《台湾人e5先觉―黄彰辉传》

 | | | 转寄

普世教协神学基金会主任

作者 张瑞雄 2009.05.10

黄彰辉辞去了台南神学院，就到英格兰。伊ê新职务是tī普世教协会内ê神学教育基金会担任副主管。M̄-koh伊ê办事处是由伊家己选择ê地点，工作方式kap职务分配，除了驻tī纽约ê主任(白人)以外lóng由伊负责。纽约办事处kap主任ê主要职务，是做基金ê掌理kap款项ê捐募。黄彰辉就设立了往后继续14年期间辅导世界神学教育活动ê中心tī肯特州布仑里市伦敦路13号ê一间教会。伊选肯特ê另外一ê重要ê理由就是因为黄家已经tī该州ê南端西福市(Seaford)买一间厝，慰尔kap儿女mā已经tī-hia定居kúi-nā年。

下图是黄彰辉「回」英定居(1965)了后tī「家」ê花园灶脚窗前所hip留影,tò-pêng依顺序是大卫,爱连,安得烈,彰辉,慰尔,麦克.(阿丹提供)

神学教育基金会是1957年年底到1958年年初，tī非洲ê Ghana开国际宣教协议会（International Mission Council）时创设ê。国际宣教协议会决定将该团体合流tī普世教会协会ê当时，特别为tio̍h『第三世界、宣教区、少年教会』开创siōng有效ê『自立、自传』ê方法，就是设置为『努力jiok-tio̍h途中』ê教会养成：训练神学生ia̍h-sī 在职传道者ê机构。扮演创始ê演员，大多数lóng是欧美ê『chi̍t-kóa老先辈』，其中tùi北美参加ê，有United Board of Higher Education，尤其是做主席ê Dr. Henry Pitney Van Dusen，因为受Van Dusen ê器重，tī伊展开ê si̍t-kó͘，黄彰辉mā受邀请参加Ghana ê协会，而且tī he会内，hō͘选做神学教育研究基金会ê理事之一。Chit种ê背景hō͘黄彰辉得tio̍h罕有ê机会，有参与开创ê盛举，并且tī 19年后ê 1977年，伊领导了神学教育基金会ê结束，勇于退让hō͘神学教育辅导会来继承。

开创ê siōng初期ê主任干事是Charles Ranson博士，伊tī纽约设了办事处，讲到有kui位副主任，任事jōa久，笔者无作考究。Dr. Ranson伊bat tī 1956年，kap黄彰辉同齐tī泰国ê曼谷开了第一pái ê东南亚神学研讨会。当时，tī kui-ê亚洲，iáu无授与道学硕士班课程ê神学院，但是，tùi hit一pái ê研讨会，东南亚神学教育院校开始，发动联系合作。就tī隔年ê 1957年，成立东南亚神学院协议会（ATSEA）。一直发展到1966年，就联合15个神学院，设立东南亚神学院校联合协会，建立又koh授与神学硕士课程kap学位。

正当1965年，台湾基督长老教会无闲庆祝『福音来台百周年』ê行事期间，黄彰辉mā无闲准备离开台南神学院kap考虑善后ê问题。伊tī 1965年7月27日寄出hō͘众朋友ê批内底，讲伊己经接受了以伦敦为据点ê神学教育基金会（Theological Education Fund）副主任ê职位。因为是从事tī神学教育方面ê工作，伊tī批中讲真希望ē-tàng tiāⁿ-tiāⁿ回到亚洲chit-ê边来。Chit点，伊ê希望若是tńg来台湾kap台南神学院，伊就错lah，因为tùi 1965年11月离开了台湾，就hō͘登上『乌名单』内。一直到1987年，经过当时ê副总统李登辉斡旋，特准伊入境为止，整整22年，无法度踏上故乡ê土地。伊有自由到世界，包括亚洲各地去，但是kan-tāⁿ有故乡台湾无欢迎伊tńg来，这是台湾人ê悲剧。

黄彰辉所爱护ê台南神学院，就由tú tī纽约协kap神学院完成神学博士课程ê宋泉盛牧师接任。像黄牧师家己当台南神学院院长ê时chūn，伊chiah 35岁，伊ê后任mā真少壮，因为伊mā chiah 36岁niâ。身为台湾基督长老教会ê议长ê伊，mā tio̍h-ài向台湾教会历史ê第二世纪作chi̍t-ê交代。所以黄牧师决意留到11月，到完成『共同进入第二世纪』ê宣教策略会议了后chiah离去。

The̍h-tio̍h中华民国ê护照是一件真麻烦ê tāi-chì，因为该国继续kap世界上ê国家『绝交』，hiah-ê kap『台湾』断绝邦交ê国家，就特别留意中国ê交代，视『台湾』为无存在tī世界上ê国家，若m̄是刁难，就是拖延koh不hō͘签证。黄彰辉经验到án-ne多端ê见笑kap不便，就tī 1966年6月开始，向英国内政部申请归化。经过了一年，tī 1967年6月20日，chiah接tio̍h归化ê证册。Tī申请归化ê时chūn，伊mā申请将伊ê法定姓名改为Coe，大概siōng大ê理由是因为tùi 1937年到1947年ê 10年当中，伊tī英国广泛ê为hiah-ê人se̍k-sāi为Shoki Ko，koh Coe ē-sái保留Ko ê（日本式ê）发音。

1957年年底到1958年年初，tī Ghana ê Accra开国际宣教大会，beh设立神学教育基金会ê时，授予了三ê对第三世界神学教育ê托付。成立了基金会以后，该基金会将三ê托付分做三ê时期，以图谋有效ê进展。（参考黄彰辉主任干事向1977年神学教育基金会最后一pái 1973年7月ê年度报告）

第一时期（1958年－1965年），mā是头chi̍t-ê托付：神学教育基金会ê主要目标，就是tī实际可能ê范围内，提高教育（神学）机构（院校）ê学术水准。改进kap加强本土ê神学教育，促进地域性ê责任，鼓励发挥神学思考ê创意，又koh引进高一层ê学术水准kap 在职训练，适合所事奉ê教会ê需要。

第二时期（1965年－1971年），mā是第二ê托付：有鉴第i̍t-ê托付倾向tī专求学术ê精练ê单面之嫌，第二ê托付强调其主要方向为，寻求出自认同当地ê社团kap状态者。所求ê神学ê精练．就是ē-tàng引chhōa学生面对福音时，有出自家己ê思考方式kap文化背景所来ê遭遇，án-ne，ē-tàng产生教会kap其环境之间活活ê对话。Chit-ê托付，要求教学ê人kap学习ê人，仝款tī各教会ê文化kap宗教处境ê实况中，得tio̍h koh-khah深ê了解，tùi án-ne ē-tàng深切理解家己为宣教团体受派遣进入世界，tī社会ê生活内底，作koh-khah有效ê交往。

第三时期（1971年－1977年），mā是第三ê托付：继续探讨纯粹出自本土ê实况化ê路途，以求神学教育ê更新kap改正。Tī chit时期，神学教育基金会尽其全力tī发掘第三世界ê神学教育所hō͘ in普世教会ê新鲜创意kap希望。

黄彰辉tī神学教育基金会做工作ê siōng头前ê 6年期间（1965年－1971年），主任是James F. Hoppwell，总办公处犹原是设tī纽约。Tī英国Bromley, Kent ê副办公处是由伊负责管理。除了 Hoppwell kap黄彰辉以外，iáu有三位干事。每chi̍t-ê人lóng负责一大洲，如：非洲、南美洲、欧洲、北美洲。黄彰辉ê主要负责区域是亚洲、澳大利亚、kap太平洋地区。因为工作上需要访问神学教育ê施设，一年内，黄彰辉大约有一半以上ê时间是tī外地cháu-chông。

1969年9月，普林斯顿神学院院长James I. McCord以世界归正教会联盟主席身份，代表常置委员会，邀请黄彰辉牧师做该会ê总干事。因为黄牧师对神学院kap神学教育ê专心斟酌，koh对教会政治无特别ê钟爱；另外一ê大理由，就是伊无愿意koh一pái kap家庭分居。tùi 1965年，伊kap慰尔就已经tī Seaford买了一间厝，叫做『The Bye』。回顾tùi 1959年到1965年ê 6年之间，kap家庭分离于两个国家，伊真无愿意搬去日内瓦，hō͘伊ê家庭koh来一pái痛苦ê调适。伊就快快回信婉谢chit-ê邀请，án-ne，伊就留落来做副手ê工作。

1971年8月，黄彰辉hō͘选做神学教育基金会ê主任，tùi-án-ni，伊就负责总揽亚、非、南美洲ê神学教育kap神职训练事工ê提升。虽然伊高居主管总揽ê地位，iáu保留东北亚（日本、韩国）ê事工为地区性ê指导对象。

1971年到1972年之间，黄彰辉一屑á to无犹豫，就聘请非洲ê神学教育家图屠kap女性ê神学教育家周藤，做伊ê副手，kap前主任所留落来ê两位副主任，伊ê副手总共是四位。In各自hō͘分派负责辅助拉丁美洲kap中东（Ahron Sapsezian），南亚、南太平洋、加利咯比区（Jun Bergquist），东南亚kap东南亚基金（周藤），非洲kap马达加斯加（图屠Desmond Tutu）。Chit段时期，真是神学教育基金会ê全盛期，除了主任，四位副主任以外，总共有14位工作人员tī神学教育基金会内底工作。

1975年7月，因为图屠牧师受伊ê教会邀请，出任非洲人tī南非ê约翰尼斯堡第一位主教大教会ê主任。黄彰辉kap图屠lóng kā这pái邀请当作是一大挑战，同时mā是困难、劳苦重重tī头前等待伊ê前兆。In终于同意图屠离去神学教育基金会，迈向争取非洲乌人ê平等kap废弃人种歧视ê运动内去。Án-ne，图屠就离开神学教育基金会ê职务，全家搬到约翰尼斯堡。图屠大主教tī 1984年受选得tio̍h诺贝尔和平奖。

下图是黄彰辉kap副主任图屠牧师伉俪tī纽约『圣公会办公大楼』由魏瑞明所hip ê相片。（高俊明提供）

Tī 70年代黄彰辉负责东亚区域中包括韩国ê神学教育在内。Hit ê时期韩国ê教会受tio̍h朴正熙政权ê压迫、折磨kap阻挠。1975年4月，全国教会协会总干事、韩国神学院ê文教授hō͘ lia̍h去，延世大学神学院ê前教务主任hō͘投入牢狱8个月了后hō͘释放出来。另外有五位神学院教授（3位是延世大学，2位是韩国神学院）hō͘逼迫停职。

Tī黄彰辉主任ê 75年度报告内底，伊提起（虽然m̄关神学教育）kui-ê亚洲ê国家，除了日本无算之外，lóng是tī专制ê统治之下，连印度mā进入了专制政权ê集团内底。

1976年ê年会报告内底，黄彰辉主任报告图屠前副主任tī 7月11日受封立做南非Lesotho地域ê主教。

1976年2月，黄牧师kap负责总揽拉丁美洲神学教育事工ê副主任Dr. Aharon Sapsezian牧师，tī 9、10日同齐参加tī巴西圣保罗召开ê神学教育新方法试探会，然后计划到南美其他ê所在访问。笔者读到伊mā利用工作上ê行程配合，作台湾人自决运动ê巴西支部筹备会ê事工。

