《台湾人e5先觉―黄彰辉传》

 | | | 转寄

黄彰辉牧师言录

作者 张瑞雄 2009.05.24

黄彰辉牧师ê一生是奔走、旅行、协议、演讲等等，连续不断ê废寝忘食，正如伊tī高等学校时代，一加入脚球团队，就成做队内tī球赛时ê动力中心，带hō͘观众无间断ê『ah！哗！赞！』等等叫好欢呼。为tio̍h beh充实家己，伊不断『开夜车』读册，准备伊ê讲章kap报告。伊ê前瞻、见解kap灵感，是非常丰富。伊先是无写作ê时间，mā无旅行ê同伴kā伊ê语言、思想随时记录落来。所以伊kan-tāⁿ留落来短篇ê文章kap神学教育基金会主任干事时期ê通信文件kap年度报告。Tùi伊ê职位退休了后，犹原依伊好动ê性情，无惜替台湾ê民主运动phah-piàⁿ，到伊接受了朋友kap后辈ê苦劝，取笔写回忆录ê时，时间siuⁿ短促，bē-sái写落来伊离开台南了后ê行动、言语ê回忆。因为tùi伊上了世界ê舞台以后，伊ê行踪遍满世界，听众无像伊tī台南神学院时代，学生听众集中固定，继续注意听。就是tī神学院就学期间，笔者听到伊ê语言，现在作一个回忆而且记录落来kap读者分享。

1. 黄牧师tī课堂上用过ê引用语句，虽然伊无为学生写落来in ê来源，有下面ê：
『鸟之将死也其鸣矣哀，人之将死也其言矣善。』 『海枯将见底，人死不知心。』 以上两节是关于人心ê难测kap求善ê结局，真有ná诗篇第八篇ê tùi体念人ê奥秘ê感叹kap共鸣有帮赞。

『非连续ê连续，连续ê非连续。』黄牧师对新约kap旧约ê关系、基督kap文化kap历史ê关连ê说明，有独到ê所在。真有趣味ê，就是tī伊卸任神学教育基金会职务ê主任报告内底，mā使用chit句，以说明神学教育基金会kap神学教育辅导会之间ê关系，mā是亲像『非连续ê连续』ê关系。

『不即不离』ê关系。伊用这言辞解释人ê二元性，犹如人心kap其待物ê关系。

黄牧师引用Lord Acton有名ê言辞『All Power corrupts, absolute power corrupts absolutely. 』作基督是政治kap历史ê主ê伦理论讲。希特勒，ia̍h-sī当时君临台湾ê蒋介石，lóng是将权力绝对化ê实例。伊ê述讲是khah神学ê，koh m̄直接点名讲kap某某政治家ê名字。（回忆录p.73）

『Where there is life there is hope. Where there is hope there is life. 』

以下是伊tī 1987年最后返台ê时chūn亲笔写hō͘南神师生勉励ê话语，摘自南神月刊1987.7.8.)：

2. 黄牧师家己ê言辞： 『水』kap『母亲ê目屎』，虽仝款是水份，但是两者之间ê『生命质量』，是bē-sái相比较ê。伊对人ê物性kap灵性是作án-ne ê分别kap解释。

意大利政府ê无稳定（tī 1950年初期，总理组阁无归gò月就跨台），就是表明民主政治所ài付出ê代价，kap必须经过ê路径。

讲道ê时chūn，『ài 亲像phah钉仔仝款精炼你ê中心点（ia̍h-sī要点）。』这是黄牧师对练习讲道ê毕业班学生，所hō͘ in ê劝勉。讲道ài kā中心ê信息如phah钉仔phah入去听者ê头脑内。

3. 五饼二鱼ê神迹 『石头心转变成做肉ê心，比理化ê（神迹）变khah chē koh-khah有意思，又koh彰显出神ê气力。』 伊相信神迹发生，但是tī神迹中siōng大ê神迹，就是人心ê改变。自私贪欲ê心由耶稣ê奇迹、gín-á ê奉献、众心ê改变，hō͘ ta̍k-ke将所由耶稣kap众人所得ê分享，大家lóng食饱，koh收集有chhun。并且siōng好ê结果是，真chē人信了耶稣ê话语kap所为。

4. 『M̄将石头变成饼』（记载tī马太四．3-4，kap路加四．3-4）是上帝ê方法，关于社会经济kap人生活ê实况，bē-sái脱离人kap神、人kap人ê相依存ê关系。

5. 『M̄ tùi十架落来救家己』（马太廿七．42；马可十五．30），这就是『上帝ê大能』，ia̍h-sī讲『上帝ê大爱ê 能』。Chit世界看tio̍h siuⁿ-chē ê『展大能ê大气力』，意图tī征服、克服Subdue，静止异己。上帝tī基督内将家己限制到人ê层次。

