《台语荒漠甘泉（全罗版）》

 | | | 转寄

"Chhì-giām"

作者 陈清俊 翻译 2009.04.12

listen



Sì ge̍h cha̍p-jī (Sì ge̍h cha̍p-jī ji̍t)

"Iâ-so͘ siū Sèng Sîn chhiong-móa, tùi Iok-tàn hô tò-lâi; hō͘ Sèng Sîn chhōa I tī khòng-iá-ni̍h sì-cha̍p ji̍t kú, hō͘ Mô͘-kúi chhì I;." (Lō͘-ka 4:1-2)

Iâ-so͘ sui-jiân siū Sèng-lêng ê chhiong-móa, iáu-kú tio̍h siū chhì-thàm. Siōng chiap-kūn Siōng-tè ê lâng, tio̍h siū siōng kiông-lia̍t ê chhì-thàm. Ū lâng kóng, "Mô͘-kúi hiòng koâiⁿ ê só͘-chāi siā, siā siōng tiōng-iàu ê pō͘-ūi. "Mô͘-kúi bat hō͘ Iâ-so͘ ê chi̍t ê ha̍k-seng m̄-jīn I.”

Ūi-sím-mih bô chin-chōe lâng ū chhin-chhiūⁿ Lō͘-tek Má-teng (Martin Luther) kap Mô͘-kúi chhiong-thu̍t hiah-nih lī-hāi ê chêng-hêng? In-ūi i chiong Mô͘-kúi ê tōa pún-iâⁿ tē-ge̍k kā iô-tāng. Koh siūⁿ Bún-iân Iok-hān (John Bunyan) só͘ keng-le̍k jōa-tōa ê cheng-chat!

Chi̍t ê lâng siū Sèng-lêng chhiong-móa liáu-āu, chiū beh keng-le̍k tio̍h kap hit ê chhì-thàm-chiá Sat-tàn ke̍k-tōa chhiong-thu̍t. Siōng-tè iông-ún lán siū chhì-thàm, ná chhin-chhiūⁿ po̍k-hong-hō͘ tùi siông-chhiū chhoe-phah chi̍t-iūⁿ. Hō͘ lán ê kun tèng koh-khah chhim. Iā chhin-chhiūⁿ lô͘-hé chiong gân-liāu hang ji̍p-khì tī hûi-khì téng-bīn koh-khah tiâu, hō͘ lán ōe kian-sìn put-î.

Lí éng-oán bōe thang liáu-kái lí lia̍h-tiâu Ki-tok kàu sím-mi̍h thêng-tō͘, ti̍t-kàu Mô͘-kúi chīn-la̍t kā lí khiú ê sî, lí chiah kám-kak tio̍h Ki-tok ê chhiú khan lí tiâu-tiâu-tiâu.

Hui-siông ê thòng-khó͘ pēng m̄ sī tùi hui-siông ê chōe-gia̍t ê chhú-hoa̍t, hoán-tńg sī Siōng-tè te̍k-pia̍t só͘ sù ê khó-giām. Thiⁿ-pē ēng chin-chōe lāi-to lâi bôa, lâi chhiat chho͘-chho͘ ê pó-chio̍h. Ūi tio̍h beh hō͘ I te̍k-pia̍t thiàⁿ-thàng ê sèng-tô͘ ū koh-khah chhàn-lān ê kong-hui, hō͘ in siông-siông kám-siū tio̍h Pē Siōng-tè ēng kang-kū tī in ê sin-chiūⁿ kang-chok. --- R. Leighton

Góa goān-ì kiàn-chèng kóng, góa tī Siōng-tè ê kang-chok-sek siū Siōng-tè ê hé, thûi, chho̍k ê chhau-liān, pí kî-thaⁿ ê lâng khah chōe. Ū-sî góa siūⁿ tû-liáu tī Siōng-tè ê koáiⁿ-á ē, kî-thaⁿ góa kiám ōe ha̍k-si̍p tio̍h sím-mi̍h? Tng góa ê kàu-sek siōng o͘-àm ê sî, góa khòaⁿ liáu siōng chheng-chhó. --- Charles H. Spurgeon


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com