《台语荒漠甘泉（全罗版）》

 | | | 转寄

Khòa-lū á an-chēng

作者 Tân Chheng-chùn 2006.10.08

listen

Cha̍p ge̍h poeh ji̍t

"It-khài bo̍h-tit khòa-lū." (Hui-li̍p-pí 4:6)

Bōe chió ki-tok-tô͘ tī ut-chut, khòa-lū ê chōng-thāi, ūi-tio̍h seng-oa̍h hoân-ló tang hoân-ló sai. Tī seng-oa̍h bô-êng tiong jû-hô ū sûn-choân pêng-an ê pì-koat sī chin iàu-kín ê sū. Iu-lū tùi lán ū sím-mi̍h lō͘-ēng? Chiông-lâi m̄-bat ū lâng in-ūi iu-lū hō͘ i khah kiān-khong, á-sī pang-chān lâng oân-sêng Siōng-tè ê chí-ì, á-sī pò lâng thoat-lī ut-chut, iu-lū ê hong-hoat. Hoân-ló chí-ū ōe hō͘ lâng seng-oa̍h hāu-lu̍t kàng-kē, phò-hoāi pún ū bí-boán ê jîn-seng. Lán ê Chú choa̍t-tùi kìm-chí lán ê ut-chut, iu-lū, hoân-cha̍p, put-an, I kóng, "só͘-í bo̍h-tit khòa-lū kóng beh chia̍h sím-mi̍h? beh lim sím-mi̍h? á-sī beh chhēng sím-mi̍h?" (Má-thài 6:31) I ê ì-sù kóng m̄-sī ài lán bô ūi-tio̍h chiong-lâi kè-ōe, phah-sǹg, sī kóng m̄-thang ūi-tio̍h chiah ê sū hoân-ló.

Lâng nā khòaⁿ lí bīn jiâu-jiâu iu-kat-kat, kóng-ōe ê siaⁿ-tiāu nńg-sô-sô, siau-ke̍k ê thāi-tō͘, sim-lāi khoat-hoa̍t hí-lo̍k, chiū chai lí siông-siông tī iu-lū hoân-ló tiong. Só͘-í tio̍h chiong sìⁿ-miā kau-thok Siōng-tè, ló͘-le̍k hiòng koâiⁿ peh, kàu ū chi̍t ê koâiⁿ-tō͘, lí beh khòaⁿ-kìⁿ hûn lóng tī lí ê ē-bīn. --- Darlow Sargeant
Siông-siông hoân-ló, kiaⁿ-hiâⁿ, sū-sū hoâi-gî, lâng-lâng lóng bōe siong-sìn, chiū sī jio̍k-chiá ê piáu-hiān. Án-ni, kiám ōe hō͘ lí sím-mi̍h hó-chhù? Kiám m̄-sī ōe chó͘-tòng tio̍h lí ê hêng-tōng? Hóng-gāi tio̍h chòe-chhut tì-hūi ê koat-tēng? Lán pún thang khò sìn-sim phû khí-lâi, khiok in-ūi tī hoân-ló cheng-chat tiong teh tîm lo̍h-khì.

Ah! An-chēng sī jōa-tōa ê un-tián! "Lín tio̍h tiāⁿ-tiāⁿ, tio̍h chai Góa sī Siōng-tè;" (Si-phian 46:10) "Í-sek-lia̍t ê Sèng ê" (Si-phian 89:18) ōe pó-hō͘ chín-kiù i ê chú-bîn. Lán thang khéng-tēng koâiⁿ-soaⁿ ōe sóa-khui, I ê ōe éng bōe hòe-khì. I ta̍t-tit lán oân-choân ê sìn-nāi. Só͘-í, lâi ah, góa ê lêng hôe kàu I ê pêng-an, tī Chú Iâ-so͘ ê tiⁿ-bi̍t hoâi-phō tiong an-hioh.

Tng lí an-chēng,
Lāi-sim ê lêng beh chhiong-móa hô-pêng.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw