《台语chit条路》

 | | | 转寄

《台语chit条路》--建立台语文ê文学批评―林央敏访问(十二）

作者 谢瑞华 2009.01.04

林：做che ê时m̄是干taⁿ做一项物件然后传播出去niâ，有传播着、无传播着拢m̄知影，算做咱道是面对面落去传播。另外我感觉有一点真重要，台文，尤其是文学部分爱建立文学批评；台文ê文学批评。你若认为你个人做文学创作尚介适合，你道去做创作，另外chiah koh来做推广。a你若对正统台湾文学有兴趣，m̄-koh创作ê能力khah bái，你会使行台语文学批评，ùi理论chit部分来行，建立咱家治台语文学ê文学批评。咱若beh ǹg望目前teh写批评ê文学批评家来研究台语文学是chiok困难＝e，伊若有teh接触ê时chūn是kā咱看bōe起，所以咱家治着来做。我个人是有做寡，但是我chit生无法度做正式ê学者，做文学家道好。che oan-ná爱按呢，咱台语文学chiah会加khah有力量。评论ê时chun7khah m̄免hit种艺术天份，有智慧、有眼光、有批评ê道行道会冻。写好写bái he拢另外一回事。像我若teh写台湾ê台语文学kap中文文学ê比较ê时，我发现几十冬ê中文文学艺术性已经无赢过咱台语文学ê艺术性，但是咱一定爱证明hō͘人看，诗ê部分无输＝a lah，因为khah chē人写、khah短、艺术性khah好照顾着，小说、散文是iah koh输人thiám-thiám。che是创作部分爱加强＝e，批评ê部分ma7chiok需要ê。现步郑良伟、洪惟仁叫in做文学批评in无法度，郑良伟对文学ê了解，我感觉koh比洪惟仁khah浅，洪惟仁会冻做解说、分析chia ê khang-khòe，文学批评kán-ná khah做bōe来，郑良伟干taⁿ会冻做语言kap研究kap推广，文学批评稻khah无法度。beh做文学批评除了读文学作品以外，mā爱有寡美学眼光，文学kap非文学chia ê理论mā爱知，所以讲在座各位，若有人感觉beh写台文，但是写ê台文khah m̄是文学性，文学性＝e khah无法度，你道来写理论性＝e，按呢来kā发扬。

用家治尚介切身ê语言来写绝对是bōe bái lah！

凰：翻译咧？

林：若beh翻中文作品，翻译中国人ê作品做台语，本地ê作家咱爱逼伊、鼓励伊改用台文写，我ê原则是按呢，beh翻伊ê作品mā无要紧，道是尽量鼓励伊用台文写，伊ê中文诗、中文小说既然写了chiâⁿ好，伊若用尚介切身ê语言来写也绝对bōe bái＝e lah！初期准做bōe使，像我无认为我ê台文作品输我ê中文作品。另外，翻译西洋人、外国作品oan-ná有需要。

江：你主要teh讲＝e是西洋作品。

凰：khah健康性＝e。

林：翻西洋ê作品我无啥会晓，但是我mā kā试看mài 咧！bat翻过四首英国诗kap美国诗，翻kah chiok艰苦＝e，无啥会晓。

用台语思考是写作介大ê方便，因为台语ê音域chiok阔、调khah chē，声调kap调配合起来加真阔lah！所以译音beh译hō͘准比中文容易… (阮ê访问，tī师母热情招呼阮留落来食暗ê声音中结束。)