1977年7月31日，是黄彰辉主任结束神学教育基金会主任一职之日。伊kā tī英国ê Bromley, Kent ê办事处终结，thang hō͘新ê机构，称做神学教育辅导会（PTE，Programs of Theological Education）tùi 8月1日开始，koh由Dr. Aharon Sapsezian牧师接棒。该事工ê办公处mā tùi英国搬到日内瓦。是日起，黄彰辉就担任神学教育辅导会ê顾问，伊ê正式ê办公处mā搬到日内瓦，但是伊除了到亚洲kap世界各地去出差，kap定期去日内瓦『上班』以外，mā ē-sái回到伦敦kap Seaford ê厝，继续办公，又koh kap日内瓦联络，办理事务。以后ê两年内，伊卸去主任ê重担，tio̍h khah轻松lah。

依照黄彰辉主任ê 1977年度报告（1977年7月），tùi 1971年开始ê第三阶段托付，tī开始ê时chūn，承接了大约美元$760,000无指定ê，kap美元$1,700,000指定ê基金款额。Tùi TEF（基金）留落来，交hō͘ PEF（辅导金）ê金额无指定ê大约有美元$700,000，指定ê大约有美元$750,000款额。Tùi基金会开始ê 1958年到1977年大约20年期间，总收支大约是一千三百万美元，为tio̍h第一阶段托付（1958年－1964年）约有美元$5,600,000收支，为tio̍h第二阶段托付（1965年－1970年）约有美元$4,000,000，第三阶段托付（1971年－1977年）约有美元$3,300,000。Tī伊ê报告内底，黄主任提起tī伊做主任ê期间，放款帮赞了大约700 ê第三世界tú-teh成长途中ê地区内底，有关神学教育ê事工。

台湾人民自决运动

台湾人民自决运动是以黄彰辉博士为首，黄武东博士（牧师）、林宗义博士（医师）、kap宋泉盛博士（牧师）共同发起，tī 1973年3月20日成立ê。来自各地ê代表如田弘茂、林哲夫、黄昆严、周吴秀惠等二十gōa人参与。tùi头开始，宋泉盛博士就担任该运动ê书记，发行不定期刊物，名叫：『出头天』（英语版），将台湾人ê意愿、台湾基督长老教会ê声明、挣扎、努力，绍介kap解释hō͘海外ê台湾人kap世界各国ê教会领导者，唤起in ê理解kap支持。佳哉宋牧师留落来chiah-ê刊物作成合订本，提供hō͘学习hit段自1973年3月到1980年1月ê自决运动ê人，thang追查ê记录。Tī前言内底，宋牧师回顾in ê动机，讲tio̍h：『阮同齐讨论、挣扎、思考策略、互相激荡脑力。阮ê动机m̄是为家己，却是为台湾ê政治理想。阮对台湾ê热爱hō͘阮一定ài án-ne做，阮所做ê kan-tāⁿ是领受恩惠了后ê回馈。阮无顾家己工作ê无闲，奉献投入自决运动，因为阮深信，作为基督徒，阮对台湾ê爱必须转化成对乡土ê爱。阮四人－牧师黄彰辉博士、教授林宗义博士、牧师黄武东博士、牧师宋泉盛博士，除了渴望看tio̍h台湾充满民主自由之外，无pa̍t-ê要求。』(《出头天》13页)

对1971年12月29日所发表ê台湾基督长老教会ê国是宣言，自决运动ê发起人，以『基督徒ê立场』，tī 1972年12月25日，发表了『台湾人民自决运动宣言』。文中宣言道：『…这kap咱ê前途kap运命有严重ê关系，无论是谁，lóng bē-sái否认咱有决定家己运命ê神圣权利kap自由！因此，阮号召海内外台湾人民一致奋起，严肃ê向全世界表示咱争取合理选择ê自由kap决心。』(《出头天》20页)

台湾人民自决运动ê纲要为：(《出头天》21-22页） (一) 表明基督徒对台湾人权问题ê坚决立场。 (二) 促进台湾人民tī政治上自主自决。 (三) 为建设自由民主ê台湾社会努力。

