《台语荒漠甘泉（全罗版）》

 | | | 转寄

"Siōng-tè só͘ tiāⁿ-tio̍h ê sî"

作者 陈清俊 翻译 2009.05.24

listen

Gō͘ ge̍h jī-sì (Gō͘ ge̍h jī-cha̍p-sì ji̍t)

"A-pek-la̍h-hán nî-lāu ê sî, Sat-la̍h hoâi-īn; kàu Siōng-tè tùi i kóng ê ji̍t-kî, chiū kā i siⁿ chi̍t ê kiáⁿ." (Chhòng-sè-kì 21:2)

"Iâ-hô-hoa ê kè-e̍k éng-oán khiā-chāi, I ê sim só͘ siūⁿ ê kàu bān sè-tāi." (Si-phian 33:11) Lán pit-su chún-pī tng-tán Siōng-tè ê sî-kan. I ê sî-kan sī chin chún, chiū tī I só͘ tiāⁿ-tio̍h ê sî, "hit ê sî" chòe tāi-chì. Bô su-iàu lán chai "hit ê sî", si̍t-chè-siōng lán iā m̄-chai "hit ê sî." Lán chí-ū tán-thāi "hit ê sî."

Ká-sú tng A-pek-la̍h-hán iáu tī Ha̍p-lân ê sî, Siōng-tè kā i kóng i su-iàu tán saⁿ-cha̍p nî chiah tap-èng hō͘ i chi̍t ê kiáⁿ, chin khó-lêng i ōe hoe-sim, Chóng-sī chû-ài ê Siōng-tè bô kóng chhut chit ê tn̂g-tn̂g ê nî-sò͘, chí tán kàu chhun kúi kò-ge̍h ê sî, chiah kóng chhut. "Kàu-kî, mê-nî chit-sî, Góa beh koh lâi lí chia, Sat-la̍h beh siⁿ chi̍t ê kiáⁿ." (Chhòng-sè-kì 18:14) Kàu só͘ tiāⁿ-tio̍h ê ji̍t, hoaⁿ-hí chhiong-móa tī chit ê cho̍k-tiúⁿ ê ke, in iā bōe kì-tit kú-tn̂g thèng-hāu ê iu-lū.

Só͘-í, sòe-kiáⁿ ah, tng Siōng-tè ài lí tán-thāi, I bōe hō͘ lí sit-bōng. I ê sî-kan sī chún-sî, liân gō͘ hun-cheng ian-chhiân iā bô khó-lêng. Bô-kú, "Lín ê iu-būn beh pìⁿ-chòe hoaⁿ-hí." (Iok-hān 16:20)

Ah, Siōng-tè tòa hō͘ lán ū khoài-lo̍k ê lêng sī jōa-chiâⁿ hoaⁿ-hí! Iu-siong thî-khàu beh éng-oán bô khì, ná chhin-chhiūⁿ thàu-chá thiⁿ-kng ê sî, o͘-àm chiū bô khì chi̍t-iūⁿ.

Chûn téng ê lú-kheh m̄ thang khì kan-sia̍p hái-hêng-tô͘ kap lô-pôaⁿ (khong-phá-sú, chí-lâm-chiam), tio̍h hō͘ ū keng-giām ê chûn-tiúⁿ, i pún-sin chòe chit ê tāi-chì. --- Robert Hall

Chin chōe sū bōe chi̍t kang chiū oân-sêng. Siōng-tè iā bô hō͘ êng-kng ê se̍k-iông chi̍t sùn-kan chō-sêng. I ài ēng sî-kan tī sai-pêng ê thian-khong chún-pī po̍h-po̍h ê bū-khì chiah ōe ū.

Chhàn-lē ê chá-sî, tang-sî? Siáⁿ kóng? Tó-ūi?
Koâiⁿ-soaⁿ piàn pîⁿ-iûⁿ, koh pûi-súi,
Ta-tē chhiong-móa hō͘-chúi.
Tâng-mn̂g thih-chhòaⁿ lông pháiⁿ húi,
Piàn-chòe thong-thiⁿ ê thui.
Khi-khu-tē chhòng pîⁿ, oan-khiau piàn ti̍t
Lóng hoat-seng tī Siōng-tè só͘ tiāⁿ-tio̍h ê ji̍t,
Khó-lêng sī tī āu-ji̍t, iā khó-lêng sī kin-á-ji̍t.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com