6. 关于齐克果（Soren Kierkegaard），伊tiāⁿ-tiāⁿ讲tio̍h齐克果ê故事『王子kap少年女子ê恋爱故事』。王子kap农家女tī生活、思想、权势、环境ê理解等等，背景ê差距是óa-kīn无限量ê大。M̄-koh，王子tī伊ê交往、谈吐，显示本身ê每chi̍t-ê细节lóng kā伊对对方ê爱ê顾虑、关切，m̄敢tī伊ê穿插内里，ia̍h-sī言语行动间，显示震惊对方ê闪耀、响亮，又koh关怀伊，而且耐心忍受ê等到伊kap女子ê关系、理解kap感情、信頼成熟。等到he荣耀、快乐ê一工，chhōa伊到伊本来ê王宫同齐khiā起。

关于『惊惶kap战竞』（Fear & Trembling）一册ê内容内底，kā『亚伯拉罕是信仰ê仿样』kap『亚伯拉罕是杀人犯』之间内心ê争扎，是表明『信』有伊ê深入根底。信是一种『刺穿Cut through』所有ê罪犯ê动机，进而震恼，m̄是盲目ê，颠倒是明明ê看到自身ê心底ê『罪根』。

7. 『苦ah，我ê做人，『是谁仔』（黄彰辉特用台语）beh救我脱出此致到死ê体ah？』（罗马七．24）kap『照所记载讲：lóng无义人，连chi̍t-ê mā无。』（罗马三．10），是黄牧师tiāⁿ-tiāⁿ用来说明人tī罪ê控制下ê处境，kap基督教信仰kap拯救ê前提。

8. I kap Tho͘（我kap您），是人kap人应该有ê关系。当一ê人kā别人当做『It』ê时chūn，chit种ê行为，就是对人ê一大侮辱。伊举chi̍t-ê例子讲，伊到大英帝国博物馆去ê时chūn ê印象。Tī博物馆内底，有一ê tōa-kho͘-pé而且iân-tâu ê卫兵，因为in直立无动真久，hō͘人错认为是石像，指『伊』讲，这m̄是人，是一个假人。Tī chit-ê同时，石像soah动lah，表现tio̍h伊是一个活人。Án-ne对人看做非人ê行为，是对付Tho͘（人）为It（物）ê无应该有ê侮辱行为。

9. 『United we stand, divided we fall. 』是Amsterdam世界基督教青年大会ê主题之一。黄彰辉第一pái tī 1948年1月ê台湾长老教会南部大会年会议时发言，伊引用上述一句，提言台湾教会应该合一，神学院（台湾）mā应该继续合作， mài分离台南神学院进而复校。

Tī 1948年，tī淡水召开ê台湾全国基督教青年大会ê时chūn，伊以『United we stand, divided we fall. 』呼吁教会青年联合组识chi̍t-ê合一ê教会，以合一ê青年会作起。果然tī隔年ê 1949年5月3日成立了『台湾教会青年团契（简称TKC）』。（《回忆录》第143页）

10. 『Text and Context』，这是黄彰辉独到ê神学思想：Contexualization神学，台湾一般是翻成『实况化神学』。当笔者tī南神就学ê时，伊iáu无铸造这言辞，m̄-koh，tiāⁿ-tiāⁿ听伊讲教会ê历史过程kap行事上，时常受『Non-Theological Factor』左右。伊ê解释就是：『世上无纯粹ê道义。Nā无实况背景，就无法度有真道显现。阮siōng-chē ē-tàng做ê，就是phah-piàⁿ kā道实现tī实情kap现况上。』（《回忆录》第118-119页）

11. 上帝ê倒手，tī我m̄知时，赐hō͘我恩典。约伯记廿三9：『伊tī tò-pêng行事，我soah bē-sái看见。』黄彰辉讲，tī Red Hill长老教会听牧师讲道，用chit句经节。笔者tī南神在学中，m̄ kan-tāⁿ一pái听tio̍h伊引用chit句来讲tī历史ê演变，tī复杂混乱困难中，tiāⁿ-tiāⁿ看tio̍h上帝ê恩典，静静ê，soah真丰盛ê赐hō͘软弱ê斗士。（《回忆录》第173页）这经节（约伯记廿三9）成做黄彰辉正港ê教示。Tī 1954年普世教协W.C.C.总会ê『宣教组』讨论ê时chūn，针对基督教世界ê宣教，因为中国ê共产化kap各教派hō͘驱逐出境，而且面对挫折ê时chūn，伊提醒hiah-ê人，上帝对世界宣教ê挑战，并且明显ê指出，如：南北韩、南北越，有chi̍t-ê中国就有chi̍t-ê台湾ê挑战。W.C.C.会后，hit组ê指导Dr. D.T. Nile（锡兰出身）tī伊ê册内面写宣教ê神学时，提起『黄彰辉』ê『一台一中』论讲kap约伯记廿三9。（《回忆录》第174页）

