《台语荒漠甘泉（全罗版）》

 | | | 转寄

"Sìn-sim su-iàu khó-giām"

作者 陈清俊 翻译 2009.08.30

listen


Poeh ge̍h saⁿ-cha̍p (Poeh ge̍h saⁿ-cha̍p ji̍t)

"Chē-chûn kè-hái, tī tōa-chúi-tiong keng-êng sū-gia̍p ê, in khòaⁿ-kìⁿ Iâ-hô-hoa ê só͘-chòe, kap I tī chhim-ian só͘ kiâⁿ ê kî-sū." (Si-phian 107:23-24)

Chi̍t ê lâng nā bōe-hiáu lī-iōng ta̍k hong-hiòng ê hong lâi sái ǹg thian-tông hong-hiòng ê, i m̄-sī sái-chûn sai-hū, chí-sī chi̍t ê tô͘-tē. Sū-si̍t pêng-chēng bô hong ê hái-bīn tùi lán chi̍t-tiám-á lō͘-ēng to bô. Hong, bô-lūn sī tùi tang, tùi sai, tùi lâm, tùi pek chhe lâi, lóng thang pang-chān lán sái hiòng siū-chiok-hok ê káng-kháu. Só͘-í lán só͘ chhē-kiû ê, sī tī hái tiong m̄-kiaⁿ po̍k-hong-ú. Goān lán ōe chhin-chhiūⁿ chi̍t ê Eng-kok lāu-tōa-lâng, án-ni kî-tó kóng, “Chú ah, chiong goán phài tī hái chhim ê só͘-chāi, in-ūi hiān-chāi goán lī hōaⁿ siuⁿ kūn, mô͘-kúi ēng chi̍t si-si ê hong lâi chhe, chiū ōe hō͘ goán ê chûn tio̍h-ta̍k, koh khó-lêng phòa-li̍h. Chú ah, goán koh chi̍t-pái chhéng-kiû chiong goán phài kàu hái chhim ê só͘-chāi, hia ū khoan-khoah ê khong-kan, thang tit êng-kng ê tek-sèng. --- Mark Guy Pearse

Ài-kì-tit, Lán ê sìn-sim ài siū khó-giām chiah ōe ta̍t-kàu chòe ko-tiám. Jio̍k-thé ê chū-sìn sī tòng bōe kè khó-giām. Pêng-pêng sūn-sūn ê sìn-sim m̄-sī chin-chiàⁿ ê sìn-sim. --- Charles H. Spurgeon

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com