《台语荒漠甘泉（全罗版）》

 | | | 转寄

"Hô-hâi siaⁿ-im"

作者 陈清俊 翻译 2007.01.28

listen











It ge̍h jī-cha̍p-poeh ji̍t

"In-ūi góa chiong Siōng-tè ê jia̍t-sim, ūi-tio̍h lín lâi jia̍t-sim;" (Ṳ Ko-lîm-to 11:2)

Ū keng-giām ê khîm-chhiú, tùi i ê khîm sī jōa-chiâⁿ jia̍t-sim ài-hō͘, phō i, sioh i, ná chhīn-chhiūⁿ i ka-kī ê kiáⁿ chi̍t-iūⁿ. Chiong i ê it-seng siau-mô͘ tī khîm ê téng-bīn. Khòaⁿ i án-chóaⁿ teh tiâu khîm. Chiong khîm lia̍h-tiâu, kín-kín tôaⁿ kî-tiong ê chi̍t tiâu hiân, àⁿ hīⁿ jīn-chin thiaⁿ, nā-sī só͘ chhut ê siaⁿ chin thòng-khó͘, chin chha̍k hīⁿ, sī cháu-im lah, i chiū chiong hit tiâu hiân ê lô͘-si ká khah ân, ân kah kah-ná beh tn̄g ê khoán, koh tôaⁿ khòaⁿ-māi, nā-sī só͘ hoat ê siaⁿ hó thiaⁿ, ū chún, i ê bīn chiū chhut-hiān chhiò-iông.

Siōng-tè iā sī án-ni teh tiâu-chèng lí. I thiàⁿ lí, pí khîm-chhiú ài khîm koh-khah chhim. Tī lí sin-chiūⁿ só͘ thiaⁿ-tio̍h ê lóng sī chha̍k-hīⁿ ê, I beh ēng lí só͘ kám-kak thòng-khó͘ lâi tiâu-chèng lí ê sim-hiân. Jiân-āu I un-jiû oan-io àⁿ-hīⁿ, tôaⁿ chi̍t ē, siông-sè koh thiaⁿ, nā-sī thiaⁿ-tio̍h lóng sī oàn-giân, chiū koh tiâu, koh tôaⁿ, tio̍h-kip lâi thiaⁿ lí ê hôe-èng, I ê sim ke̍k-kî ǹg-bāng thiaⁿ tio̍h lí ê sim kóng, "to̍k-to̍k m̄ sī góa ê ì-sù, sī lí ê ì-sù tio̍h chiâⁿ." (Lō͘-ka 22:42) Che sī I só͘ ài thiaⁿ-tio̍h ê im-ga̍k, chhin-chhiūⁿ thiⁿ-sài ê koa-siaⁿ chi̍t-iūⁿ. I ōe bô-thêng teh tiâu lí ê sim-hiân, ti̍t-kàu lí ê lêng khéng khiam-pi, sūn-ho̍k lo̍h-lâi, chhin-chhiūⁿ Thiⁿ-pē hit chióng ê sûn-kiat, éng-oán hô-hâi chi̍t-iūⁿ.

To-hiân ê khîm ê siaⁿ hiah nih khì-phài,
Múi chi̍t tiâu hiân hoat-chhut thiàⁿ koh hô-hâi.
Nā ū chi̍t-tiâu tn̄g-khì, lēng-khì, sún-hāi,
Chiū piàn chhì-chha̍k, tiâu khòaⁿ-māi.

Kông jia̍t thiàⁿ-thàng kap thòng-khó͘, kiaⁿ sit- lo̍h saⁿ liân,
The̍h tio̍h ông-bō ê chhiú, sī thong-kè si̍p-jī-kè ê khó͘-liān.
Nā bô cheng-chiàn, pí-sài, chiū bô sèng-lī hián-hiān.
Keng-kè lô-khó͘, chiah chai an-hioh, pêng-chēng hô-siān.

Peh koân-soaⁿ, kè po̍k-hong, chiah ōe him-sióng,
Thiⁿ chheng-khì, chhàn-lān, tē chhiⁿ-chhùi, bí-siōng.
Bô hûn, kong-hui chhut ji̍t thiⁿ,
Tîn-ai, ù-jiám piàn àm-khì.

Sáng ài soán-te̍k, nn̄g-hāng lóng beh, á lóng boái,
Chai-lān ê thòng-khó͘, kap siōng un-jiû ê khin-khoài,
Bô hui-siông ê thòng-khó͘, thài ōe ū hui-siông ê hok-hūn,
Tūn ê sim-hiân bōe hoat-chhut hô ê siaⁿ-ūn.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw