《《一位台湾女信徒ê自述》》

 | | | 转寄

第三章_23）李登辉先生一家来访

作者 吴月娥, 台译：Lîm Chùn-io̍k 2021.05.16

有一工，一个妇人chhōa一个九岁ê chabó͘ gín’á来病院，阮翁诊断她是得tio̍h感冒。完成治疗，beh离开诊疗室ê时，hit’ê妇人看tio̍h齿科治疗室，to̍h讲：「后日，我chhōa阮kiáⁿ来，chiah请你kā伊检查一下á嘴齿。」Chit位ná亲像日本夫人hiahnih有礼貌ê女士，我听她讲她有一个十一岁ê chapo͘ gín’á kah两个chabó͘ kiáⁿ。隔tńg工，chit位妇人chhōa in kiáⁿ koh来病院，讲in chabó͘ kiáⁿ ê病情有khah好势，她想beh koh再the̍h一工份ê药á。讲soah，她看in kiáⁿ，用真优雅ê语气讲：「Chit’ê gín’á若是食冷á是食烧ê物件，to̍h讲伊嘴齿ē疼。请你kā伊检查一下。」Hit’ê gín’á坐起lih治疗椅了后，我问讲：「你叫啥物名？」伊真有元气回答讲：「李宪文，十一岁，tòa tī民生东路226巷。」我kā伊检查，结果是下排倒pêng ê后chan蛀齿；chit齿嘴齿是六岁ê时发ê永久性嘴齿，需要治疗；到第三pái治疗ê时，to̍h kā它补好势。

Tī治疗ê期间，我kah chit位曾文惠夫人有各方面ê交谈；她是台北第三高等女学校ê毕业生，in翁李登辉先生是农复会ê职员。她真有气质koh真明理，阮随时to̍h讲话真投机；阮无koh再是患者kah医生ê关系，却开始变成朋友ê交陪。

一段时间了后，她chhōa身体koh样ê翁婿来看病。李登辉博士bat去东京留学，所以阮to̍h谈起tī东京ê共同记忆；伊kantaⁿ比阮翁少三岁，所以感觉kahná真熟sāi。Hit时，头一pái ê台北市长选举当teh进行，高玉树kah周百链两人是候选人。候选人ê演讲tī台北市四界teh举行，阮翁kah李登辉先生时常相招去听暗时ê演讲会。In通常ē约tī九点钟做伙去，m̄koh，阮翁患者chē，tiāⁿtiāⁿ bē赴；tī chit种情形下，李先生有时tio̍h tī二楼听鸿玉弹钢琴。

后来我知影李登辉先生是淡水中学ê毕业生，而且kah我ê小弟吴光辉tī宿舍tòa仝房。我mā是淡水高女ê毕业生，若是阮hit时to̍h相bat，chitmákiámchhái ē有koh khah chē共同记忆ê话题。因为阮是李先生ê厝边，所以后来tiāⁿtiāⁿ ài去往诊。无gōa久，夫人kā我讲李先生已经去美国留学，她mā最近beh去美国kah伊会合。

李登辉先生ê tāichì暂时按下，tī chia先来讲khah以后ê tāichì。 1972年，我ê chabó͘ kiáⁿ鸿玉beh kah王旭昭举行婚礼，我to̍h去美国。He是一个四界lóng真súi koh清气ê国家，我kui个人hō͘ 她迷去；结果，四、五年后，阮全家移民到美国，tī纽约定居。

阮就ánne无koh有机会kah李登辉先生厝里ê人见面，m̄koh tī美国ê时，当我听讲李先生当选台北市长ê时，我起初感觉是不可思议，m̄koh阮翁随时写一封祝贺ê phoe hō͘ 伊，李市长mā有回函hō͘ 阮。当阮全家当teh欢喜，koh听讲伊被任命做台湾省主席ê时，阮koh一pái感觉大欢喜。有一工，纽约ê《世界日报》刊登一篇有关「李登辉省主席访问纽约」ê记事，讲伊beh tī唐人街ê第一酒店，kah纽约ê华侨举行座谈。Hit时，阮翁tī一间日本病院（静冈县御殿场ê骏东第一病院）工作，bētàng去参加，所以我to̍h chhōa tī Flushing外科病院teh培训ê志靖kah simpū婉容去见省主席。阮去到第一酒店，m̄koh因为当teh餐宴，阮soah无法度入去内底，所以阮to̍h tī外面等餐会结束。当阮tī门口teh se̍h来se̍h去ê时，附近出现一对青年男女，而且hit’ê女ê手里the̍h一包物件。「Khah sèjī leh，kám准备好势à？」In ê chit句话hō͘我感觉不安；in kám ē是台湾独立运动人士？Chìn前，独立运动人士tī蒋经国先生来到纽约ê时，bah引起问题。

Τī酒店内面ê李登辉先生kahná是发生啥物tāichì，因为忽然tī阮头前有五台真有派头ê乌头á车驶óa来，一阵身穿燕尾服koh汉草真好ê chapo͘人大脚步行，坐入去车内；李先生mā tī hit中间。阮chông óa去，m̄koh伊已经入去车内，车就ánne驶离开去。阮bē明白in ná ē hiahnih仓pōng离开；若是阮有机会tútio̍h李先生，to̍h ētàng kā伊问一下。李登辉先生chitmá是台湾ê总统，我想，beh kah伊见面ê机会是jú困难ā。 李登辉先生被任命做副总统来协助蒋经国总统；有人讲伊是蒋经国tī山球（golf）场ê好球友，chiah ē受提拔。M̄koh，蒋经国往生了后，伊升任总统，这是伊ê好字运，mā是天注定ê。

李登辉先生热爱台湾人民，为台湾付出真大ê努力；台湾人民mā疼伊。自国民党统治台湾以来to̍h有ê戒严法已经tī伊ê任内废除；tī废除chìn前，m̄知有gōa chē台湾人无辜被关入去火烧岛ê政治监狱，甚至被thâi。这以外，久长ê一党政治已经消失，政府mā许可组织新政党。今á日；台湾有国民党、民主进步党kah新党。1996年三月，台湾mā有实现头一pái ê全民总统选举，李登辉先生得tio̍h绝大多数ê选票，当选台湾四百年来头一位民选ê总统。我想beh hoah出：「李登辉总统，万岁！」

伊是一个热心ê基督徒；请谦卑仰望上帝ê慈爱kah真理，做上帝ê忠实奴仆，来治理国家。