12. 有人问黄牧师：『为什么你chiah-ni̍h会chhōe-ē-tio̍h资金，iáu ē-tàng讨钱来，去经营神学院？』伊回答讲：『做鷄tio̍h筅（chheng），做人tio̍h扳（peng）。』（注：鷄以足爪地chhōe食物，是曰筅；人phah-piàⁿ ê chhōe生活，是曰扳。）

黄彰辉牧师ê历史意义
黄彰辉是台湾历史上真罕koh尊贵ê国宝级人物中ê一位。

黄彰辉tī台湾ê历史上，创下数bē清ê记录上ê第一。伊是头一位台湾人做神学院ê院长，因为tī伊就任以前，台湾kan-tāⁿ有英籍kap北美籍ê宣教师居长地位。伊是头一位无读过台湾ê神学院khioh受设立教师，又koh是头一位无受设立为台湾长老教会传道师khioh直接受封立为牧师者。其实tī英国长老教会，1941年毕业ê当年，伊己经得tio̍h南伦敦中会认可为『待封立ê牧师』。当时nā伊ē-tàng得tio̍h chi̍t-ê英格兰长老教会ê聘请，伊就ē-tàng hō͘封立为牧师。Tùi 1941年到伊回国ê 1947年，伊lóng无得tio̍h chit种ê机会。回到台湾以后将近两年，终于受台湾长老教会ê封立，又koh就任为台南神学院ê院长。伊是读过正规ê官定大学，koh留学外国ê神学院了后，参加台湾牧师阵容ê第一位。

伊大约是第一位娶了外国人，欧洲ê英籍人为师母ê牧师。因为是外籍，又koh是驻任教育机关，黄师母根本无试探过做牧会ê师母ê滋味。

tùi伊居长ê同时，伊是第chi̍t-ê招收查某做『神学班』ê学生。当年进入南神ê有四位，lóng是长荣女中ê毕业生，其中一位是黄牧师ê异母小妹－黄淑惠。

因为时代ê需要，黄牧师是一位参加教会政治，涉入真深ê一位，并且到taⁿ iáu是空前绝后ê，kan-tāⁿ有伊chi̍t-ê人hō͘选做总会议长两pái，而且lóng是siōng有意义ê年度内底。第一pái是1957年，虽然是第四届，其实是南北实质上合一，进而改为每年一pái ê议会hit一pái。第二pái是1965年，当台湾基督长老教会庆祝其设教百周年盛典，做庆祝大会ê总长ê hit年。教会培加运动ê结束，mā将丰伟ê成果献上ê，khiā-tī历史上chi̍t-ê顶点ê一桩大事。

做台湾人ê运命mā带hō͘伊，恐惊是唯一有m̄ kan-tāⁿ三ê法律上ê姓名名义：(1) Shoki Ko; (2) Chang-Hui Hwang; (3) Shoki Coe; (4) Chiong Hui Ng（是m̄是tī法律上使用过，不详）。佳哉，伊ê汉字名始终无变，ē-sái hō͘压迫一世纪以上ê同乡se̍k-sāi ē tio̍h伊。

因为黄彰辉家己是受过日本kap英格兰ê正规教育，tī二次大战后ê台湾，无规律ê，有可能应该讲是扭曲ê教育体制内，克苦万般所建立环球上够水准kap声誉，soah无『执照』ê学府。

Tī无就公职ia̍h-sī高级检定ê可能kap机会ê情况下，神学院所ē-tàng做ê，就是提供『真正』ê实力kap『自信（Pride）』。黄彰辉tiāⁿ-tiāⁿ lóng讲：『南神ê英语、希腊语、哲学、教义学、新约、音乐、宗教教育，lóng是台湾kap东南亚siōng好ê lah。』m̄-koh，伊mā tiāⁿ-tiāⁿ强调讲，神学院ê目的，是tī养成传道者，服务地域ê教会、社区ê人民，koh建立kui-ê台湾基督长老教会。Tī伊ê念头内，就无『为学问而学问』ê神学院。神学院ê求精、求妙、求圣，是因为tio̍h-ài事奉教会kap做基督教信息ê宣扬。Tī伊任院长ê年岁内，伊考虑tio̍h预备将来ê教授人员，但是一点lóng无考虑tio̍h hō͘学生进出到做亚洲ia̍h-sī世界教会ê领导者。真可能就是因为伊所接触ê普世教会世界内，领导者lóng是kap神学院有密切ê关连。所以有学问ê，受高度神学训练ê，chiah有机会ē-tàng升到（行政）领导地位上去。因为伊无phah算到所选择栽培ê优秀人才ê流失，kap供不应求tī台湾背负神学教育，进而充实供hō͘普世教会ê领导人才。

