《台语荒漠甘泉（全罗版）》

 | | | 转寄

"Iâ-so͘ saⁿ tâng kiâⁿ"

作者 陈清俊 翻译 2011.01.23

listen

Chiaⁿ ge̍h jī-saⁿ. (It ge̍h jī-cha̍p-saⁿ ji̍t)

“Iâ-hô-hoa ah, Lí siáⁿ-sū hn̄g-hn̄g teh khiā?.” (Si-phian 10:1)

Siōng-tè khak-si̍t sī lán ê “hoān-lān-tiong ki̍p-sî ê pang-chān.” (Si-phian 46:1) Tān-sī I siông-siông chi̍t-bīn hí-khó hoān-lān tui-pek lán, koh chi̍t-bīn khiā tī hn̄g-hn̄g khòaⁿ-bōe-tio̍h ê só͘-chāi, bô teh koan-sim lán ê khoán. Chóng-sī tng lán siū chhì-liān, khó͘-lān liáu, lán chiah hoat-hiān o͘-àm tiong ê pó-pòe, khó͘-lān nih ê châi-hù.

Kî-si̍t lán tī hoān-lān-tiong, I iā kap lán tī-teh, sī lán ê ba̍k-chiū bô khòaⁿ-kìⁿ nā-tiāⁿ. I bô lī-khui lán, sī o͘-am hō͘ lán ê ba̍k-chiū khòaⁿ bōe tio̍h Tōa Chè-si, Chú Iâ-so͘ ê hêng-thé. Siōng-tè sī sìn-si̍t ê, I sī sî-sî kap lán tông-chāi; tng lán nā kap I kóng-ōe, kî-kiû, chhim-sìn I tī-teh ê sî, lán ōe tit-tio̍h I hôe-tap ê siaⁿ, chèng-bêng I bô lī-khui lán. Bô-lūn tī o͘-o͘ àm-àm kiaⁿ-hiâⁿ ê pōng-khang lāi, á-sī kiâⁿ tī kng-bêng ê tōa-lō͘ tiong, lán ê Pē lóng sī óa tī lán sin-piⁿ.

Chiân-tô͘ bâng-bâng sim kiaⁿ-kiaⁿ?
Lō͘ nih im-hiám bōe chhòng siáⁿ?
Chai góa m̄-sī tan-to̍k kiâⁿ,
Piⁿ-á ū Lí kha-pō͘ siaⁿ.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org