《台语网放送头》

 | | | 转寄

保存阿母ê话，台语系有存在ê使命

作者 李婉慈 2011.06.12

过去真济人问我，lín中山医若会有台语系？现此时，我拢听着人家讲，你敢是中山医台语系毕业ê，ia̍h若无母语能力若会chiah-ní好？

这是一个经过济济人拍拚所建立ê台语系，我必须爱hō͘大家了解我ê母校中山医台语系对台湾社会ê意义，自2003年开始，除了培养学生对母语ê专业知识能力外，mā陆续参与母语相关活动，亲像逐年拢主协办「世界台语文化营」kap协助其他相关ê母语活动、参加各种文学奖kap投入母语相关研究，hō͘学生m̄-nā tī校园内学习，koh进一步将所学ê物件回馈hō͘社会大众，因为án-ni chiah会使hō͘阮运用专业知识kap社会产生连结。另外，学生mā爱通过台客语认证考试来证明家己ê专业，根据教育部表示，大专院校相关科系中之台语鉴别度是中山医台语系最有指标性。如今，学校董事会用各种理由提案beh停招台语系chham外语系，koh积极要求转型做语言中心，试问，若无一个系所来规划培养专业母语人才，kan-na单纯靠语言中心beh来推广，án-ne咱iah-ū jōa-chē气力通来保存阿母ê话？

愿董事会会当看māi阮过去为台湾本土基石所做ê拍拚来手下留情。目前，透过脸书、噗浪等各种管道，学生已经成立自救会，mā恳请关心台湾语文ê朋友们做伙来斗相共kap赞声，hō͘ 阮一条坚定ê路继续为台湾母语拍拚。