《《一位台湾女信徒ê自述》》

 | | | 转寄

第三章_17）鸿玉转学去台北ê中山国小

作者 吴月娥, 台译：Lîm Chùn-io̍k 2021.04.25

小学五年级ê鸿玉ta̍k礼拜六tio̍h去台北上钢琴课，致使拜六一直tio̍h ài kā学校请假，所以，阮考虑beh kā她转学去台北。有一工，当我去台北ê时，我kah朋友林明爵小姐参详，她讲：「我ê chabó͘ kiáⁿ和惠一向lóng是kakī一个人，若是lín chabó͘ kiáⁿ鸿玉转学，来tòa阮tau，to̍h ē khah闹热，和惠ē真欢喜。」和惠hit时是台北第一高女ê四年级，大鸿玉四岁。明爵小姐是tùi宜兰市去读淡水高女，是koân我两届ê前辈。她ê家族mā是基督教徒，她ê老父是宜兰教会ê长老，阿妈kah老母mā lóng是真热心ê教徒。

明爵女士tùi淡水高女毕业了后，进入东京女子药学专科学校，tī东京ê时，我有koh kah她做伙，阮lóng是台湾青年会ê成员，时常做伙活动。她tī热烈ê恋爱了后，kah tī青年会熟sāi ê林和引先生结婚。1943年左右，和惠tī东京出世；了后无gōa久，in to̍h tńg来台湾，林先生就任台北基督教青年会ê总干事。后来伊创立东元电机公司，m̄koh五十岁ê时to̍h因为破病来过往；伊是宗教界kah商业界ê大人物，伊ê过往hō͘ 人真m̄甘。和惠小姐tùi东京ê音乐学校毕业了后tńg来台湾，担任台湾师范大学ê音乐教授到taⁿ。Chitmá台湾东元电机公司ê董事长黄茂雄先生是和惠女士ê翁婿。1993年，鸿玉tùi美国tńg来台湾，tī台北市ê国家音乐厅举办独奏会ê时，mā得tio̍h和惠女士ê热心协助。

感谢明爵女士ê好意，阮决定kā鸿玉托她看顾。其他ài办ê是学校ê tāichì；郭马西牧师娘chhōa我去拜访马偕病院ê前院长吕革令医师ê夫人石邦雪女士，她koh chhōa阮去拜访台北中山国民学校ê林正洲校长。林校长愿意接受鸿玉ê转学，koh决定hō͘ 她加入五年级吴瑞霞老师hit班。邦雪女士讲，鸿玉tú来chit间学校，一定ē有无方便ê所在，所以她to̍h案内阮去tī第三分局对面ê中山北路开业ê邱新医师夫妇in tau。邱医师夫人to̍h是邦雪女士ê小妹，她ê第二chabó͘ kiáⁿ邱雅惠小姐mā是吴瑞霞老师ê学生。