《《一位台湾女信徒ê自述》》

 | | | 转寄

第一章 6）养女ê风俗kah小妹月美

作者 吴月娥, 台译：Lîm Chùn-io̍k 2020.04.26

当时tī台湾，有一种风俗大家lóng知，to̍h是婴á出世了后，若是cha-bó͘ gín-á tio̍h ē随时pun人。阮老母是一个温柔顺良ê好sim-pū，m̄-koh，她无考虑ta-ke ê想法，无想beh kā头胎ê cha-bó͘ kiáⁿ pun人；阮老母有teh考虑，beh kā我留tī厝里养饲。我三岁ê时，老母第二pái有娠。她暝日私下祈祷koh来ê是cha-po͘ gín-á，m̄-koh，iáu是cha-bó͘ gín-á。Chit-ê cha-bó͘ kiáⁿ月美五个月大ê有一工，我ê三叔吴金枝ê bó͘ chhōa她后头厝ê老母来；三婶mā是十二岁ê时to̍h pun hō͘ 人做养女，m̄-koh我婴á ê时差不多lóng是她teh kā我照顾。

「阮sim-pū ê婴á最近死去，hō͘ 她非常艰苦心，所以想beh pun一个sim-pū-á....」

阮老母听tio̍h ê时，to̍h想beh kā月美pun hō͘ 她。Hit当时，beh抚养两个cha-bó͘ kiáⁿ，对父母来讲真不利，所以老母to̍h赶紧kā ta-ke kah全家ê人报告，结果ta̍k人lóng无异议；hit工，阮老母kā月美ê衫裤款款leh，to̍h随时hō͘ 她由养母āiⁿ走。

阮老母hit工暗时无法度困落眠，她思念她ê婴á，哭kui暝ê款。Hit时，月美已经五个月大ā，若是她无食母奶，koh惊chheⁿ份，to̍h ē啼哭，若án-ne，kiám-chhái明á载to̍h ē hông chhōa tńg来；若是发生chit种状况ê时，阮老母to̍h有理由tī厝里养饲她。她心内án-ne想来想去，m̄-koh，月美无hông送tńg来。出世to̍h注定做养女ê月美，tùi五个月大ê婴á时起，to̍h kah父母分离，由tī田庄收养她ê父母抚养长大。

月美ê养父母是田庄ê做sit人，in无ka-kī ê土地，生活mā m̄是真富裕。她七岁hit年，ta̍k工一定tio̍h行约一点钟ê路chiah ē-tàng去到公学校读册。她ê养父母tòa tī一个叫做白石脚ê所在，m̄是头围庄，是属tī隔壁庄ê礁溪，所以月美去读礁溪公学校。月美八岁，我十一岁hit年，阮阿公tī礁溪车头前买一间运送店，阿公koh命令阮老父去管理hit间运送店，所以阮全家伙mā搬去tòa tī hia。Hit间运送店是tī白石脚kah礁溪公学校ê中间，所以，月美读公学校二年ê时，经常来tòa亲生父母ê厝，tùi hia去学校读册。

M̄-koh，婴á时代to̍h远离亲生父母去别位生活ê月美，有gín-á ê自卑感，无亲像做阿姊ê我án-ne，无忧无虑teh自由自在行踏。M̄-koh，我kah意我ê小妹，她mā是kah我siōng相好，她tiāⁿ-tiāⁿ问我讲：「阿母为啥物kan-taⁿ kā我pun人？阿姊、小弟光辉kah小妹lóng留tī厝里.…」Τio̍h算她长大ā，甚至年纪老ā，chit种不平kah不满lóng无tùi她ê头壳内消失。

Tī hit-ê时代，人ê生活普遍真贫困，思想mā真封建，cha-po͘ 人一定tio̍h tī 20岁左右「成家立业」，to̍h是娶bó͘ 来继承家庭。M̄-koh，成年了后beh娶bó͘ ê费用hiah-ni̍h-á koân，普通人负担bē起。所以，siōng理想ê方法to̍h是采用chit种养女ê方式。Sim-pū-á自细汉to̍h tòa做伙，ē-tàng帮赞家庭ê工作，到十七、八岁ê时，养父母tī厝里办一个简单ê宴客，邀请亲chiâⁿ来，对众人宣布讲：「今á日是in两人ê洞房花烛夜（结婚）。」，án-ne，in to̍h成做夫妇。这意思是讲，我ê kiáⁿ一生m̄免成做罗汉脚（无bó͘ ê流浪者）ā。