提出了目前ê任务，为： (一) 激发台湾本岛kap海外基督徒负起对台湾ê责任。 (二) 培养海内kap海外台湾人民ê政治意识。 (三) 争取普遍ê同情kap援助－包括个人ê、团体ê kap国际ê。 (四) kap其他为同一目标奋斗ê台湾团体合作。 (五) 促使各有关政府注意台湾人民tī政治上ê要求。

大约1973年ê四月中旬，自决运动以四位发起人ê名义，发表对台湾同胞ê公开批。兹将该信ê全文抄登如下：

敬爱ê台湾同胞：

藉tio̍h chit封公开信kap附件，阮beh向lín请安致候，而且也tio̍h kā lín讲，阮为台湾ê将来所做ê一切。亲像lín所知影ê，chin-má台湾tī非常关键性ê时刻。咱ê未来tú-the面对极紧要ê关头。假使讲阮现在iáu无行动，án-ne咱beh生存tī国际强权政治之下ê机会是真渺茫ê。只有咱ē-tàng完全意识到chit种情况ê迫切性，chiah是确保咱自由kap人权ê第一步。

Tī过去kui个月当中，阮这羣非常关心台湾运命ê人，因为台湾未来ê决定可能无阮ê参与所以感到极度惊惶。咱，to̍h是你kap我，就是无论国内国外，认为台湾为乡土，而且仝款tī统治政权ê政治利益下hō͘ thiâu-kang规避、忽视kap hō͘剥削ê人。面对án-ne紧迫ê危机，咱iáu ē-tàng照常保持沈默？咱ē-tàng koh对hiah-ê有权力ê人衷心屈服hō͘ in蹂躏kap操纵？kám讲咱无应该对阮是谁提出质疑？为什么咱无权决定阮家己政治ê将来，颠倒ài一直假做支持『反攻大陆』ê幻想soah致使自取灭亡？ia̍h-sī咱ná-thang自欺tī台湾表面ê经济繁荣koh认为台湾bē有灾祸来临？

答案将是千万ê m̄ tio̍h！这是为什么阮beh开始『台湾人民自决运动』ê原因。Mā-sī你ē-tàng详细读chit-ê公开批ê附件，你就ē-táng明白阮ê基本用意kap目的。自决权是全人类神圣bē-tàng剥夺ê权利。但是chi̍t-ê悲哀ê事实是chit种神圣ê人权，除非咱家己beh伊，珍惜伊，而且无惜诉诸人民ê良心为此奋斗，若无世界上将无人会承认伊。He就是为什么阮必须讲出来，hō͘人知影阮ê动机，而且不断将伊chhōa到世界列国ê面头前。

为tio̍h台湾自决chit项运动，目前己经chhōe tio̍h真chē来自美国、加拿大、日本kap欧洲ê台湾人热情强烈ê支持。而且为tio̍h chit-ê原因，今年三月二十日，阮tī华盛顿ê国家新闻协会，召开一pái记者招待会。Tùi-án-ni阮坚决保证ài继续tī海外ê台湾人当中推动chit项运动。而且成做达成自决目标ê后盾。

阮mā请lín作阮共同努力ê后盾。因此，你应该随时知影目前国际上发生什么tāi-chì。你mā应该chhōe机会kap你ê朋友讨论你所关心ê tāi-chì。希望咱ē-tàng切记，除非咱kā台湾ê决定权khǹg tī家己手头，除非咱决意beh为家己ê权利去奋斗，若无咱bē-sái期望见tio̍h chi̍t-ê光明ê将来。当决定ê时刻来临ê时，希望咱lóng已经chhoân-piān而且团结作伙，为确保自由、权利来作正确ê抉择。

