《台语网放送头》

 | | | 转寄

抗议国家台湾文学馆降级

作者 Sêng-hiân 2007.09.09

台湾文学馆是咱国头一间国家级ê文学博物馆，按政府组织再造方案，经过行政院核定以行政法人组织型态成立，并且 tī ○三年十月十五 kā「国家台湾文学馆设置条例草案」函送第五届立法院审议，m̄-koh bē 赴完成三读，组织立法做粿增差无包馅。第六届重 koh 提案，现此时立法院犹有 1 ê 会期审议，是按怎文建会大主大意 tī 八月十五 kā「国立台湾文学馆组织规程」kap「国立台湾文学馆办事细则」报请行政院核准，koh 公告实施，hō͘ 台湾文学馆 ùi「国家级机构」降做「四级行政机关」--leh？

文建会 chiah-ni̍h-á 紧手的 kā 国家台湾文学馆筹备处 khanjio--起-来，按算 beh 引进济济公务人员，kā kap 国家台湾文学馆筹备处 saⁿ-kap 拍拚 soah 无公务人员资格 ê 契聘人员 lut 任。按呢 kám 有平正？借问文建会 ê 大人，文学馆 chhím 开馆，就向行政法人法制行 ê 发展方向，是 m̄ 是已经为着 beh hō͘ 工作权受政府保障 ê 公务人员，有 koh khah 济选择 ê 机会，choaⁿ-á phah 擦销--去-a？Taⁿ 行政组织不时替换，无彩国家资源，kám m̄ 免向社会来公开说明？Koh 未来公务人员占大多数 ê「国立台湾文学馆」kám ē-tàng sòa 接发挥文学博物馆上大 ê 路用--leh？