Tī阮tau，我ê三婶以外，五婶mā是养女，她iáu婴á ê时to̍h hông pun来饲。阮阿妈to̍h kā出世无到一个月ê长女pun hō͘人，过无gōa久，她to̍h tùi附近一个庄头pun一个cha-bó͘ 婴á来饲；chit-ê婴á mā是长女。阮阿妈tú-tú生产了，所以ē-tàng用ka-kī ê奶来饲chit-ê sim-pū-á；chit-ê婴á后来成做五男金福ê bó͘，kui个家庭就án-ne来接纳她。Hit当时ê风俗，一般并无hō͘ 养女去接受公学校ê教育；我ê两个阿婶lóng无读过公学校，三婶照顾我，五婶照顾阮小弟光辉。Chit两个阿婶lóng kah我真亲密，五婶chit-má iáu活leh，tòa tī洛杉矶。

月美公学校六年ê暑假，她ê养父tùi一个农民ê厝，用li-á-kah（拖车）kā米运搬来到车头前ê仓库ê时，她tī车后帮赞老父tàu sak。台湾ê热天真炎热，thǹg赤脚，戴笠á，tī peh崎ê路里出力sak车á，对一个十二岁ê gín-á来讲，实在有khah可怜。Chit-ê仓库是阮老父ê运送店ê仓库，所以，li-á-kah tio̍h经过阮tau ê门口。后来，月美kā我讲：
「当我对厝内lió一下ê时，我看tio̍h阿姊当teh吹电风读册，真凉爽ê款。我目屎teh流，对阿姊充满怨恨kah欣羡。」

月美完成公学校六年制课程ê一年后，宜兰郡开设一间高等女学校。老父kā她讲：「宜兰ē-tàng坐火车通学，m̄免亲像月娥去淡水，to̍h ē-tàng读册，而且无需要tòa宿舍，所以你去读兰阳高女to̍h好。」Chit笔费用当然mā是由阮老父支付。M̄-koh，月美讲：「Chit-má宜兰病院当teh招募护士kah助产士，若是入去to̍h ē-tàng领薪水，thang帮赞收养我ê贫困父母。」她就án-ne成做宜兰病院ê护士。Hit当时她十三岁，阮老母为月美准备新衫裤kah棉被。

月美十八岁ê时，阮老母因为tī准备节日ê办桌ê时，去hō͘ chìⁿ天妇罗（てんぶら）ê油烫伤kah真严重，所以被送去宜兰病院。Hit当时，仝一个房间ê女士是头围庄真好额ê林家ê夫人。月美有闲ê时，to̍h来chhōe阿母讲话。十八岁ê月美皮肤白，穿护理服真sù配，讲话声音koh稳当，看起来to̍h是一个优雅谦虚ê cha-bó͘ gín-á。林家ê夫人真kah意月美，讲想beh ài她来做ka-kī独生kiáⁿ ê bó͘；伊18岁，iáu teh读宜兰农业学校。当chiah ê话渐渐浮现ê时，月美终其尾准备beh结婚ā。

月美ê未来翁婿林再万先生一直梦想beh做医生，m̄-koh，tī宜兰农业学校读册，根本都无法度通过医学院ê考试，所以伊真想beh转去东京读高中。Hit年，to̍h是1942年ê暑假，我tùi留学ê东京tńg来度假，tī我决定九月beh koh去东京ê时，伊就kah我做伙去。

阮阿妈tī我四岁ê时koh生一个cha-bó͘ kiáⁿ，因为是阮老父ê小妹，所以是阮阿姑，chit-ê阿姑mā beh去东京读助产士学校；所以我to̍h tī九月份kah chit两人做伙去东京。阮租两间公寓，我开始一段煮饭hō͘ 大家做伙食ê生活。再万是阮小妹ê未来翁婿，所以，我像小弟án-ne照顾伊。再万是一位冷静koh认真ê少年人，伊tī东京ê私立中学phah拚读册。

1945年八月，战争结束ê时，留学生ē-tàng tńg来台湾。再万比我紧一步tńg来到台湾，kah月美结婚。伊进入台大医学院，继续未完成ê学业。月美做林家ê sim-pū-á，受tio̍h翁婿ê信任，mā受tio̍h所有ê人ê喜爱；她养育二个kiáⁿ kah五个cha-bó͘ kiáⁿ，teh过幸福ê生活。