《草地囝仔做牧师》

 | | | 转寄

人生kap基督

作者 林宗要 2010.12.26

用弗所书二章1～10节

「人生」实在有真复杂ê问题，咱若将人生kā伊详细ê分析kap观察ê时，会确实体验tio̍h真chē无仝ê现象。

五花十色ê社会，是ē-tàng表达出人生ê实况，因此ài了解人生siōng好ê所在，to̍h是现实ê社会。

咱若看大众传播ê社会新闻，to̍h koh-khah ē-tàng了解咱ê人生现象。因为社会是群众聚集生活ê所在，siōng ē-tàng反应出人生siōng实在ê情形。报纸ta̍k个月lóng刊出「台湾ê社会实验表」，tùi各方面体验台湾ê社会状况（Mā to̍h是体验人生！），专家tùi无仝ê角度来看台湾ê社会状况，同时用身躯各部分配合说明，比如：心——文化（台湾空间ê非人化）；脑——政治，tī客观现实中chhōe出切实ê可能：肺——环保，核四审查空洞chhèng-chhái、中油炼油厂风波、垃圾水处理、十三行址；运动机能——经济，比如对大陆ê经济、加入GATT（关税贸易总协定）；喉舌——大众传播，电视台向钱看、由特权掌控失去公正性；消化——社会，to̍h是家庭伦理崩盘。

若用医生ê诊断来看台湾ê社会，khi身躯lóng是病，无一位好ê所在，这to̍h是咱台湾社会ê状况，mā to̍h是咱chiah-ê人生活ê环境！

诚然，当咱每工tùi报上看tio̍h--ê，lóng是kui身躯病痛ê社会状况，到底生存tī án-ne ê社会，人生是啥物？

相信身为基督徒ê咱，对人生ê了解比一般人koh-khah深刻chiah-tio̍h！

照基督徒信仰ê看法，人生是为着beh荣耀上帝chiah存在ê。但是当咱详细观察人生ê时，大多数人生m̄-nā bōe-sái荣耀上帝，颠倒是teh侮辱上帝、毁谤上帝。

因为人khah爱生活tī m̄是上帝所起ê世界，mā to̍h是活tī恶势力ê范围内，因此心思败坏、观念bōe正、行为怪奇、生活堕落，是人性ê真实写照，ná亲像保罗tī罗马人书三章10～18节，引用圣经ê话所讲ê人生，to̍h是生活tī罪恶中，「无义人，连一个mā无，无了解ê、无chhōe求上帝ê，lóng是偏离正路，做伙变做无路用，无行善ê，连一个mā无，in ê咙喉是phah开ê墓，in用喙舌弄诡诈，嘴唇内底有虺蛇ê毒气，kui嘴lóng是咒骂苦毒，杀人流血，in ê脚飞走，所经过ê路to̍h行残害暴虐ê tāi-chì，平安ê路in m̄-bat知影，in眼中m̄惊上帝」。

保罗chiah-ê引例，可能应用tī现代ê台湾社会，确实咱是生活tī非常惊人ê中间。

或者有人会讲，chiah-ê惊人ê人生现象，只是少部分ê恶，大部分ê人安份守己，这mā是事实，但是chiah-ê大部分ê人生如何neh？

咱thang用摩西祈祷词来形容chiah-ê人ê实况，「咱一生ê年日是七十岁，若是khah勇壮thang到八十岁，但是其中所矜夸ê，不过是劳苦愁烦，转眼成空，咱如飞chiah去」（诗篇九十篇10节），这是人生ê事实，tī七、八十岁ê人生中，人ē-tàng夸口啥物？总统ê权力、大财主ê好额，或者高深ê学位？Chiah-ê lóng成做ná摩西所讲，转眼成空！Tī大有权力ê人，in所ē-tàng夸口ê是啥物 ？Kám-m̄是kap一般人仝款ê终局，ài面对死亡ê事实。

Tī chit-ê事实面前，任何权力者lóng无法度超脱！Tī-che情况中，到底人生是啥物？

咱若tùi圣经来看人生ê时，咱to̍h ē-tàng了解，创世记一～三章，咱ē-tàng看tio̍h基督教ê人生是啥物？人是被造者，同时有上帝ê形像，上帝将人安置tī伊甸园中，同时上帝koh交代人ài照顾看守上帝所托ê一切。

Tī-che咱thang看出人生ê意义，本来人生是快乐ê存在，但是因为人违背了上帝ê命令，因此，chiah-ê人所有ê特质，lóng被消灭，人无koh活tī快乐ê所在，是活teh汗流满面痛苦ê世界，同时koh充满tio̍h真chē罪恶ê中间。

当时chit种人生m̄是上帝所喜乐，因为无符合上帝ê本意，本来上帝所创造ê人是像tòa-tī乐园hit种，快乐自在，kap上帝有不断往来ê关系，以上帝所赐hō͘人ê智慧kap地方，去完成他所托人类去管理、照顾ê世界（上帝所创造ê世界），che是上帝创造人ê原旨，可惜ê是人m̄-nā无法度完成伊，颠倒kap上帝ê原旨相违背，生活tī上帝所无喜乐ê境况中，这to̍h是人生ê现实。

