《台语荒漠甘泉（全罗版）》

 | | | 转寄

"Chûn ǹg-bāng"

作者 陈清俊 翻译 2010.09.05

listen

Káu ge̍h chhoe-gō͘ (Káu ge̍h gō͘ ji̍t)

"hoān-nā thèng-hāu I ê, lóng ū hok-khì." (Í-sài-a 30:18)

Lán siông-siông thiaⁿ kóng thèng-hāu Siōng-tè, si̍t-chè-siōng sī teh thèng-hāu lán sī-m̄-sī í-keng chún-pī hó-sè. Lēng-gōa chi̍t bīn, sī lán teh tán Siōng-tè, ti̍t-kàu I chún-pī hó-sè.

Ū-ê kóng, iā chin-chōe lâng án-ni siong-sìn, lán nā ha̍h tī I ê tiâu-kiāⁿ, Siōng-tè chiū hôe-tap lán ê kî-tó. In kà-sī lán kóng, Siōng-tè oa̍h tī éng-oán ê khong-kan, bô kè-khì, bô chiong-lâi, chí-ū hiān-chāi. Lán nā sūn-ho̍k I ê chí-ì oân-sêng I ê iau-kiû, lán ê su-iàu má-siōng tit kái-koat, lán ê kî-tó tit èng-ún.

Chit khoán ê sìn-sim ū i ê tō-lí, chóng-sī chí ū kóng chhut i chi̍t pō͘-hūn ê tō-lí. Siōng-tè sī oa̍h tī éng-oán ê hiān-chāi nih, tān-sī I si̍t-hêng I ê chí-ì su-iàu sî-kan. Lán ê chhéng-kiû chhin-chhiūⁿ chi̍t-lia̍p be̍h, á-sī chéng-chí lo̍h tī thô͘-kha. Su-iàu chhiau-chhut lán lêng-le̍k chin-chōe í-gōa ê le̍k-liōng, lâi ūn-chok tī i téng-bīn, ti̍t-kàu si̍t-chè ê sêng-kó chhut-hiān. --- tùi "Bî-sòe ê siaⁿ"

Góa kiû tī iông-ī ê lō͘ kiâⁿ,
Lī-khui hoân-cha̍p ke-lāi sū-kiāⁿ,
Siūⁿ tī pa̍t hong-bīn sū-hōng Siōng-tè,
Tān-sī Iâ-so͘ kóng, "sî-chūn iáu-bōe."

Góa kiû iā chéng-chí tī pa̍t só͘-chāi,
Chū-iû kang-chok, chin chū-chāi,
Kap pa̍t ê kang-lâng saⁿ-kap chòe-hé,
Tān-sī Iâ-so͘ kóng, "Che m̄-sī góa só͘ hun-phài lí ê."

Góa kiû lī-khui soa-bô͘ kang-tiâⁿ,
Kàu chōe-ok kiàn-siàu lêng-hûn ê siâⁿ,
Kiám-chhái tit in ê lêng-hûn sìⁿ-miā,
Tān-sī Chú kóng, "Bô tī hia, sī tī chia soan-iông góa ê miâ."

Góa kiû ūi góa Ông cheng-chiàn,
Chiong I ê kî tōa-tōa êng-hián,
Tān-sī Tōa Chiong-kun ài góa thèng-hāu kap chhiùⁿ-koa,
Tī pêng-hoân seng-oa̍h tiong chhiùⁿ I khái-soân ê koa.

Góa kiû lī-khui khùn-khó͘ kan-lân,
Tī hia chí-ū bû-nāi, chēng-chēng, ko͘-toaⁿ teh tán,
Hi-bāng ū lâng saⁿ pang-chān,
Tān-sī Iâ-so͘ ài góa kò͘ mn̂g tan-tan.

Góa kiû lī-khui ji̍t-ji̍t ê hoân-cha̍p,
Ná chhin-chhiūⁿ bô lâng liáu-kái lâi chhap,
Tān-sī Ki-tok kóng, "Chit ê tē tùi lí sī sek-ha̍p,
Hi-bāng kā góa chèng hi-kî ê hoe siū chiap-la̍p."

Taⁿ góa bô koh kiû hí-chún,
Chí goān kiâⁿ I chí-ì, bô-lūn hn̄g-kūn,
Ūi I kang-chok chōe-chió bô-lūn,
Án-ni koat-ì bô soán-te̍k, sī góa sim an-hūn.

Jím-nāi ê ì-gī chiū-sī goān-ì thèng-hāu. --- tùi "Thian-lō͘ le̍k-thêng"


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org