《草地囝仔做牧师》

 | | | 转寄

成功ê失败者

作者 林宗要 2010.09.19

历代志下二十六章4～5、15～21节

通常人tī性格上tiāⁿ-tiāⁿ有chit款tāi-chì，就是teh iáu未达成心中ê理想ê时，lóng会表现出相当ê谨慎kap顶真ê心态，态度谦虚有礼貌，期待ē-tàng得tio̍h心中ê理想，比如：Teh选举ê时chūn候选人lóng会表现出谦虚有礼ê态度，拜托所有ê人共伊支持；但是有一kóa人teh当选了后，伊ê态度就一百八十度ê大转变。我就bat tú-tio̍h一个人有chit种心态，当伊参选议员teh拜票ê时，非常ê谦虚，非常有礼貌，当选了后，态度soah大大无相仝。第二ê就是真chē男女teh恋爱ê时tiāⁿ-tiāⁿ会表现出热情、体贴入心而且koh不时替对方设想为着beh hō͘对方有美好ê印象，hō͘伊认定家己tio̍h是siōng理想ê对象，但是结婚了后往往就走绳啊，teh恋爱中hiah-ê美好ê状况lóng会ta̍uh-ta̍uh-á消失去。

Chit二个例teh说明人ê性格有chit种变化，kap人格问题有真深ê关系，是人ê性格ê表现之一。Chit种情形若tī信仰ê世界内，咱就会了解主责备以弗所教会ê一件tāi-chì，就是离开了一开始ê疼心（启示录二章4节）。

Tī信仰ê过程中，所要求ê是不断进部，这chiah是正常ê，但是tī现实ê信仰生活中有起有落，基督徒应该ài明白灵命成长kap时间是互相影响ê关系，tī属灵ê过程中，灵命jú久ê基督徒伊ê属灵ê状况应该是jú充实chiah合理，m̄-koh现实ê环境中有一kóa老基督徒ê信仰状态无一定会比初信ê基隆徒好，这就是失去仰严肃性所造成--ê。Chit种失去了严肃信仰ê基督徒tiāⁿ-tiāⁿ会失去了信仰所要求ê siōng基本ài项：就是警醒ê心态，信仰若失去了警觉性tio̍h是信仰ê危机。Tī chiah-ê危机中ê基督徒，tiāⁿ-tiāⁿ会发生真chē信仰生活负面ê tāi-chì。

信仰ê本质是建立tī 不断ê警醒中，所以若失去了谨慎ê态度ê时，无细腻to̍h会失去了伊ê本质。圣经中有真chē chit种失去警觉ê事例，好亲像挪亚ê食酒醉，圣经写伊tī hit-ê时代是一个完全ê人，chit-ê完全ê人为是án-ná会失态？另外大卫王tī旧约圣经中mā是上帝所喜乐ê人，因为伊顺服上帝ê命令，但是伊tī太平之日ê时soah犯了侵犯别人ê bó͘ ê罪，（夺取乌利亚ê bó͘拔示巴，撒母耳记下十一～十二章），参孙、扫罗王chiah-ê人teh开始ê时lóng真成功，为何会失败？主因tī in失去了信仰生活中siōng重要ê koân度警觉。咱thang tùi现实ê社会来体会chit-ê tāi-chì；前一暂仔欧洲一小国ê公主tī海墘仔上穿3点式ê泳衫，hō͘记者hip tio̍h koh共伊刊tī杂志顶koân，引起了保守ê人民非常大ê批评kap攻击。比如用现代ê标准，穿泳衫tī海墘á应该是无问题，为什么chit位公主会hō͘人攻击？主因tī伊ê身分kap地位，伊若是普通人就无问题，只因为伊是一位公主，所以伊ê行为kap表现tio̍h必须ài符合伊ê身分地位，遵守顶下尊卑ê礼仪规范。咱mā时常听tio̍h一句话：「怎样án-ne无体统？」基督徒必须ài认清咱应该ài有ê体统是啥物？这是基督徒生活中一件重要ê tāi-chì，tī圣经以弗所书五章３节；罗马书十六章２节lóng提起体统ê原则，好好á运用伊，就会帮助基督徒信仰生活上有美好ê表现，chiah ē-tàng荣耀主。

基督徒ê体统就是行事奏人必须ài kap上帝ê福音相仝，tī圣经腓立比书一章27节；；以弗所书四章1节，lóng bat提起，施洗约翰向当时tī伊身躯边ê人--讲：「lín ài结出果子来，kap悔改ê心相称。」（路加福音三章8节）。因为chit种生活方式是上帝向只要属他ê人所要求ê生活方式。旧约或者新约中，上帝lóng期待伊ê子民有体统ê生活，但是可惜--ê是teh信仰ê过程中，上帝ê子民tiāⁿ-tiāⁿ表现出无体统ê情形，教会生活中mā时常thang看tio̍h信仰ê危机kap变节。