今á日咱tùi chit段圣经（以弗所书二章1～10节）来思考人生kap基督ê问题。

（一）无基督ê人生（以弗所书二章1～3节）
Tī以弗所书二章1～3中真清楚说明，无基督ê人生ê悲惨状态。

咱tī创世记二～三章，ē-tàng看tio̍h一个离开上帝ê人ê状况。初代台湾教会有真chē宣教师，in真gâu讲台语，因此ē-tàng hō͘人注意tio̍h in，mā善用台湾ê俗语，所以teh布道ê时chūn，通常lóng有真chē人聚集，tī七、八十年前ê台湾社会，无啥物娱乐，因此时常利用暗时tī中心地点举行布道会（我tī四十gōa年前学生时代，tiāⁿ-tiāⁿ参加孙雅各牧师娘tī台北圆环举行ê布道会，当时人khah清闲，所以真chē人参加。）Chit位宣教师提一面铜锣，学台湾式ê扛法，一面扛锣，一面大声喝，「上帝遗失了gín-á！」，因此集合ê人bē少，然后开始用伊真辗转ê台语向群众绍介上帝疼人ê福音！

无基督ê人生，是比如chit位宣教师所讲，是上帝失落ê gín-á，自然tī-chit种状况，便无koh具有属上帝ê特质，咱若看以弗所书二章1～3节，咱就会了解，chiah-ê离弃上帝ê人，in ê生活是何等ê悲哀，奥古斯丁所举ê例完全说明chit-ê事实，hō͘土所淹掉ê银钱，虽然有价值，但是无tī使用者手中，是有名无实，保罗形容chiah-ê无基督ê人生是：

1） 违抗上帝命令ê人生。罪人ê生活无符合上帝ê旨意，你看现代社会中，hiah-ê hō͘罪所控制ê人。Kám-m̄是活tī án-ne境况中mah？

2） In ê灵性死亡。人ê价值tī有上帝ê形像，mā to̍h是有灵性ê人性。但是保罗tī-chia所讲tio̍h chiah-ê无基督ê人生，in是无灵性，自然tī生活上欠缺属于上帝ê表现。

3） 随从世俗ê邪恶，服从恶魔。这是无基督ê生活特色，只要属世ê私欲，lóng是in生活ê内容，in反抗上帝，所以真自然ê成做属魔鬼ê存在。

4） 放纵本性ê欲望kap自私ê意念。是无基督ê人生ê生活方式，咱看现实浪费、娱乐ê所在，lóng是无基督ê人生ê世界，属于基督ê人永远bōe去chit种放纵私欲ê所在！真正ê基督徒bōe去chàm酒家，bōe到色情场所去。

5） 注定受基督ê刑罚。这是对无基督ê人生ê结果ê宣示，因为咱知影，人生是受托ê人生，伊ê意思是有一日，人必须面对主人——khiā-tī上帝ê面前，向上帝交代清楚受托ê责任！但是chiah-ê无基督ê人生，in bōe思考chiah-ê问题，in认为in ê人生是家己ê，一切ê权限lóng是in所有ê。因此，有权ē-tàng采行in所认为ē-tàng行ê生活方式，因为tī in ê人生中，in已经失去了人生siōng大ê价值——灵性，所以无法度判断应该有ê生活方式，hō͘罪所迷惑ê特色是无基督ê人生，你看hiah-ê放纵tī in ê私欲ê人生，任何人ê任何方法，lóng无法改正in堕落ê生活！Chit款tāi-chì tī咱ê人生中，时常ē-tàng体会，有绝对主权ê上帝，对hiah-ê bōe-tàng完成受托责任ê人，一定会kā伊处罚，he就是末日审判。

（二）基督kap人生（以弗所书二章4～7节）
无基督ê人生，m̄是上帝所喜爱ê，因上帝无爱受创造ê人生活tī悲哀之中。Ài化解chit-ê事实，只有tī上帝手中，to̍h是像圣经讲ê，这成肉身，tī人中间，充满恩典kap真理，mā to̍h是上帝tī二千年前tī犹太伯利恒所赐hō͘咱人类ê救主——基督耶稣。

因为他ê来临，改变了人类ê历史，kap人生ê全貌，保罗tī-chia讲：
1） 是上帝丰盛ê怜悯，若m̄是上帝ê怜悯kap恩典，人生是无可能接受荣耀ê救主，因为上帝是公义ê上帝，同时mā是充满慈悲ê天父，路加福音十五章浪子ê比喻，siōng ē-tàng表达出chit-ê事实。

2） 是显出上帝无比ê大爱，他因为丰盛ê怜悯chiah差孤kiáⁿ临到世间，成做人类ê救主，救人脱离hō͘魔鬼所拘束、犯罪乌暗ê生活，他chit种丰盛ê怜悯，是teh表现出他无比ê疼（约翰福音三章16节），mā to̍h是因为上帝无比ê大疼，所以基督chiah会临到世间，来完成救赎ê圣工。