以间髪之差，伊ùi执行kā台湾hō͘ in日本皇民化ê特务ê手中逃脱，到英格兰留学．Chiah-bē做为军国主义侵略亚洲太平洋地区ê抓牙。佳哉tī伊离开台湾「日本管制」（1937）以前，黄彰辉已经受过自由民主气氛下ê日本siōng高语言技巧kap思考ê训练，具现tī伊ê东京大学文学士学位kap文凭。Án-ne，kui-ê日本军国疯狂时期，黄彰辉ē-táng tùi超越ê视界观察koh kā伊评论。

Tùi 1937到1939年ê两年期间，黄彰辉tī英格兰社会完全ê自由风气内底无拘束ê学习。Tùi 1939年，英德开战到伊完成学业ê两年，tī神学院内底ê学业kap生活环境大部分lóng ē-sái讲是享受到大战乱中ê安定。Tùi英国参与太平洋战争（1941年12月）到终战（1945年8月），koh经过一年半ê战后挣扎恢复时期为止（1947年春天），伊得tio̍h siōng好ê待机环境，教授日本话kap华语（台湾话），mā同时学习满清语（华语）。伊已经具备多种语言ê能力，koh tī国际性ê语言学院做教学ê经验，tī战后回国ê hit e5si5-chūn是siōng有能力、资格、经验、尚且是少年ê国宝人物。

黄彰辉m̄-nā有语言ê能力，ē-sái贡献hō͘世界沟通，伊ê能力koh-khah是ē-tàng教育hiah-ê人拥有世界观，对hiah-ê人视野ê开阔kap对未来ê前瞻性，具有影响kap显着 ê贡献。黄彰辉对台湾ê眼光，koh-khah期待又koh教导hiah-ê人：m̄-nā ài用台湾ê眼光看家己ê文化，koh-khah以世界ê眼光来看台湾ê发展。对未来ê前瞻性，黄彰辉注重ê是希望hiah-ê人ē-tàng mài以一时ê是非对错，来评断台湾ê好bái，应该用长远ê角度，hō͘台湾人本身ê潜力ē-tàng发挥，来看待台湾未来ê光明kap美好。伊时时提醒hiah-ê人：咱m̄ kan-tāⁿ是局限tī台湾，应该kā台湾看做世界公民ê一员，hō͘其他人se̍k-sāi chit块土地ê文化。台湾ê发展除了家己ê进步，koh-khah ài推向国际舞台，hō͘世界共同见证台湾气魄ê善kap美！

黄彰辉tī台湾所做ê siōng大ê贡献ē-sái讲就是「台湾话ê钦定化」。历史上德国ê马丁路德tī 16世纪中期kā全部新旧约圣经翻译成德语。Hit版本ê圣经tī德语上占有古典原祖性ê地位。因为hit本圣经就成做收藏iáu未有印刷技术ê前代所使用ê文雅kap实用ê言辞kap语汇ê宝库。到17世纪ê初期，英王詹姆士召集圣经学者，将全本圣经翻译成标准英语版本。后世ê人称hit-ê版本为「钦定圣经译本」。台湾ê社会内底通用ê河洛语言延到20世纪初期lóng无人收录言辞kap语汇。一直到台南神学院ê创设人巴克礼使用罗马字kap出版社，koh推广台湾话ê普及化。但是伊siōng大ê贡献就是tī 1920年代后期完成「厦门音罗马字圣经」翻译，普及tī全台湾ê基督长老教会信徒中间。M̄-koh，战后复校了后ê黄彰辉chiah是真正将台南神学院奠定成做唯一有高水准ê以台湾话为主语授学ê学府。因为南神黄院长ê学院内底，平常lóng用台湾话表达神学上ê广泛理论，koh操练将学术思想适用tī礼拜kap讲道ê述讲kap tī日常生活上ê实用内面。黄彰辉mā设定台湾话ê罗马字为文字学习ê必修，毕业前一定ài通过检定。南神实堪称谓台湾河洛话如水库一般ê宝藏，伊帮赞形成台湾人ê气魄进而造成以后台湾建国精神上ê摇篮kap根源。