《台语荒漠甘泉（全罗版）》

 | | | 转寄

"Sìn-khò ūi góa sí ê Ki-tok"

作者 陈清俊 翻译 2010.08.01

listen
Poeh ge̍h chhoe-it (Poeh ge̍h it ji̍t)

"Sī tio̍h chiong pún-sin hiàn hō͘ Siōng-tè, chhin-chhiūⁿ tùi sí-lâng tiong lâi oa̍h ê, iā hiàn lín ê pah-thé hō͘ Siōng-tè." (Lô-má 6:13)

Ū chi̍t àm, góa khì thiaⁿ iú-koan hiàn-sin ê káng-tō. Káng-tō pēng bô hō͘ góa sím-mi̍h te̍k-pia̍t ê khé-sī. Put-kò tī bo̍k-su kūi-lo̍h kî-tó ê sî kóng, "Chú ah, Lí chai goán ōe sìn-khò ūi goán lâi sí ê hit ê lâng (Ki-tok)." He chiū-sī góa ê sìn-sit. Góa khí-sin tńg-khì, tī koe-lō͘ khì tah hé-chhia, chhim-chhim teh siūⁿ hiàn-sin tùi góa sìⁿ-miā ê ì-gī. Góa siūⁿ tio̍h kò-jîn ài hù-chhut tāi-kè sim chiū kiaⁿ. Tī koe-thâu kau-thong hoân-cha̍p chháu-nāu siaⁿ tiong, hit ê sìn-sit koh chhut hiān tī góa sim lāi, "Lí ōe sìn-khò ūi lí lâi sí ê hit ê lâng (Ki-tok)." Góa chiūⁿ hé-chhia, tī tńg-khì ê tô͘-tiong, siūⁿ kàu hiàn-sin chit ê sū, hō͘ góa sìⁿ-miā khó-lêng ōe tòa lâi ê kái-piàn, hi-seng, kap sit-bāng, góa ê sim iáu-sī chin kiaⁿ-hiâⁿ.

Kàu chhù, góa ti̍t-chiap ji̍p góa ê pâng-keng, kūi-lo̍h, khòaⁿ góa ê it-seng tī ba̍k-chêng sàu-kè. Góa sī ki-tok-tô͘, sī tī kàu-hōe tam-jīm chit-bū, sī chú-ji̍t-o̍h ê hāu-tiúⁿ, tān-sī góa m̄-bat koat-sim chiong góa ê sìⁿ-miā hiàn hō͘ Siōng-tè. Góa chi̍t ē siūⁿ tio̍h góa ka-kī "pó-kùi" kè-ōe khó-lêng beh tú-tio̍h khui-sún, góa chhim-chhim thiàⁿ-sioh ê hi-bāng ài kau-chhut, góa ê chit-gia̍p sū-gia̍p ài hòng-khì, chiū chin kiaⁿ.

Góa oân-choân bô khòaⁿ tio̍h Siōng-tè ūi góa chòe koh-khah hó ê chún-pī. Góa ê sim tô-siám I. Jiân-āu tùi sim-lāi hoat-chhut chi̍t ê sìn-sit, "Góa ê kiáⁿ-jî, lí ōe sìn-khò ūi lí sí ê hit ê lâng mah? Nā-sī lí bōe sìn-khò I, á-bô, lí beh sìn-khò sím-mi̍h lâng?" Chit ê ōe chhin-chhiūⁿ sih-nà siā ji̍p tī góa sim, hō͘ góa chhíⁿ-gō͘. Hit ê lâng thiàⁿ góa kàu ūi góa lâi sí choa̍t-tùi thang sìn-khò. I choân-jiân koan-sim I só͘ kiù-sio̍k ê lâng.

Chhin-ài ê pêng-iú, lí thang sìn-khò ūi lí lâi sí ê hit ê lâng. Lí sìn-khò I, hō͘ I chó͘-chí múi chi̍t ê eng-kai chó͘-chí ê kè-ōe, khì oân-sêng I ōe tit-tio̍h siōng êng-iāu, chì-siān ê múi chi̍t ê kè-ōe. Lí thang sìn-jīm I, iû I chhōa lí kiâⁿ tī siōng sek-ha̍p lí ê jîn-seng tō-lō͘. --- J.H.M.

Góa chōe ke̍k tāng, bōe-tit the-sî,
Chiàu thiⁿ lu̍t-hoat, éng-oán tio̍h sí,
Chai bô hoat-tō͘, thang kiù ka-kī,
Iâ-so͘, góa lâi chiū Lí, chiū Lí. --- tùi Tâi-gú sèng-si

Góa chiū-sī góa, Chú thiàⁿ bû-hān,
Pôaⁿ kè it-chhè hi-seng kài-hān,
Taⁿ góa sio̍k Lí, tan-tan sio̍k Lí,
Siōng-tè Iûⁿ-ko, góa lâi chiū Lí.

Jîn-seng m̄-sī tùi sè-kài só͘ kiù chhut-lâi chhun ê kè-ta̍t, sī beh chòe tùi sè-kài ê tâu-chu.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org