《台语荒漠甘泉（全罗版）》

 | | | 转寄

"Siōng-tè ê ōe"

作者 陈清俊 翻译 2009.01.25

listen

Chiaⁿ ge̍h jī-gō͘ (It ge̍h jī-cha̍p-gō͘ ji̍t)

"Lí ê thûi, Lí ê koáiⁿ, an-ùi góa." (Si-phian 23:4)

Tī goán lāu-pē ê chhù, piah-lô͘ piⁿ ê chi̍t ê tû-á, ū siu-chông goán tau kúi-nā tāi lâng só͘ ēng kè ê koáiⁿ-á. Múi hôe góa tńg-khì kū chhù, lāu-pē kap góa beh chhut-khì sàn-pō͘ ê sî, chiū khui chit ê tû-á, kéng chi̍t ki sek-ha̍p ê koáiⁿ-á tòa chhut-mn̂g. Goán teh kéng ê sî, góa chiū siūⁿ tio̍h "Siōng-tè ê ōe chiū-sī góa ê koáiⁿ."

Chiàn-cheng tiong, goán keng-le̍k chōe-chōe ê hoe-sim sit-chì kap gûi-hiám, "I m̄-kiaⁿ pháiⁿ siau-sit; I ê sim kian-kò͘, óa-khò Iâ-hô-hoa." (Si-phian 112:7) piàn-chòe góa tō͘-kè o͘-àm sî ê chhiú-koáiⁿ.

Goán ê kiáⁿ kè-sin ê sî, siong-sim kàu beh chhùi-khì. "Kui-mî sui-jiân ū thî-khàu, chá-khí sî chiū ū hoaⁿ-hí" (Si-phian 30:5) chiâⁿ-chòe chi-chhî goán ê koáiⁿ.

Ū chi̍t pái in-ūi phòa-pīⁿ, lī-khui chhù chi̍t-nî kú, m̄-chai sī-m̄-sī ōe koh tò-tńg-lâi hoe-ho̍k kang-chok, góa kéng "Iâ-lī-bí 29:11" chòe góa ê koáiⁿ "Iâ-hô-hoa kóng, Góa chai Góa tùi lín só͘ chûn ê ì-sù, sī siúⁿ-sù pêng-an ê ì-sù, m̄-sī kàng chai-ē; beh hō͘ lín bé-kéng ū ǹg-bāng." Chit ki koáiⁿ bô hō͘ góa sit-bāng.

Múi-pái tú-tio̍h gûi-ki, hoâi-gî, iu-lū, lâng ê phòaⁿ-toān í-keng bô lō͘-ēng, góa chiū ēng keng-bûn chòe koáiⁿ, "Lín ê tit-tio̍h kiù chāi-tī oa̍t-tò-tńg kap an-hioh;" (Í-sài-a 30:15) Tī gûi-kip, bô sî-kan khì su-khó, á-sī hêng-tōng ê sî, chiū kéng "óa-khò I ê lâng tek-khak bô tio̍h-kip." (Í-sài-a 28:16) Chit ki koáiⁿ bōe bat gō͘-sū. --- Abbott Benjamin Vaugham, tùi "Hiòng chêng khòaⁿ"

Lō͘-tek Má-teng (Martin Luther) ê bó͘ kóng, "Siōng-tè nā bô hō͘ góa siū khó͘, góa éng-oán bōe bêng-pe̍k Si-phian tiong chōe-chōe keng-bûn ê ì-sù, bōe bêng-pe̍k khùn-kéng sī tùi góa ū hó-chhù, iā bōe liáu-kái lâng ê sim-lêng án-chóaⁿ ūn-chok, iā bōe chai ki-tok-tô͘ eng-kai án-chóaⁿ seng-oa̍h, án-chóaⁿ kang-chok." Siōng-tè ê koáiⁿ chhin-chhiūⁿ sió-ha̍k lāu-su siōng-khò só͘ ēng ê kàu-tek, kí o͘-pang ê jī kà ha̍k-seng ài chù-ì tha̍k. Siāng-khoán Siōng-tè kí-chhut chōe-chōe ū kè-ta̍t ê kong-khò hō͘ lán, nā-bô, lán lóng bōe khì o̍h.

Siōng-tè sù lán koáiⁿ, iā sù lán thûi.
"Lí ê mn̂g-kông sī thih-ê, tâng-ê; Lí ê ji̍t-chí cháiⁿ-iūⁿ, lí ê khùi-la̍t iā beh án-ni." (Sin-bēng-kì 33:25)
Lán chai Siōng-tè nā chhe lán kiâⁿ khi-khu ê lō͘, chiū-ōe hō͘ lán ū chhin-chhiūⁿ tâng, thih hiah ióng ê ôe. I ōe kā lán chong-pī chhiong-hun chiah chhut-hoat. --- Alexander Maclaren

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com