《台语荒漠甘泉（全罗版）》

 | | | 转寄

"Bān-sū kau-thok Chú"

作者 陈清俊 翻译 2010.11.21

listen


Cha̍p-it ge̍h jī-it (Cha̍p-it ge̍h jī-cha̍p-it ji̍t)

"Tio̍h chiong lí ê tāi-chì kau-tài Iâ-hô-hoa." (Si-phian 37:5)

Put-koán lí ū sím-mi̍h sū, jīm-hô ê tāng-tàⁿ lóng kóng hō͘ Siōng-tè thiaⁿ, chiong kui ê tāi-chì kau-thok tī I ê chhiú tiong. Án-ni chòe, lí chiū bōe siū-tio̍h sè-kan ê hun-loān, chhiong-tu̍t, kap khòa-lū. Sū-si̍t-siōng, put-koán sím-mi̍h sî chún-pī chòe sím-mi̍h sū, siū sím-mi̍h khó-giām, á-sī chòe ji̍t-siông seng-oa̍h khang-khè, lóng-chóng kóng hō͘ Siōng-tè chai. Sī, chiong it-chhè hiòng I kóng-bêng, sīm-chì chiong tāng-tàⁿ sià hō͘ I, liáu-āu lí chiū bô koh ūi chiah ê sū iu-lū kap hoân-ló. Tùi taⁿ khí, chēng-chēng kang-chok, jīn-chin, kín-sīn, liáu-kái lí sī oân-choân khò I lâi chìn-hêng kang-chok. Chiong lí ê iu-lū kap lí pún-sin chòe chi̍t-hé, ná tāng-tàⁿ kau-thok Siōng-tè. --- R. Leighton

Kim-ji̍t ûi-chō chi̍t ê sìn-sim ê lî-pa-hn̂g,
Thiàⁿ ê kang-chok chhiong-móa hit tiong-ng,
Bêng-ji̍t bo̍h-tit khòaⁿ lî-pa gōa hn̄g-hn̄g,
Bô-lūn hí-lo̍k á iu-siong, I long ōe tam-tng.

Lí beh hoat-hiān bô khó-lêng "Chiong lí ê tāi-chì kau-tài Iâ-hô-hoa", tû-hui lí ê sū ū hû-ha̍p tio̍h I ê tông-ì. Chí-ū thong-kè sìn-sim lâi chòe, ká-sú lí ê sim-lāi sīm-chì ū chi̍t-tiám-tiám-á ê hoâi-gî, sìn-sim chiū bōe hoat-seng chok-iōng. Chiong tāi-chì kau-thok Siōng-tè sī liân-sòa ê tōng-chok, m̄-sī ko͘-ko͘ chi̍t pái chiū kàu-gia̍h. Put-koán I ê ín-chhōa sī chin ì-gōa, á-sī chin te̍k-pia̍t bô pêng-siông, iā put-koán I chhōa kàu lī soaⁿ-gâi jōa-kūn, éng-oán m̄-thang chiong ín-chhōa ê soh tùi I ê chhiú chhiúⁿ kè-lâi.

Lí goān-ì chiong lí it-chhè ê sū lóng kau-thok Siōng-tè, hō͘ I chòe koat-tēng mah? Chi̍t ê ki-tok-tô͘ su-iàu siông-sè kiám-giām i pún-sin ê si̍p-koàn kap kiàn-kái khòaⁿ-hoat, in-ūi lán siông-siông hām-lo̍h tī lia̍h-chòe Siōng-tè it-tēng tông-ì. Án-ni chiah ōe ū chi̍t-kóa ki-tok-tô͘ ōe tio̍h-kip kap kiaⁿ-hiâⁿ. Hián-jiân in bô kau-tài in ê só͘ chòe hō͘ Chú, oân-choân kau-thok I. In the̍h tāi-chì kàu I ê bīn-chêng, chóng-sī lī-khui ê sî, iā koh chiong tāi-chì tòa tò-tńg.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org