阮时时tī祈祷kap思想中纪念lín。

黄彰辉、黄武东、林宗义、宋泉盛　敬上 （《出头天》49-50页）

由四位台湾人民自决运动发起人tī 1974年2月28日到3 月3日，tī德国ê伍伯塔－巴门（Wuppertal－Barmen）召集举行『今á日台湾人民ê拯救』ê协议会。这一pái ê协议会，tùi欧洲各地有132位代表参加。会中所采纳ê声明册就tī伍伯塔－巴门ê葛马克福音改革教会ê礼拜中宣读，tú好hit-ê教会是四十年前，纳粹政权掌政ê时，德国告白教会对抗chit-ê hō͘千万人遭受悲剧性苦难ê独裁政权ê所在。(《出头天》60页）

当上述『今á日台湾人民ê拯救』ê协议会开会ê时，黄彰辉博士致词如下，kā伊ê演讲全文抄录hō͘读者分享：

敬爱ê贵宾、台湾同胞：

身为chit-pái协议会筹备会ê主席，我感觉极大ê喜乐kap荣幸来欢迎ta̍k-ke。

我特别beh诚心欢迎咱ê贵宾，mā是咱ê主人。因为tī-chia ê德国（主办国）教会，一直teh精神上kap物质上极力支持阮，我希望代表所有ê台湾人对chit种ê支持表达siōng深ê谢意，咱共享对基督ê信仰，这信仰超越国家kap种族ê疆界。

我mā beh向hiah-ê m̄是基督徒ê台湾同胞表达特别ê欢迎，lín kap咱同齐分担对乡土kap人民ê运命ê深切关怀。咱诚恳ê期待，通过chit-pái重要ê协议会，tī共同ê对话kap协商当中，咱ē-tàng tī-chia关键ê时刻，审慎思虑咱家己ê将来，mā就是一千五百万人民ê将来。

今á日是二月廿八日，我m̄免细讲，相信ta̍k-ke lóng知影chit-ê日子tī台湾历史当中ê意义，m̄-koh我必须为咱当中ê某一kóa外宾解说伊ê重要意涵。

二十七年前ê今á日，台湾发生了 chi̍t-ê悲剧事件。人民反抗国民党将领陈仪手下占领军ê无理压迫，陈仪kap伊手下ê所作所为，证实in m̄-nā m̄是日本专制政权ê解放者，in本身颠倒变成压迫者。台湾人tī hit-pái反抗中付出ê代价是两万以上ê台湾人受tio̍h血腥ê屠杀，其中包括真chē菁英份子kap领袖。Chit-ê悲惨ê事件拍开台湾人追求自我认同kap真实解放ê新纪元。

另外，咱chin-má聚会ê所在tī伍伯塔－巴门，对德国教会历史来讲mā是意义重大。我无必要向咱ê贵宾解释chit项tāi-chì，但是真chē咱ê台湾同乡有可能m̄知，四十年前就tī chit ê所在，『德国告白教会』开始反对纳粹政权。

了解chit pái会议ê时间kap地点了后，咱ē-tàng koh-khah进一步看出chit pái协议会ê双重目的。一方面，咱ê协议会是beh回应名叫『今á日拯救』ê曼谷协议会ê信息－to̍h是拯救ê意涵hō͘人koh再发现而且koh再肯定为解放之意。藉tio̍h这ê解放，每chi̍t-ê人所认为人ê自我身份tio̍h hō͘确认lah。另外一方面，chit pái协议会mā是beh回应我台湾教会tī两年前所作ê告白，确认人民决定家己运命ê权利是上帝所赋予ê。

因此，咱ê宗旨kap目的就是beh koh-khah清楚、koh-khah深入ê去了解这代表什么意义，kap咱应该beh an-chóaⁿ做。

总结来讲，请容许我提醒ta̍k-ke，1974年是人权纪念年，tī世界各地lóng举行真chē协议会。因此，咱tī协议会中所努力ê一切，将对世界各无仝处境中对人权可见kap具体ê彰显ê共同努力有帮赞。有chit种ê期待，我深切ǹg望又koh祈祷，希望咱ê聚集ē-tàng藉tio̍h所讲ê kap所做ê，koh-khah显得丰富koh有意义。(《出头天》63-65页)

