《陳雷文選》

| | | 轉寄

暗殺者

阿明半暝轉來到厝,老母猶未睏teh等伊,入門tō問:“敢有影?美國á kap咱斷交”“有影lah,新聞teh報。”“是按怎beh kap咱斷?”阿明無想著老母thàn食人賣蚵te,也會問這款kap美國á外交ê問題,chhìn-chhái tō應:“Khi-mo͘-chih bái tō斷。”
“Ah有要緊無?”這日有人客買蚵te,kā伊tâu:“Taⁿ台灣知慘a。”所以這暗蔥命猶m̄睏,專工等阿明轉來,beh問伊有要緊無。“阿母,你ta̍k日tī巷á頭煎蚵te,我tī市á賣虱目魚丸湯,hit個美國á總統腳踏,敢成實bat來交關一擺?斷無斷,生理照作,有啥關係?…作你去睏lah,免煩惱che有ê無ê。”蔥命坐hia想,這個美國á總統mā是真無情,hoah斷tō斷。

太平境教會作禮拜ê時,攏有這個生份人坐sòa尾排,無teh聽道,也無teh讀經,祈禱ê時目尾sut來sut去。便衣ê裝作會友teh監視,大家攏tèⁿ m̄知。信堅牧師ùi台南神學院出來到taⁿ,牧會已經30外冬,kā in某講:“伊來chia聽我講道理,tī這間聖堂ê十字架下底,聽會著ê攏是主叫我講ê話。”所以也tō無計較伊。這個禮拜,美國宣佈,新年正月初一起斷交台灣。伊tī台á頂向眾人念:“…上帝a,你bat棄sak阮,破壞阮,你bat受氣阮。求你hō͘我興起。…你用旗賞賜敬畏你ê人,thang為真理gia̍h起來ia̍t。求你拯救阮,用正手牽救阮,thang hō͘敬畏你ê人得著救。…”阿明坐tī頭前排,bē輸牧師目睭掠伊看,嘴對伊講。敬拜soah,會友攏tiām-tiām,大概kap巷á口買蚵te ê人客仝款心情沈重:“Taⁿ台灣知慘a。” Hit日以後,ta̍k暗beh睏進前,阿明讀詩篇六十篇:“…你bat棄sak阮,破壞阮,你bat受氣阮。求你hō͘阮興起。…”M̄-kú一個問題khê tī心khut,bē tàng解決。過來二禮拜,暗靜去chhōe牧師。

請教伊:“有人beh傷害我,我kā伊ê手骨掠leh,m̄ hō͘伊傷害。Che敢是基督ê教示?”牧師應:“有人beh kā咱tìm石頭,咱kā伊ê手骨掠leh,m̄ hō͘伊tìm石頭。有人beh kā咱車落古井,咱kā伊ê手骨掠leh,m̄ hō͘伊車。有人beh傷害咱,咱kā伊手骨掠leh,m̄ hō͘伊傷害。因為咱敬畏主,伊tio̍h kā咱保護,hō͘咱無受傷害。”阿明ta̍k暗生理作soah,轉去厝祈禱:“有人傷害我ê土地,我beh kā伊手骨掠leh,m̄ hō͘伊傷害。有人kā阮ê百姓tìm石頭,我beh kā伊ê手骨掠leh,m̄ hō͘伊tìm石頭。有人kā阮ê國家車落古井,我beh kā伊ê手骨掠leh,m̄ hō͘伊車。…主a,請你用旗賞賜敬畏你ê人,thang為真理gia̍h起來ia̍t。”經過二個月,koh去請教牧師:“我ta̍k日請求主,用旗賞賜敬畏伊ê人,thang為真理gia̍h起來ia̍t伊攏無聽著。”牧師牽阿明ê手,chhōa伊祈禱:“主a,tī阮無看見ê時,請你hō͘阮有目睭;tī阮無聽著ê時,請你hō͘阮有hīⁿ空;tī阮躊躇驚惶ê時,請你hō͘阮勇氣kap智慧。”Kā阿明講:“你tio̍h耐心等候主ê安排。”

受難節前一工,規日烏陰,雨sap-sap滴,bē輸這年天頂ê憐憫早一日到位,提早落受難日ê雨。人講che雨水是天teh流同情ê目屎,thang洗食苦人ê苦心。暗頭á,牧師暗靜叫阿明去,kā伊講:“明á chài耶穌受難日,主beh用旗賞賜敬畏伊ê人,thang為真理gia̍h去起來ia̍t。”阿明瞭解牧師ê意思,應:“我等候真久,已經準備好a。Thang為真理gia̍h旗á起來ia̍t。”牧師講:“感謝主,伊叫你擔這個重擔。”Ùi thoah á底the̍h一個塑膠袋á出來,交hō͘阿明,講:“攏tī chin。”Koh講:“Tōaⁿ二槍,tōaⁿ chia。”比家己ê胸坎。Koh吩咐:“藥á先吞落,tōaⁿ了m̄ thang走。”阿明知影,若是活活掠去,受苦刑,秘密會漏洩出賣---。“攏總幾分鐘?”阿明問。牧師應:“有夠lah,---15分。”He藥á已經hō͘豬á試驗過,吞落去15分鐘,藥氣才會到。所以牧師講,有夠lah,15分。阿明kā塑膠袋藏好,o͘-to͘-bái駛leh轉來。老母已經睏a。袋á tháu開,內面一本厚冊,基督山恩仇記,中央ó͘一空,內面khǹg一枝槍,另外一個細包紙,內面一粒藥片。Té槍the̍h出來巡好勢,槍chí入好a,the̍h一張紙來寫:“Mn̂g-á-chài I iōng bah-thé thè chē-chē lâng siū-lān。”親像伊這時人peh上koân山瞻kún-iāⁿ ê大海,目睭看真明白,hīⁿ á聽足清楚。

