《《一位台湾女信徒ê自述》》

 | | | 转寄

第一章 4）阿公吴万成kah基督教信仰

作者 吴月娥, 台译：Lîm Chùn-io̍k 2020.04.12

阮阿公吴万成tī 1881年出世tī宜兰郡头围庄ê sàn-chhiah家庭，排行次男，tī伊九岁，阿兄吴万添11岁ê时，双亲过往。

当时tī台湾有teh流行pun sim-pū-á thang hō͘ ka-kī ê kiáⁿ做bó͘ ê风俗。阮阿祖有teh考虑伊两个kiáⁿ ê未来，所以tī伊往生chìn前有pun两个sim-pū-á；一个是万添ê牵手，名叫游阿凤；一个是万成ê牵手，名叫李阿泉。In kan-taⁿ五、六岁ê时，to̍h被收养入门来做细kiáⁿ ê sim-pū-á。因为父母连续死亡，所以chit两个kiáⁿ一定tio̍h直到in长大，而且有能力饲牵手ê时，chiah tńg来到in故乡ê厝。 阿兄万添11岁ê时，去tī街á ê一间杂货á店工作，得到一kóa米粮来养饲伊ê小弟。阿兄疼伊ê小弟，小弟尊敬伊ê阿兄。Chit种美好ê兄弟疼支持阮kui个家庭。

万成16岁hit年，发生一项事件；伊hō͘ 土匪掠去山顶。当时中国清朝ê台湾ē-sái讲是无政府状态。被勒索，要求五十日币赎金ê阿兄万添，为tio̍h伊ê小弟，四界走chông，m̄-koh却无法度khêng到五十日币。Tú-tio̍h麻烦ê万添kā杂货á店ê头家拜托，讲：「我kā你工作两年，免薪水，请借我五十日币。」就án-ne，伊真无简单chiah chông-tio̍h赎金。Hông掠去土匪窟ê万成，伊双手ê大头bú kah双脚ê大头bú hông缚tiâu-.leh，吊tī天pông顶面，实在有够恐怖。佳哉tī in阿兄ê拚命努力之下，伊chiah ē-tàng安全得tio̍h释放。

后来，万成mā去做肉店ê gín-á工，tī 20岁ê时成做鱼贩á。当万添mā开始tī市场卖猪肉ê时，in ê生活差不多稳定ā，两人chiah kā故乡ê阿凤kah阿泉叫来，tī hit年ê农历新年结婚。Hit时，游阿凤17岁，李阿泉16岁。阿泉tī隔tńg年生阮老父，m̄-koh，阿凤有娠无chē，kan-taⁿ tī五、六年后生一个cha-bó͘ kiáⁿ。后来，阿泉所生ê kiáⁿ中间ê两个，tī户籍登记做吴万添ê大kiáⁿ kah二kiáⁿ。

吴万成ê声音真súi，tī娱乐场所真少ê hit当时，若有传统ê汉乐、铜锣、大鼓、品á kah弦á合奏所谓ê汉乐比赛，伊一定ē去参加，而且tī街á游行。乐队中间有一个声音真好ê人，tī游行中一直唱歌，hit-ê唱歌ê人to̍h是阮阿公吴万成。伊身材koân大，生做好看，kiám-chhái有真chē cha-bó͘ gín-á teh意爱，m̄-koh，阮阿公是一个圣人君子，一生kan-taⁿ爱m̄是美人ê阿妈，而且创建一个有十个kiáⁿ儿ê家庭。

Hit年，万成tú chiah 30岁。伊做鱼贩á经过头围公学校附近ê时，看tio̍h榕树ê树荫下聚集真chē人，tī中心ê所在，有一个红头毛ê外国人teh phah拚讲话；万成mā因为好奇心行óa来。

「亲爱ê朋友，今á日阮带来一个好消息hō͘ lín；我来kā lín绍介一位创造天kah地，而且创造咱人类ê上帝。上帝讲：『阮照阮ê形像创作人类，来治理海洋中ê鱼、天顶ê飞鸟、cheng-seⁿ、地chiūⁿ所有ê野兽，以及地chiūⁿ所有ê生物。』上帝照ka-kī ê形像创造人，to̍h是照上帝ê形像创造男kah女，koh祝福in讲：『Tio̍h生湠真chē，充满tī地上，来赢过一切，mā tio̍h治理海里ê鱼、天顶ê鸟kah地上一切会振动ê活物。』上帝用土粉，照上帝ê灵造人ê形像，人ē-tàng有chiah-ê灵魂，而且ē-tàng控制任何动物。上帝to̍h是疼，他chiah-ni̍h疼世间人，甚至kā他ê独生kiáⁿ赐hō͘ 世间人，这是因为所有信他ê人lóng ē得永生，bē灭亡。」 吴万成听tio̍h伊从来m̄-bat听讲过ê「创造咱人类ê上帝」chit句话，kah-ná去hō͘ 雷公扛tio̍h，大惊一tiô。咱台湾人到taⁿ为止一直teh祭拜ê神灵，kám m̄是hiah-ê以前ê伟人？....Ǹg望听koh khah详细，soah会了后，万成决定beh求教。