3） 由恩典chiah得救，上帝chit种无比ê疼，就是beh hō͘只要信他ê人，bōe到灭亡颠倒得tio̍h永生。约翰福音一章12节「只要接待他ê，to̍h是信他名ê人，他就赐in权柄，作上帝ê囝儿」。

Chit种基督耶稣ê救赎是信仰ê行为，m̄是óa靠人ê修为、善行ē-tàng化解，人tī上帝面前ê亏欠，是上帝丰盛ê怜悯，愿出他无比ê恩惠，hō͘咱chiah-ê卑微软弱ê人，因信称义，咱今á日所以ē-tàng成做基督徒，是上帝ê恩典，m̄是任何人ê任何功劳，是白白ê恩典，所以主耶稣向学生讲：「Lín白白得tio̍h ê，也tio̍h白白hō͘人」。这to̍h是今á日咱ê教会基督徒所以ài传福音ê事实，因为咱是白白得tio̍h ê，咱有责任将此无比ê恩惠ê福音，绍介hō͘其他ê人。

4） Kap基督同活ê人生，有基督耶稣人生ê人，teh伊ê人生中，确实ài有属基督ê生活（To̍h是像基督ê生活！），mā to̍h是咱常时提起ê，基督耶稣欢喜你做啥物？因为有基督人生ê人，lóng会了解基督ê属性是啥物。所以有基督ê人生（基督徒），必须ài生活teh符合基督耶稣ê真道顶面。

5） 显示出他ê属性——上帝是疼，所以他mā要求属他ê人，必须ài相疼，因为疼ê生活，siōng ē-tàng解释属基督ê性质。以弗所书二章7节「Beh将他to̍h是丰富ê恩典，to̍h是他tī基督耶稣内底向咱所施ê恩慈，显明hō͘后来ê世代看」。

（三）Tī基督内底tsiah得救ê人生（以弗所书二章8～10节）
Tī chit三节圣经中，保罗kā咱讲，tī基督内底tsiah得救ê人生ê状况是：

1） 因信称义，tse to̍h是基督教信仰ê内容，人ê得救m̄是tī家己ê才能，或者家己有啥物优秀ê人生修为，因为chiah-ê人生ê 才干以及杰出ê人生修为，只不过是人应该ê本分而已，mā to̍h是人必须án-ne去生活，讲到干犯ê罪过，是人为ê杰作，任何人lóng无法kā伊化解ê。得救ê唯一条件，是tī「相信基督耶稣是上帝ê kiáⁿ儿」chit-ê信仰ê根基上。

2） 无自夸ê内容，得救ê人生，是teh óa靠上帝ê恩典，是因为信，m̄是因为家己ê行为，是上帝所赏赐（以弗所书二章8节），既然m̄是靠人ê行为，án-ne人就无啥物好夸口（以弗所书二章9节），chia所提起ê夸口，是讲人ê得救m̄是因为人家己ê行为——守律法或者良好ê道德生活，是完全tī上帝白白丰盛ê恩典所赐hō͘ ê，所以人无自夸ê理由，一个体验tio̍h基督救赎ê人，bōe夸口家己，所夸口ê只有主耶稣（哥林多后书十章17节），夸口主ê作为是得救ê人生ê生活方式，tī耶利米书九章23～24节，「耶和华án-ne讲，智慧人mài因为伊ê智慧夸口。勇士mài因为伊ê勇力夸口，财主mài因为伊ê财务夸口，夸口ê是因为伊有聪明，认bat我是耶和华，koh知影我喜乐tī世上施行慈爱公平kap公义，用tse夸口，这是耶和华讲ê」。一个得救ê人，所beh夸口ê，to̍h像顶面讲--ê主ê作为，因为他ê作为，咱tsiah ē-tàng能成做伊ê子民。

3） 受创造，tī基督耶稣内底行好事ê人生（以弗所书二章7节），chit句圣经teh说服得救ê人siōng súi ê生活方式，基督徒所以会做基督徒，是tī基督耶稣内底行好事，虽然咱ê信仰是因信称义，得救kap人ê德性无关，但是一个重生ê人，必须ài有新ê人生，chit种新ê生活to̍h是kap旧ê作为无仝，旧ê生活teh犯罪乌暗不法中，新ê作为是tī光明善行中，属于基督ê人生，必须ài tī基督耶稣内底行好事，tú亲像提多书二章14节，「基督替咱献上自己身躯，救咱脱离一切ê邪恶，hō͘咱成做伊纯洁ê人民，归属hō͘伊，就是ài热心tī chiah-ê好行为」。基督徒hō͘救赎ê使命，是teh行善ê事实。

结论：以弗所书二章1～10节，真清楚kā咱讲：1）无基督ê人生ê悲惨ê状况；2）基督kap人生ê关系；3）Koh-khah重要ê是咱chiah-ê得救ê人生ê表现，咱ài时常存感恩ê心，完成咱ê使命——行善ê人生。