《台语荒漠甘泉（全罗版）》

 | | | 转寄

"Kut-la̍t, Chia̍h la̍t"

作者 陈清俊 翻译 2011.07.03

listen


Chhit ge̍h chhoe saⁿ (Chhit ge̍h saⁿ ji̍t)

"Hit ê lôe-hn̂g beh iā-chéng-ê, kiám-sī siông-siông teh lôe mah?" (Í-sài-a 28:24)

Tī joa̍h-thiⁿ tú-tú khai-sí ê chi̍t ji̍t, góa kiâⁿ kàu chi̍t ê só͘-chāi, ū chi̍t-phiàn pîⁿ-pîⁿ ba̍t-ba̍t, chhiⁿ-chhiⁿ-chhiⁿ ê chháu-po͘, chhin-chhiūⁿ chi̍t-tè le̍k-sek ê tōa tē-thán pho͘ teh, Chin-súi chin hó-khòaⁿ. Kak-á, ū chi̍t-châng tōa-tōa châng ê chhiū, téng-bīn ū sǹg-bōe-oân ê chiáu-á, chhiùⁿ chhut bí-lē hó-thiaⁿ ê im-ga̍k, koh ū nn̄g saⁿ chiah ê gû tó tī chháu-po͘ teh hioh-khùn. Iā ū n̂g-hoe, chí-hoe chin-chōe chng-sek tī chháu -nih ê tōa tē-thán. Chit ê kéng-tì, si̍t-chāi súi bô pí. Góa kú-kú khiā teh hia, lâi him-sióng chit ê Siōng-tè só͘ chō chhut-lâi chiah-ni̍h bí-lē ê kéng-sek.

Tē jī ji̍t, góa koh kiâⁿ kàu hia, góa chin sit-bāng, hit ê bí-lē ê kéng-sek í-keng bô khì ah. Hit phìⁿ le̍k-sek ê tōa chháu-po͘, piàn chòe koân-koân kē-kē ê thô͘ lêng. Chi̍t ê chò-sit-lâng ēng thih-gû chi̍t-ji̍t ê kang-hu chiū chiong chit ê chháu-po͘ chau-thak liáu-liáu, phò-hoāi kàu bōe khòaⁿ tit. Thih-gû iáu thêng tī kak-á thâu. Chhiⁿ-chhiⁿ ê chháu-po͘ pìⁿ chòe n̂g-n̂g ê thô͘ lêng, n̂g-hoe, chí-hōe lóng bô-khì lah, liân chiáu-á iā chhun bô kúi chiah tī thô͘-kha teh chhē thâng lâi chia̍h. Góa siong-sim kóng, "Lâng thài ōe chiah-ni̍h chân-jím lâi phò-hoāi chit ê bí-lē ê kéng-tì ah?"

Āu-lâi góa ê ba̍k-chiu hō͘ chi̍t-siang bû-hêng ê chhiú lâi poah-khui, ná chhin-chhiūⁿ khòaⁿ tio̍h chi̍t-phìⁿ ê tiū-chhân, kiat chin-chōe ê chhek-á móa-móa tī tiū-sūi téng. Hong bî-bî-á chhe, tiū-hn̂g ná pho-lōng teh iô, chi̍t-pho chi̍t-pho ê tōng-chok si̍t-chāi súi, pí khí chháu-po͘, sī koh khah súi, ū tōng-chok chhin-chhiūⁿ tiān-iáⁿ teh ián súi ê kéng-tì. Koh ū siu-koah siu-sêng ê hoaⁿ-hí.

Ah, Lán ê úi-tāi ê chò-sit-lâng, lán ê Chú, chiong lán súi-súi ê sim-tiân phò-hoāi, piàn-chòe pháiⁿ-khòaⁿ n̂g-n̂g ê sim-thô͘, siū thòng-khó͘. Bô-kú chiū ū koh khah súi ê kéng-sek chhut-hiān, koh ū siu-sêng ê hoaⁿ-hí, khoài-lo̍k.

Chú lê-chhân, tī góa ê sim-lêng lê chi̍t-tiâu chi̍t-tiâu chhim-chhim ê hûn, góa ūi-sím-mi̍h beh kiaⁿ-hiâⁿ? Góa chai, I m̄-sī bô-lí-kái ê chò-sit-lâng. I ê bo̍k-tek sī beh un-un khûn-khûn ê iā-chéng koh beh hong-hong hù-hù ê siu-sêng. --- Samuel Rutherford


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org