《台语荒漠甘泉（全罗版）》

 | | | 转寄

"Sìn-sim ê kî-chek"

作者 陈清俊 翻译 2011.09.04

listen


Káu ge̍h chhoe-sì (Káu ge̍h sì ji̍t)

“In pûn-kak ê siaⁿ thoa-tn̂g, lín thiaⁿ-kìⁿ hō-tâng ê siaⁿ, chèng peh-sìⁿ tio̍h tōa-siaⁿ hoah, siâⁿ-chhiûⁿ chiū beh tó pîⁿ-pîⁿ, ta̍k-lâng lóng tio̍h ti̍t-ti̍t chìn-chêng khì.” (Iok-su-a 6:5)

Ēng tōa sìn-sim tōa siaⁿ hoah, kap iô-lâi iô-khì ê sìn-sim sē-sē-liām, á-sī hoe-sim sit-chì ê oàn-thàn tú-tú tò-péng. Tī Siōng-tè ê ò-biāu tiong, bô ū chi̍t ê pí che “tōa siaⁿ hoah” khah pó-kùi ah. Iâ-hô-hoa tùi Iok-su-a kóng, “Khòaⁿ ah, góa í-keng chiong Iâ-lī-ko, i ê ông, i ê chiàn-sū, lóng kau tī lí ê chhiú.” (Iok-su-a 6:2) Chù-ì, I bô kóng “beh kau” sī kóng “í-keng kau” Chit ê sèng-lī sī í-keng sio̍k-tī Í-sek-lia̍t lâng lah. Taⁿ in thang khì the̍h, khì chiàm-iú, būn-tê sī beh án-chóaⁿ chòe. Khòaⁿ sī bô khó-lêng ê tāi-chì, chóng-sī Siōng-tè ū kè-ek.

Thong-siông bô lâng ōe siong-sìn “tōa siaⁿ hoah” ōe hō͘ siâⁿ-chhiûⁿ tó. Tī tang-hong, “Khàu-tó bān-lí tn̂g-siâⁿ” mā chiah sī bô iáⁿ-chiah ê kò͘-sū nā-tiāⁿ. Chóng-sī Í-sek-lia̍t lâng sèng-lī ê pì-koat phian-phian sī khò che “tōa siaⁿ hoah”. In-ūi che sī sìn-sim ê hoah. Sui-jiân bô jīm-hô tiāu-thâu, jīm-hô ê kheng-hiòng, in ēng sìn-khò Siōng-tè ê ōe, ū sìn-sim lâi “tōa siaⁿ hoah”. Siōng-tè iā hôe-èng in, iā sêng-chiū I ê èng-ún, tng in tōa siaⁿ hoah, siâⁿ-chhiûⁿ chiū tó-hoāi lah.

Siōng-tè soan kò, “Góa í-keng chiong Iâ-lī-ko kau tī lí ê chhiú.” In ū sìn-sim chiū si̍t-hiān piàn chòe chin ê. Kú-kú í-āu, chōe-chōe sè-kì āu, Sèng-lêng kì-lio̍k che sìn-sim ê sèng-lī án-ni kóng, “Í-sek-lia̍t lâng in-ūi sìn, se̍h Iâ-lī-ko chhit ji̍t, siâⁿ-chhiûⁿ chiū tó-hoāi lah.” (Hi-pek-lâi 11:30) --- Hannah Whitall Smith

Kàu Tōa Sèng-lī-chiá chhiùⁿ-koa khèng kong,
Sìn chiah ta̍t kàu chòe-ko hong,
Tī êng-iāu kiù-sio̍k ê siâⁿ tiong,
Siâⁿ-mn̂g lóng beh o-ló chheng-siōng. (Í-sài-a 60:18).


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org