《台语荒漠甘泉（全罗版）》

 | | | 转寄

"khoài-lo̍k"

作者 陈清俊 翻译 2011.03.20

listen

Saⁿ ge̍h jī-cha̍p (Saⁿ ge̍h jī-cha̍p ji̍t)

“Chhin-chhiūⁿ hoân-ló, kî-si̍t siông-siông khoài-lo̍k; chhin-chhiūⁿ sòng-hiong, kî-si̍t hō͘ chōe-chōe lâng pù; chhin-chhiūⁿ bô ū, kî-si̍t sī bô m̄ ū.” (Ṳ Ko-lîm-to 6:10)

Chi̍t-ê kian-kiông ê lâng sī bô sûi-piān lâu ba̍k-sái. Tān-sī ki-tok-tô͘ pēng bô kìm-chí bōe-sái khàu, lâu ba̍k-sái. Sim-lêng ke̍k-tō͘ ê iu-siong ōe piàn-sêng chēng-chēng bōe chhut-siaⁿ. Ná chhin-chhiūⁿ chi̍t chiah iûⁿ tī siū chián mn̂g ê sî, phi̍h-phi̍h-chhoah bōe chhut-siaⁿ chi̍t-iūⁿ. Tn̄g-tio̍h cheng-sîn siū khó-giām, siū ke̍k-tōa ê khó͘-lān ê sî, lán thang tōa-siaⁿ kiû-kiò, thî-khàu lâi tit-tio̍h tháu-pàng. Chóng-sī iáu-ū pí chit ê khah hó ê pān-hoat.

Bat thiaⁿ kóng, tiⁿ-bi̍t ê chheng-chôaⁿ sī tùi kiâm-kiâm ê hái-chúi lâi ê. Koân-soaⁿ nih siōng-súi ê hoe, sī siⁿ tī siōng hong-hùi, siōng bô lâng kàu, gûi-hiám ê soaⁿ-kan tiong. Siōng-súi ê si-koa, sī tùi siū ke̍k thòng-khó͘ ê lêng-hûn só͘ sán-seng ê.

Goān che chêng-hêng iáu teh kè-sio̍k. Tī chōe-chōe chhì-liān tiong, thiàⁿ Chú ê lêng-hûn, ōe hoat-hiān, chhē-chhut bû-sò͘ “tio̍h tiô-thiàu, hoaⁿ-hí kap khoài-lo̍k” ê lí-iû. “Chúi-chhiâng hoat siaⁿ, chhim-ian hiáng-èng” (Si-phian 42:7) Tùi Chú lâi o-ló ê koa, chheng-liāng ê siaⁿ beh siông-siông thiaⁿ-tio̍h. Tng lán tī siōng khùn-lân thòng-khó͘ ê sî, lán iáu ōe hoat-chhut kám-siā o-ló Thiⁿ-pē Siōng-tè, lán ê Chú ê koa-siaⁿ.

Lí ū tit-tio̍h chit-hō ê kà-sī bô? Lán m̄-nā ài jím-nāi, thiaⁿ-thàn Chú ê chí-ì, koh-khah tio̍h chìn-chi̍t-pō͘ “Móa-móa ū êng-kng ê hí-lo̍k”, (I Pí-tek 1:8) Ūi-tio̍h che lâi hoaⁿ-hí khoài-lo̍k.

Hoân-ló iu-siong ê tāng-tàⁿ, siū-siong ê sim-kéng,
Chhùi ha̍p tiâu-tiâu, ba̍k-sái kâm tī ba̍k-chiu lāi ê chêng-hêng,
Bô giân bô gú, bô khàu bô kiû-chêng,
Góa beh chēng-chēng.

Khòaⁿ bōe tio̍h, siūⁿ bōe khui,
Bû-chêng ê hé, jiá-khí lāi-bīn siū-siong ê huih,
Sit-khì só͘ chhun chi̍t-tián-tián-á ê an-ùi,
Góa iû-goân chēng-chēng bô khui chhùi.

Siōng-tè sī thiàⁿ, góa ài jím-nāi,
Góa ê lêng bô giâu-gî, bô pi-ai,
Góa beh tán-thāi,
I ê chhiú chhun chhut-lâi.

Góa cheng-chat, góa kiaⁿ-hiaⁿ,
Góa iáu thiaⁿ góa ê sim-siaⁿ;
Ēng bô-koh-ū ba̍k-sái ê ba̍k-chiu kiû-kiò I ê miâ,
Kóng, Chú ah, goān Lí ê chí-ì tit chiâⁿ.

Bô-kú, góa siū ah-tiâu ê sim kóng ōe,
Ūi-hô chhùi tu-tu, bīn iu-iu, ba̍k khoeh-khoeh,
Góa ê lêng ah, lán khah hó, khí-lâi chòe,
M̄-thang koh chēng-chēng, ài khoài-lo̍k tùi sim-tóe!

Taⁿ góa sim khoài-lo̍k lâi chhiùⁿ-koa,
M̄-bián ga̍k-khì lâi tôaⁿ, lâi phōaⁿ,
Soa-bô͘ tiong ê kam-chôaⁿ,
Sui siū-siong, iáu beh ná eng tián-si̍t pe ǹg koân soaⁿ.
--- S.P.W.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org