《台语kah魔术》

 | | | 转寄

0311现代老师

作者 苏晏德 2025.03.09

现代老师(台语文)
Hiān-tāi lāu-su(Tâi-gí-bûn)

爱的教育袂使骂
Ài ê kàu-io̍k bē-sái mē
老师逐项拢爱会
Lāu-su ta̍k-hāng lóng ài ē
生活课业佮人际
Seng-oa̍h khò-gia̍p kah jîn-chè
亲像爸母的关系
Chhin-chhiūⁿ pē-bú ê koan-hē

爱的教育袂使拍
Ài ê kàu-io̍k bē-sái phah
学生是咱心头肉
Ha̍k-seng sī lán sim-thâu-bah
伊若行为有偏差
I nā hêng-ûi ū phian-chha
老师耐心好好教
Lāu-su nāi-sim hó-hó kà

爱的教育袂使扛
Ài ê kàu-io̍k bē-sái kòng
学生若是较荒唐
Ha̍k-seng nā-sī khah hong-tông
做人处事较放荡
Chò-lâng chhú-sū khah hòng-tòng
金言玉语好好讲
Kim-giân gio̍k-gí hó-hó kóng

爱的教育要求济
Ài ê kàu-io̍k iau-kiû chē
对待学生爱鼓励
Tùi-thāi ha̍k-seng ài kó͘-lē
老师尽心来教册
Lāu-su chīn-sim lâi kà-chheh
教导学生好人格
Kàu-tō ha̍k-seng hó jîn-keh

爱的教育人呵咾
Ài ê kàu-io̍k lâng o-ló
逐个学生拢是宝
Ta̍k-ê ha̍k-seng lóng-sī pó
老师角色像父母
Lāu-su kak-sek chhiūⁿ pē-bó
公平对待爱教好
kong-pêⁿ tùi-thāi ài kà hó

少年教册教到老
Siàu-liân kà-chheh kà kàu lāu
囡仔若是不受教
Gín-á nā-sī put-siū-kàu
目屎吞落毋通流
Ba̍k-sái thun-lo̍h m̄-thang lâu
耐心鼓励免懊恼
Nāi-sim kó͘-lē bián àu-náu

较早老师手若指
Khah-chá lāu-su chhiú nā kí
讲话威严若圣旨
Kong-ōe ui-giâm ná sèng-chí
这马按呢无合宜
Chit-má án-ne bô ha̍p-gî
教学理想莫偏离
Kàu-ha̍k lí-sióng mài phian-lî

人本要求爱谨记
Jîn-pún iau-kiû ài kín-kì
咱的学生像囝儿
Lán ê ha̍k-seng chhiūⁿ kiáⁿ-jî
用心照顾若亲生
Ēng-sim chiàu-kò͘ ná chhin-siⁿ
教出光明一片天
kà-chhut kong-bêng chi̍t-phiàn-thiⁿ