Hit-ê红头毛ê外国人是一位牧师，叫做马偕博士；伊是1871年tùi加拿大一个人来海外传教，tī 1872年tùi打狗（高雄）坐船到台湾北部ê淡水chiūⁿ陆，而且用hia做基点开始传福音，后来koh tī淡水建立神学校、中学kah女学校。淡水女学校mā是我ê母校，台湾前总统李登辉先生mā是淡水中学出身。马偕牧师mā tī淡水开设一间病院号做偕医馆；chit-má tī台北市ê马偕病院是teh记念马偕牧师。马偕牧师致力tī台湾ê基督教传教，koh kah一位五股坑ê cha-bó͘ gín-á张聪明结婚。我teh读淡水女学院ê时，淡水中学ê校长to̍h是马偕博士ê大kiáⁿ偕睿廉。

阮阿公一定是充满上帝ê圣神，受tio̍h in ê教示感动，所以就án-ne进入信仰ê追求。Tio̍h算受tio̍h伊siōng敬疼ê阿兄反对，伊chit种宗教信仰mā是bē摇choah；准讲生涯中tio̍h kah四kho͘ 围ê人作战，伊mā是一直尽力做上帝ê忠实奴仆。

万成37岁ê时，伊kah阿兄万添联手tī头围庄车头前购买土地，而且起造三栋厝宅。万添koh tī khah对面ê所在买一块koh khah大ê土地，而且开设一间建材商店。兄弟两人就án-ne分开tòa；三栋厝宅中间ê两栋属tī万成，一栋属tī伊ê阿兄万添。万成kā中央hit栋厝宅提供做头围基督教ê礼拜堂；我tùi三、四岁to̍h开始读ê主日学，to̍h是tī chit间礼拜堂。 进入基督教信仰chìn前，万成为伊ê kiáⁿ号名ê时，因为ǹg望in将来ē-tàng成做一个好额人，所以大kiáⁿ号做来发，二kiáⁿ号做金隆，三kiáⁿ号做金枝，四kiáⁿ号做金水，五kiáⁿ号做金福；长女号做金鸾(出世后无gōa久to̍h hông做养女，m̄-koh因为养父母真sàn-chhiah，致使tī她14岁ê时beh kā她koh卖hō͘ 别人，所以，阮阿公阿妈koh kā她买tńg来）。六kiáⁿ号做天赐，伊kan-taⁿ比我大一岁，m̄-koh，伊是阮阿叔。Hit时，阮阿公已经入教，伊想讲kiáⁿ儿是上帝赏赐ê礼物，所以chiah kā伊号做天赐；七kiáⁿ mā号做天来。续落来是一个cha-bó͘ kiáⁿ，号做仁爱，想beh hō͘ 她成做一个有温柔koh有疼心ê cha-bó͘ 人。Siōng尾ê屘á-kiáⁿ号做天宝。天赐kah天宝后来成做牧师，kā in ê一生奉献hō͘ 上帝，tī各地建立教会，为上帝ê教示teh奋斗。

吴万成是头围基督教会ê头一任长老，伊对福音布道非常热心，邀请gâu讲道理ê牧师来开布道会。Tùi阮细汉ê时开始，阮to̍h跟tòe teh phah tùi台北买tńg来ê大鼓ê阿公ê kha脊后，ná se̍h街ná大声hoah讲：「来信耶稣，来信耶稣，chit-má来信耶稣，chit-má来信耶稣，chit-má来信耶稣。」，招人来参加布道会。 阮阿公是一位模范基督徒，伊无pok薰，kan-taⁿ tī暗时有tang时á ē tī厝里lim淡薄á酒，从来m̄-bat醉过。伊ê个性冷静，我m̄-bat看过伊面红kòng-kòng ê受气。颠倒是阮阿妈真ài受气，有时ē糟躂她ê sim-pūkah阿公。M̄-koh，阿公从来m̄-bat kah她对chhiâng，mā bē恬恬tùi阿妈ê面前雄狂走开。

阮阿公有一个公认ê好声音，亲像前述，伊是台湾乐团ê歌手，m̄-koh，成做基督徒了后to̍h辞掉hit-ê职务。虽然人ē-tàng tī四、五间厝hit pêng to̍h听tio̍h伊ta̍k礼拜tī圣歌队唱歌ê歌声，m̄-koh tī伊kah人交谈ê时，伊ê声音却确实真温和。伊受tio̍h头围庄人人ê尊敬，所以bat当选做头围庄第七区ê保正（区长），mā bat担任庄ê调解委员。

阮阿公七十岁ê时患tio̍h大肠癌，到台北接受手术。因为癌细胞已经扩散，医生甚至无法度kā开刀ê孔嘴thīⁿ好势，医生讲：「你已经chhun无三工ê活命ā，tio̍h紧办退院。」Τńg到厝ê时，阮翁嘉代真轻手kā伊ê孔嘴thīⁿ合，koh ta̍k工lóng真注意kā伊治疗。Tī阿公本身坚强ê宗教信仰ê帮赞之下，伊渐渐康复，而且体重增加，ē-tàng做ka-kī ê tāi-chì，甚至kha脊phiaⁿ ē-tàng phāiⁿ一百斤ê白米。伊kah-ná奇迹康复了后，tī续落来ê五年中间，全力投入各地去传福音，欢欢喜喜teh过日子。