thok I ê lô͘-po̍k Mô͘-se só͘ èng-ún ê hó-ōe, bô chi̍t-kù lo̍k-khong., ” (I Lia̍t-ông-kì 8:56)

Ū chi̍t kang, lí beh bêng-pe̍k, tī lán jîn-seng tiong, Siōng-tè tùi lán só͘ kóng “m̄”, múi-pái lóng ū I ê lí-iû. Āu-lâi, I iā ōe pó͘-siúⁿ lán. Tng Siōng-tè ê chú-bîn kî-tó bô tit-tio̍h hôe-tap soah hoân-ló iu-chhiû ê sî, siông-siông lán beh khòaⁿ tio̍h I ēng koh-khah tōa ê gán-kong lâi hôe-èng! Siông-siông lán só͘ chai sī chi̍t tiám-tiám-á nā-tiāⁿ, kàu āu-lâi chiah tit-tio̍h choân-pō͘ ê khé-sī.

Nā-sī Siōng-tè èng lán ê kiû-kiò,
Thiⁿ nâ sek, thài-iông phó͘-chiò,
Tī thâu chêng ū pîⁿ-tháⁿ lō͘-tô͘,
Pe-chiáu chhiùⁿ-koa phōaⁿ lán kiâⁿ-lō͘,
Iā ū lō͘-piⁿ iá-hoe phang-kòng-kòng,
Koh ū khoe-chúi thang lim chin chheng-sóng,
Khoài-lo̍k, khah chōe ê khoài-lo̍k, tī lán ê tō,
Nā-sī Siōng-tè thiaⁿ lán ê kî-tó,

Ká-sú Siōng-tè bô tap-èng lán ê kî-kiû,
Thiⁿ ba̍t-hûn àm-àm, chin iu-chhiû,
Iā ū chio̍h-thâu tòng tī lán lō͘-chiūⁿ,
Koh ū kiông-hong hân-khì chǹg lán ê kha-chhiú.
Chóng-sī, chhin-ài ê, lō͘ ê chīn-bé sī lán ê ke,
Chiah ê lóng sī Thiⁿ-pē bôa-liān lán ê,
Chhōa lán chìn-ji̍p thiⁿ téng hó tē,
Ká-sú Siōng-tè bô tap-èng lán só͘ kiû ê,

Nā sī ū sìn-sim, lán bōe chhiong-pông chòe tāi-chì, sī “nāi-sim thèng-hāu I” (Si-phian 37:7). Nā ài tit-tio̍h choân-jiân ê kái-soeh, sī Iâ-so͘ Ki-tok chài-lîm ê sî! Ū sím-mi̍h sî, Siōng-tè chiong chi̍t lâng ê mi̍h the̍h khì, āu-lâi bô ka-pē chiok-hok i mah? I kiám sī kan-ta kin-á-ji̍t chòe tāi-chì nā-tiāⁿ? Tû liáu lán che sòe-sòe ê sè-kài, I kiám bô koh koan-sim kî-thaⁿ ê tāi-chì mah? Lán kè-sin liáu-āu, I kiám m̄-sī teh kang-chok mah? Hûn-bōng ê mn̂g kiám sī thàu kàu éng-oán ê o͘-àm, á-sī éng-oán ê tiām-chēng mah?

Sīm-chì lán ê su-sióng hān tī kim-seng ê sî, Siōng-tè iā bōe ēng khó͘-lān lâi chhì lán, tû-hui I chún-pī beh sù lán koh-khah tōa ê lé-mi̍h kap chiok-hok. Chai-iáⁿ án-ni thèng-hāu ê lâng, ōe tī Siōng-tè ê un-hūi tiong tit-tio̍h tōa-tōa ê sêng-tióng.

Sng-seh kàng-lo̍h hong-kông,
Soaⁿ-ni̍h hûn-bū bông-bông-bông,
Súi hoe siā khì, tiau-bông,
Chhân-iā lòng-khòng-khòng,
Thiàⁿ-thàng ê Pē sòe-sòe ê siaⁿ kóng,
“Che lóng sī chhut-tī Góa ê chhiú só͘ chhòng”
Tng lí bōe tàng liâu-bōng,
Sìn-khò chiū tit hok-khì siong-thong.

Chin chōe ê khó͘-thàng,
Sit-lo̍h múi chi̍t hāng,
Nn̄g-chhiú khang-khang,
Thâu-mn̂g pe̍h chhang-chhang,
Hit sî, kì-tit Thiⁿ-pēê thiàⁿ-thàng,
I ióng-iú sè-kài bān-hāng,
Tng lí siūⁿ bōe thàng,
Chí-iàu sìn-khò chiū ū hó-khang.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org