教会中形形色色ê基督徒，有一kóa确实tī各方面lóng值得o-ló，热心、忠诚、尽职、有好ê见证，但是负面ê基督徒mā有，假仙假ta̍k，对教会恐惊有负面ê影响，时常有破坏ê行为soah无有建设ê作为，chit种人讲道理出口成章，生活soah无见证，谈吐老练，但是tī伊ê行为上soah真恶质，tī教会中、社会上、家庭内底lóng bōe-sái荣耀上帝，对教会ê事工完全是负面影响，chit种基督徒khah会出状况，因为伊无谨慎ê信仰生活，tī教会史上chit款tāi-chì ê例真chē，旧约中mā有真chē chit种成功了后koh失败ê人；比如罗得、巴兰、参孙、扫罗王、所罗门王，咱今á日所读ê chit段圣经就是teh说明乌西雅王ê事实。

一、 成功ê乌西雅王
照圣经ê记载，伊十六岁就继承王位，是年岁真轻tio̍h有作为ê明主。乌西雅行耶和华感觉是好ê tāi-chì，效法伊老父王亚玛谢所行ê一切。先知撒迦利亚在世ê时chūn，乌西雅定意chhōe上帝，耶和华上帝就hō͘伊亨通（历代志下二十六章4～5节）Chit-nn̄g节圣经teh说明乌西雅成功ê主因。以色列人ê政治kap宗教ê关系，是真密切ê结合，政治建立tī hō͘神管理ê主体内。Tī以色列王中有好bái ê差别，通常描写明主ê时lóng会讲：「某某人tī toh位做王做几年，伊行耶和华所有感觉是好ê tāi-chì。」Iáu会提起伊ê老母是什么人，强调母亲对王ê影响，差不多每一个王lóng用chit种看法，以耶和华所看做是善、是恶ê作为来决定 chit-ê王ê好iah bái。

Chit-ê事实teh说明以色列ê王kap其他国家ê王无仝，tī in做王ê期间in ê生活必须ài符合耶和华感觉是好ê tāi-chì，来成做in ê好iah bái ê标准，这只有以色列ê国王chiah有--ê特权。Tī以色列人中in理想ê王m̄是所罗门，是大卫王，虽然伊bat犯下真大ê罪，但是整体讲来伊是一位有正面价值ê王，是tī in-ê民族中siōng受着敬仰ê王。以色列人认为in是亚伯拉罕ê后代同时mā是大卫ê后代。马太写基督耶稣ê家谱ê时，起头写讲「亚伯拉罕ê后代大卫ê kiáⁿ孙，耶稣基督ê家谱……」（马太福音一章1节）Tùi chia看出以色列人心中理想ê王是大卫王，tī旧约中tiāⁿ-tiāⁿ有「坐大卫ê宝座」、「大卫ê城」、「大卫ê厝」kap「大卫ê后代」等等lóng teh强调chit位以色列人心目中理想ê王ê事实。

好亲像头前所讲--ê，大卫王虽然有缺点，但是整体来讲伊是符合上帝心意ê王，因ūj伊teh执行上帝交hō͘伊ê王位ê时，tiāⁿ-tiāⁿ遵守siōng帝ê旨意去做，这就是伊所以替上帝所喜乐ê主因；伊表现出信仰ê伟大性格，用顺服上帝ê旨意行事做人，这就是以色列王国成败ê主因。圣经中有关列王ê成败记载，tī成功者时常thang看tio̍h伊受祭司、先知以及家己ê母亲指引ê描写，tú亲像历代志下二十六章5节「当通达神启示ê先知撒迦利亚tī ê日子，乌西雅王定意ài求耶和华，上帝就hō͘伊亨通。」历代志下二十四章2节「祭司耶何耶大在世ê时chūn，约阿施行耶和华所感觉是好ê tāi-chì。」成功是人顺从了上帝ê话，但是mā是ài有敬诚ê人tùi边仔kā伊教导kap感化，siōng重要ê是信仰者必须ài亲身体验建立kap上帝ê密切关系，若无身边ê人若无tī ê时，伊ê信心真简单tio̍h会产生危机了。