当1974年3月，tī北美己经成立将近30个自决运动ê所在总部，tī各地负起责任来组织、活动，tī欧洲ê协议会结束ê时，mā组成了『自决运动欧洲支部』，由赵有源牧师负责联谊kap活动。(简摘自《出头天》72页)

一件『意义重大ê tāi-chì』mā tī 1974年9月6日到9日发生，就是165位台湾人tùi巴西、美国、加拿大、日本kap欧洲聚集tī奥地利ê维也纳。Tī这一pái ê会中共同创立了『世界台湾同乡会』。该会ê目标就是beh促进台湾人民之间ê交谊kap互相ê合作，团结海内外ê台湾人成做大ê家庭，尽力保护台湾同胞ê人权kap福利。Tī会中郭荣桔先生hō͘选做世界台湾同乡会ê会长。(《出头天》81-83页）

1975年4月，自决运动因应中国国民党禁止、发行，甚至没收罗马字台语圣经，进而展开活动，tī北美促成将近20 ê教会团体共同发出chi̍t-ê联合声明。

针对没收圣经ê事实，tī 1975年11月18日，台湾基督长老教会发表了『咱ê呼吁』。对『推行华语政策』为由，kā台语白话字圣经查扣、没收、取缔一项tāi-chì，建言讲：『一国ê政策，bē-sái抵触宪法基本精神。』mā申请政府『为维謢宪法上信仰自由，发还新译白话字圣经，又koh允准继续出版任何语言ê圣经。』该呼吁mā重申1971年旳『国是声明』是基于台湾基督长老教会对国家运命ê关心，mā向教会呼吁，为tio̍h挽救国家ê危机，应该精诚团结，成全教会为tio̍h维护公义、自由、和平ê任务，hō͘教会堪称时代ê基督忠仆。

1975年11月21日到12月10日，第五届ê普世教会协会ê总会，tī肯亚ê奈洛比会议中心开催。Tùi超过一百ê国家有近2,500名各地教会ê代表参加，台湾人有两位登上世界教会舞台ê黄彰辉博士kap宋泉盛博士，做为领导人员参加，加添台湾人ê光彩。但是来自世界上各地区，各国ê代表看tio̍h『台湾ê基督徒竟然明显ê缺席，是hō͘人jōa-ni̍h-á ê悲伤ah！tī chit世界ê共同体内底台湾人到底tī-hia？tī chit世界性基督团契内底，台湾基督徒koh tī-hia？东亚ê出席国家共有：日本、韩国、菲律宾、新加坡、马来西亚、印尼等，但是soah无台湾。Hiah-ê人问到底是为什么？in非常惊疑为siáⁿ-mih拥有廿万信徒，一千gōa间教会ê台湾基督长老教会代表竟然缺席。缺席ê原因其实真简单：国民党政府拒绝台湾代表出境。』(《出头天》133页)

会后，因为会员台湾基督长老教会不克参加，普世教协tī 12月10日，由总干事腓力．波特（Philip Potter）博士写批慰问台湾长老教会总干事高俊明牧师，mā声明对『咱ê呼吁』ê支持。(《出头天》p.135-136)仝款tī 12月11日，世界归正教会联盟mā以会长威廉．汤普森博士（Dr. William P. Thompson），总干事艾德蒙．白逸文博士（Dr. Edmond Perret）ê名义，khà电话hō͘台湾长老教会总干事高俊明牧师，电文中o-ló台湾长老教会ê勇气，mā应允通过联盟ê刊物kap政府ê管道，hō͘『咱ê呼吁』tī世界各地广传。(《出头天》137-138页)

