《台语荒漠甘泉（全罗版）》

 | | | 转寄

"Saⁿ nî chi̍t lūn, hó-pháiⁿ chiàu lûn"

作者 陈清俊 翻译 2011.10.09

listen

Cha̍p ge̍h chhoe-káu (Cha̍p ge̍h káu ji̍t)

“Iâ-hô-hoa in-ūi án-ni beh thèng-hāu lâi si un-hūi hō͘ lín, koh in-ūi án-ni beh khí-lâi lîn-bín lín; ” (Í-sài-a 30:18)

Siōng chhiⁿ ê chháu siⁿ tī hō͘-chúi siōng chōe ê só͘-chāi. Tī Ài-jíⁿ-lân (Ireland) ū chi̍t ê sió-tó, kiò chòe “Chhùi-le̍k-tó”, sī bū-khì kap chúi-khì chhut-miâ chōe ê só͘-chāi. Put-koán-sî to sī khùn-khó͘ hō͘ lâng sim hoân ê bū, kap iu-siong ê chúi-khì. In-ūi án-ni tī hia, ū chhiⁿ-chhùi phek-le̍k ê sim, chhiong-móa Siōng-tè ê an-ùi thiàⁿ-sim bí-lē ê chhiū-ba̍k.

Chhin-ài ê ki-tok-tô͘, m̄-thang kóng, “ìⁿ-á lóng khì tá-ūi lah, lóng bô khì ah, in it-tēng sī sí khì lah.” M̄-sī, in bô sí, sī pe kè nâ-sek ê hái, khì hn̄g-hn̄g ê só͘-chāi, bô-kú in beh koh pe tńg-lâi.

Siōng-tè ê kiáⁿ-jî, m̄-thang kóng, “Só͘-ū ê hoe lóng sí khì ah, tang-thiⁿ kā in tàng sí lah, lóng bô khòaⁿ-kìⁿ ah.” M̄-sī, sui-jiân tang-thiⁿ kā in moa chi̍t têng pe̍h-pe̍h ê saⁿ, bô kú, in chiū beh koh chiong thâu phû khí-lâi, koh oa̍h kah chin hong-sēng.

Pêng-iú ah, m̄-thang kóng ji̍t-thâu sí-khì ah, chí in-ūi hō͘ hûn jia-khàm khí-lâi. Ji̍t-thâu iáu tī hia, joa̍h-thiⁿ iáu beh chiò kah kng-iàⁿ-iàⁿ. hiah ê hûn chiâⁿ-chòe chhun-thiⁿ ê hō͘, chiâⁿ-chòe gō͘-ge̍h thiⁿ ta̍k-chióng phang hoe ê êng-ióng bú-chhin.

Siōng tiōng-iàu ê, tng Siōng-tè ng I ê bīn hō͘ lí khòaⁿ bōe-tio̍h ê sî, m̄-thang kóng, Siōng-tè í-keng bōe-kì-tit lí lah. Tán chi̍t ē, I beh koh-khah thiàⁿ lí. It-tān I lâi, lí beh hoaⁿ-hí kah bōe kò͘-tit, án-ni kóng, “Chú sù tōa hí-lo̍k” (Nî-hi-bí 8:10), hoaⁿ-hí soah lâi ho̍k-sāi I. Sui ū iân-chhiân, chóng-sī m̄-bat siuⁿ òaⁿ lâi. --- Charles H. Spurgeon

Oh, ta̍k nî ū tang-thiⁿ,
Ta̍k nî iā ū lo̍h-hō͘ thiⁿ,
Chóng-sī ū chi̍t kang, ji̍t á mî,
Chiáu-á pe tńg-lâi gîm-si.

Chhiū puh sin íⁿ,
Chháu piàn chhiⁿ,
Hoe khui chin súi ê kî,
Chiáu-á pe tńg-lâi gîm-si.

Oh, múi ê sim iu-siong tîm-tāng,
Múi ê sim ōe khó͘-thàng,
Chóng-sī ū chi̍t kang,
Chiáu-á pe tńg-lâi oa̍h-tāng.

Nā-sī sit-khì ióng-khì,
Hôe-sióng kam-tiⁿ ji̍t-chí,
Tng àm-tām ê ji̍t kè-khì,
Chiáu-á pe tńg-lâi ê sî.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org