《台语荒漠甘泉（全罗版）》

 | | | 转寄

"Kian-sìn put gî"

作者 陈清俊 翻译 2009.01.04

listen


Chiaⁿ ge̍h chhoe sì. (It ge̍h sì ji̍t)

“Iâ-so͘ kā i kóng, Khì ah, lí ê kiáⁿ oa̍h lah. Hit lâng sìn Iâ-so͘ kā i kóng ê ōe, chiū khì.” (Iok-hān 4:50)

“Kìⁿ-nā lín só͘ kî-tó lâi kiû ê, tio̍h sìn sī í-keng tit-tio̍h, chiū beh kā lín chiâⁿ.” (Má-khó 11:24)

Ká-sú ū chi̍t-chân sū su-iàu choan-sim ê kî-tó, chiū ài kî-tó kàu lí ōe sìn Siōng-tè, lí ōe hoat-chhut bô ké ê o-ló lâi kám-siā Siōng-tè ê tap-èng. Jû-kó Siōng-tè ê tap-èng chi̍t-sî iáu tī tiong-tô͘, iáu bōe sêng-chiū, chhiat-chhiat bô tit têng-sin kiû Siōng-tè tap-èng lí ê kî-kiû, in-ūi che piáu-sī lí bô kàu-gia̍h sìn Siōng-tè. Chit-chióng bô-sìn ê kî-tó m̄-nā bōe pang-chān lí, hoán-tńg sī kiám-chió á-sī siau-bia̍t lí ê sìn-sim. Chit-chióng ê kî-tó tiāⁿ-tio̍h sī chhut-tī giâu-gî á-sī ka-kī ê bōe an-sim. “Ū sìn-gióng ê lâng, lāi-sim sī ū chin-chiàⁿ ê pêng-an.” (Hi-pek-lâi 4:3)

Ūi-sím-mi̍h lâng ōe ū sit-khì sìn-sim ê kî-tó nih? In-ūi chiong chù-ì-tiám hē m̄-tio̍h, hē tī khùn-lân ê só͘-chāi, soah bōe-kì-tit Siōng-tè ê èng-ún lah. “A-peh-la̍h-hán siūⁿ-tio̍h ka-kī ê seng-khu chhin-chhiūⁿ í-keng sí, koh Sat-la̍h ê thai-īn í-keng choa̍t, i ê sìn bô nńg-chiáⁿ; i khòaⁿ Siōng-tè ê èng-ún, iā bô tùi m̄-sìn lâi giâu-gî; sìn chiū ná ióng-kiāⁿ, lâi kui êng-kng Siōng-tè.” (Lô-má 4:19-21) Che sī hō͘ lán ha̍k-si̍p ê bô͘-hoān, chù-sîn tī Siōng-tè ê èng-ún, bô khòaⁿ khoân-kéng ê put-lī. “Tio̍h kéng-séng, tio̍h kî-tó, bián-tit ji̍p tī bê-he̍k.” (Má-thài 26:41) Hi-bōng lán ê kî-tó bōe kiám-chió lán ê sìn-sim, bōe ji̍p tī bê-he̍k, bōe hām-lo̍h tī chhì-thàm ê khoan-thò. ---- C.H.P.

Sìn-gióng, sìn-sim, m̄-sī ēng kám-kak, ēng ba̍k-chiu, ēng lūn-lí ê, chí put-kò siong-sìn Siōng-tè ê ōe. ---- Christmas Evans

Tng sim-lāi hoân-ló, put-an, chiū sit-khì sìn-sim; tng ū chin-chiàⁿ sìn-sim ê sî, hoân-ló, put-an chū-jiân bô khì. ---- George Mueller

Sìn-sim bōe tàng tī sūn-kéng ê sî lâi siōng-chìn. Siōng-tè só͘ èng-ún ê, ū-sî ū chhì-thàm-ê lâi chhì-giām. Chi̍t-ê chúi-siú keng-kè liáu tōa hong-hō͘, i chiū ū sìn-sim tōa siaⁿ kóng, “Tāi-ke ah, lín tio̍h an-sim; in-ūi góa sìn Siōng-tè, tāi-chì chiàu I só͘ kā góa kóng ê.” (Sù-tô͘ Hêng-toān 27:25)
Oân-choân sìn-khò I,
Put-koán, ji̍t-á-mî,
Lêng, hûn, thé, á-sī siⁿ-á-sí,
I ēng tì-hūi, chû-ài koàn-kò͘ lí.
Choân-jiân o͘-àm tiong hoat-hiān chi̍t-tiám-tiám-á kng ê chhiⁿ
Iā sī I ê sèng chí-ì.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com