《台语荒漠甘泉（全罗版）》

 | | | 转寄

"Hûn ê Kong-chhái"

作者 陈清俊 翻译 2011.05.15

listen


Gō͘ ge̍h cha̍p-gō͘ (Gō͘ ge̍h cha̍p-gō͘ ji̍t)

“Taⁿ (ū hûn jia-cha̍h), lâng bô khòaⁿ-kìⁿ kiong-chhong-lāi chhàn-lān ê kng; To̍k-to̍k hong tùi teh kè, chiū hō͘ i chheng-chhái.” (Iok-pek-kì 37:21)

Sè-kài kéng-koan ê súi ū chi̍t tōa pō͘-hūn sī in-ūi ū hûn. Thài-iông chhàn-lān, bí-lē ê nâ-thiⁿ, pēng bōe thang kap piàn-hòa bû-kiông, chòng-lē ê hûn-chhái pí-phēng. Koh, nā m̄-sī ū hûn ê jia-pè, tē-kiû chá-chá chiū chiâⁿ-chòe hong-hùi loh.

Jîn-seng iā sī ài ū hûn lâi jia-pè, hō͘ lán cheng-sîn cheng-eng. Iā ài ū àm-mî ê o͘-àm tà lán. Put-kò ài chai, bô ū hûn bô tài kong-chhái. Siōng-tè kóng, “Góa chiong khēng khǹg tī hûn tiong.” (Chhòng-sè-kì 9:13). Lán nā tī hûn ê téng-bīn khòaⁿ, sī khòaⁿ tio̍h hûn tī kong-hui ê ji̍t-kng tiong teh tín-tāng, ū pho-lōng ê súi. Gio̍k-san, A-lí-san ê khì-siōng piàn-hòa bû-hān, chòng-koan ê kéng-tì chiū-sī ū hûn ê chham-ú.

Chóng-sī, lán nā tùi ē-bīn khòaⁿ hûn, thài ōe chai, tī soaⁿ téng hit-chióng kéng-sek ê úi-tāi, kng-liōng neh? Hûn kâⁿ tio̍h múi chi̍t tih ê hō͘-chúi, iā kâⁿ ū kiān-khong ê iàu-sò͘, āu-lâi kiám m̄-sī lóng lo̍h ǹg tē mah?

Chhin-ài ê Siōng-tè ê kiáⁿ-jî! Ài tùi téng-bīn lâi khòaⁿ lí ê pi-siong, hoân-ló, m̄-sī tùi ē-bīn khòaⁿ. Sī tùi “Kap Ki-tok Iâ-so͘ tâng chē tī thiⁿ nih” (Í-hut-só͘ 2:6) lâi khòaⁿ, lí chiū kìⁿ-tio̍h chhái-sek súi-súi ê khēng tī thiⁿ téng só͘ hián chhut ê bí-lē lah. Lí iā ōe khòaⁿ-tio̍h Ki-tok iông-māu ê kong-hui. Tng lí tú-tio̍h hiah ê hûn ǹg lí ê jîn-seng tiong só͘ tâu lâi ê im-iáⁿ, chiū ōe sim-an lí-tek lah.

Ōe kì-tit, hûn, lóng-sī tī Siōng-tè ēng lâi chheng-kia̍t bān-mi̍h ê hong, ê chêng-bīn î-tōng.

Góa m̄-chai, ūi-hô hut-jiân ū po̍k hong-hō͘,
Kiông-lia̍t sàu tī góa teh kiâⁿ ê lō͘,
Chóng-sī góa chai, Siōng-tè khòaⁿ góa ê kha-pō͘,
Góa thang sìn-khò I ê chiáu-kò͘.

Góa bōe thang sóa-khui thâu-chêng ê pò͘,
Hāi góa khòaⁿ bōe-tio̍h chêng-bīn ê lō͘,
Iā m̄-chai beh tú-tio̍h ê, sī kng-bêng á-sī o͘-o͘,
Tān-sī góa sìn-khò I ē khòaⁿ-kò͘.

Góa bô la̍t thang khòaⁿ khah hn̄g,
Khòaⁿ kàu hô ê hit pêng ê tē-hng,
Chóng-sī góa chai, góa sio̍k I kú-kú tn̂g-tn̂g,
Só͘-í góa thang sìn-khò, chìn-ji̍p lo̍k-hn̂g.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org