二、 成功了后ê失败
Chit件tāi-chì对人生来讲是非常大ê遗憾kap损失，tī现实ê人生中beh成功并m̄是一件简单ê tāi-chì，但是事实上tī人生中像乌西雅王chit种成功了后koh失败ê人真正是chē kah-ná 山咧。咱看人生ê现实就会了解；无论tī政治舞台，teh经营事业上，或者tī家庭ê尪仔bó͘ ê关系上lóng有chit种状况，tī现实中咱会看tio̍h一时真出名ê人成做犯人、失败ê角色，非常好额ê大事业家破产，恩爱ê夫妻soah来结冤仇，chiah-ê lóng是真贴切ê例。探讨伊ê原因，lóng伊ê来有自。咱看乌西雅王，当伊顺从上帝听从伊ê命令ê时上帝to̍h hō͘伊兴旺，名声远播，因为伊非常强盛（历代志下二十六章８节、１５节），「伊既然强盛，心就会骄傲to̍h会造成腐败，干犯耶和华伊ê上帝，入耶和华ê殿堂，ài tī香坛烧香」（历代志下二十六章１６节），这就是乌西雅王失败ê主因。强盛了后心内产生骄傲，骄傲是注定ài失败。Tī圣经中有关骄傲ê说明：「骄傲若来、见笑mā会来」（箴言十一章２节）「失败ê先人心若骄傲，尊荣以前一定有谦卑。」（箴言十八章１２节）

彼得讲：「上帝阻挡骄傲ê人，恩赐hō͘谦卑ê人。」（彼得前书五章５节），本来乌西雅王ê名声远播koh得tio̍h非常ê帮助chiah强盛；照理伊应该ài珍惜chit种人生ê福份，可惜人性ê通病往往会「因富而骄」因此来败亡，tī-chiah说明人ê惊人ê罪性「骄」，伊造成了人ê失败kap悲剧，因为tī伊ê心中充满了自大ê心理，轻视是骄傲ê人ê生活方式，人若有轻视ê心存在，无论做任何tāi-chì lóng 真pháiⁿ成功；人kap人之间必须ài互相尊重，chiah会有美好ê结局，而且人tī上帝面前koh-khah ài谦卑来面对人生，上帝理想ê信仰者一定是充满了谦卑ê心态ê人生，这就是彼得所讲「上帝阻挡骄傲者，赐恩hō͘谦卑ê人」ê真理，骄傲者无kā上帝ê存在囥在眼内，自然bōe遵行上帝ê旨意chiah有违法ê行为，做事tiāⁿ-tiāⁿ 超过人ê界线，连m̄是伊所属于ê范围伊mā想beh去插手，「去祭坛烧香」Tī旧约中这是祭司chiah ē-tàng去执行ê事工，但是伊soah想beh用王权去做m̄是伊分内应该做ê khang-khè，伊ê结局就是hō͘上帝弃绝，身躯致tio̍h ma-lá-lí-á来死，chit-ê病tī当时只有上帝ê怜悯chiah可能得tio̍h医治，若无只有死路一条，tùi真亨通强盛名声远播到hông 赶出去ê过程to̍h是伊siōng大ê悲哀，大概无比chit种人生状况koh-khah不幸ê tāi-chì啊。

三、 人生ê鉴戒
人生是teh建立属于家己ê完美kap幸福，当然乌西雅王ē-tàng讲是有钱有势，是幸福ê人生，伊具备了人生所希求ê各种美好条件；伊ê幸福人生确立tī（一）听从先知ê教导。（二）定意走找耶和华上帝。只要具备chiah-ê条件就有够来承受上帝无限ê祝福，可惜ê是伊失去了人生siōng重要ê性格，就是谦卑kap顺服。因为信仰者kap上帝之间ê关系是tī互相ê关系顶koân。好亲像历代志下十五章２节「lín若顺从耶和华，耶和华一定kap lín同在，lín若走找伊，就一定会chhōe tio̍h伊，lín若离弃伊，伊必定离弃lín。」

Chit种互相关系ê建立to̍h是基督徒信仰生活ê内容，mā to̍h是主耶稣讲ê「因为离了我，lín就bōe-sái做什么。」（约翰福音十五章５节）乌西雅王ê事实确实ē-tàng当做咱信仰ê鉴戒。

Tī人ê一生中，一时ê兴旺、成功真pháiⁿ断定成败，俗语讲：「盖棺论定」就是teh说明最后ê成功chiah准算，因为tī人生中有真chē人tī青壮年ê时的确相当成功，但是到路尾soah 起变化，用悲剧收soah；无论tī政治上、经济上或者是家庭生活上lóng有chit种实例，这是人生siōng大ê不幸，成功了后ê失败，感受是非常ê痛苦。Chit款事例tī圣经中ê教示kap 一般ê人生状况中，四界thang看，这是值得咱当做鉴戒--ê，伊ê症结是teh强盛了后离开上帝、m̄听上帝ê话。所以咱ài tī生活中不断来用上帝来做咱ê指引kap导师，chiah ē-tàng有回应上帝要求ê人生生活。

结论：乌西雅王ê事例是一面镜，用伊ê情形不断来反省咱ê生活，ài做永远ê成功者，必须ài坚持到底chiah有胜利ê冠冕。