1977年8月16日面临美卡特总统teh-beh执行kap中国ê关系正常化ê时，台湾基督长老教会发表了『人权宣言』。Chit-ê宣言，是无论tī台湾ê历史上，ia̍h-sī tī kui-ê教会ê历史上，是表示tùi信仰ê立场所表达出来ê，对乡土深情ê爱kap对强权压迫者ê反弹ê勇敢建议，所有参与拟稿ê总会领导人lóng修好遗书，准备siōng坏ê后果降临身上。文中siōng受人民kap政府注意ê言辞，就是：『为达成台湾人民独立kap自由ê愿望，咱促请政府tī chit-ê国际情势危急ê时，面对现实，采取有效措施，hō͘台湾成做chi̍t-ê新而且独立ê国家。』

续落来1978年3 月28日到31日，tī台南神学院召开25届ê总会，tī会中做了两件真重要ê议事决定。一是选总干事，另外一是投票决定是m̄是接纳总会常置委员会ê报告上，发表『人权宣言』ê措施。Tī谨慎kap周到ê投票程序下，总干事连任：赞成255票，反对49票，8票空白，高俊明牧师当选。接纳『人权宣言』：贙成235票，反对49票，10票空白，『人权宣言』成做台湾基督长老教会ê公式ê宣言。

这1978年ê台湾基督长老教会ê团结一致ê行动，招来中国（国民党）政府利用1979年12月ê美丽岛事件，以事件ê领导施明德先生逃匿、行头无路ê时chūn，hō͘ in帮赞为理由，控告高俊明牧师以『藏匿叛乱犯』之罪，逮捕投狱。高牧师hō͘掠去关，是tī 1980年4月17日发生，tùi hit一工开始，黄彰辉牧师tio̍h领导台湾人民自决运动专心以赴作释放高牧师，拯救台湾脱离束缚压迫ê运动。其实，自决运动以高俊明牧师hō͘掠去关告一段落。自决运动ê发起人差不多无koh以自决运动ê名义展开活动，因为： 一、 tī美丽岛事件内面，高俊明牧师kap kui-ê台湾基督长老教会lóng hō͘卷入台湾民主运动ê旋涡内底，中国（国民）党藉ê高俊明kap其他教职人员为理由，无koh踌躇对教会以政治组织看待。 二、 『美丽岛事件』是中国（国民）党下工夫计划，kā所有民主运动领导者（叛乱罪犯）一网打尽。Hō͘逮捕ê『犯人』内底，真chē是台湾基督长老教会ê教职人员kap会友。教会认为伊ê使命是kap受苦、受压迫者，无论会内ia̍h-sī会外，共同忍受苦难ê。 三、 台湾ê民主化运动mā ē-sái讲是自决运动ê社会化kap政治化，tùi án-ne phah破教会ê围墙，hō͘ kui-ê台湾人『出头天』ê运动吸收进而形成海内外共鸣，而且互相响应ê运动。

1979年12月15日，台湾建国阵线成立，其中主要ê而且有国际性组识ê，包括：台湾独立联盟、台湾人公共事务会（Formosan Association for Public Affairs）、kap台湾人民自决运动。虽然台湾人民自决运动是着重人民ê人权kap自决，未必是政治活动ê团体。但是中国（国民）党己经指向台湾基督长老教会为『政治过于宗教』ê团体，koh藉人权日（12月10日）ê美丽岛事件，逮捕bē少ê教会人士，长老教会mā己经tī人权宣言（1978年）内建议国民党政府建立台湾为新而且独立ê国家。教会ê信仰kap对社会ê关心，是kap其他ê组织打成一片，koh共同努力。Tùi án-ne自决运动ê领导人，尤其是黄彰辉牧师，共同展开劝募资金，图谋替政治犯辩护，以求in ê释放。Kap国内互动响应，通过国内外ê通信管道，促进国内外人民ê台湾意识，kap推行建国理念ê教育。所以，tùi 1980年以后，mā就是黄牧师tùi TEF退休了后，就看到黄彰辉牧师kap彭明敏教授、蔡同荣教授等人，到北美各地去游说、号召台湾同志ê团结kap劝募基金，一直到1988年，伊过身为止。