小北á無牌ê販á聽著風聲,警察總出動,上大粒ê beh來,早tō先走lī-lī。未中晝,警察大隊tō先到,巷á頭、大路口封起來,市á內面人客趕了了。He警察齊齊khiā規排,一個óa一個ùi大路排入去到市á內面,攏胸前mo͘h棍á,kha-chhng頭phāiⁿ té槍。阿明已經計算好勢,豬哥嘴ê ùi這旁大門入來,行到‘阿香鱔魚麵’,伊tō衝出去,tōaⁿ二槍,tōaⁿ胸坎。牧師講,時間有夠,攏總15分鐘。

“總統萬歲!---總統萬歲!---”外面人teh hoah,續落一陣人e-e sak-sak ùi這旁大門入來。一個中年查甫人é-é tǹg-tǹg,圍tī中央,戴一頂野球帽,有一個豬哥á面鬥豬哥á嘴,掛一副烏框目鏡。“總統萬歲!---總統萬歲!---”Hia ê販á tòe人hoah,豬哥嘴ê kā大家ia̍t手。阿明也tòe人hoah,看he豬哥嘴ê向‘阿秀鱔魚麵’這旁行來,趕緊藥á that入去嘴內,ku̍t一下吞落去。Tú-tú這時,無代無誌oat一個頭,注死看著一個查某gín-á tī大門口路邊teh賣衫,he面皮若桃á日頭pha̍k熟去,水紅赤紅;he目神若真珠月光洗過,烏金光通,soah一個豬哥á身魂若魔神á掠去天頂飛,雙腳釘死m̄進前,雄雄hoan一個身,se̍h一liàn-tńg,又koh向大門口oat倒出來。

這頭月光看一群人來,叫是生理到,hoah:“人客買衫來,俗ê lah。”The̍h一領大花ê香港衫tī手裡lāng。豬哥嘴tìm一個頭,便衣ê chhîⁿ óa去,kā月光e過來伊身邊。二粒niau鼠目chhuh-chhuh,笑微微講:“好,好。”Koh iⁿ-iⁿ ò͘ⁿ-ò͘ⁿ 問月光,月光聽無,學伊講:“好,好。”豬哥嘴歡喜,the̍h香港衫來穿,一手moa月光ê肩胛。隨tō有人chhih-chhih chhia̍k-chhia̍k hip相。便衣ê chhōa頭拍phok-á,販á也拍phok-á,當teh鬧熱koh燒lō。真是萬事人teh作,天teh chhiâu,tō是準準這時,雄雄雷公sih-nà ,頭殼頂烏天暗地,lin-lin lòng-lòng,phi-phi phia̍k-phia̍k,bē輸天pit--開,soah teh青狂siàng大雨。若像是雷公kòng 著,sih-nà chim著,he豬哥嘴ê一個面反青,驚kah神神hāⁿ-hāⁿ chhāi tī hia,雙腳直直chùn。便衣ê驚出代誌,作一下chhîⁿ óa來,一siū狗hia kng大餅,e-e車車sak上車,hu̍t一下拚死逃命,走kah無看去。

Taⁿ m̄知是thái chiah龜怪,即時大雨停,雲無去,天也清起來,日頭又koh大出。警察pi-á pi-pi叫,大聲細聲直直pûn,衝來大路頂趕人。市á內ê販á hoah:“去a!去a!”阿明tòe人chông出來看,害a,車kap人攏無去a!驚一tiô,拚死jiok mā bē赴a。趕緊chông倒入去,hit堆虱目魚丸thia̍p尖尖,一chhok koân-koân內底藏一枝té槍,kâⁿ起來,規個piàⁿ落去ka-chù,kōaⁿ leh tō走。Chông入去便所,掛槍掛丸á攏總倒落去屎ha̍k。Tú好15分鐘時間到,藥氣發作,頭殼hîn一下,phiāng一下倒tī土腳m̄知人去。

太平境教會hit暗受難節敬拜,阿明kap蔥命無來,信堅牧師有注意著。電視報告,蔣總統巡視台南府城,專工去小北á慰問thàn食人,慈祥關懷,親民愛民。Mā有一手moa一個súi查某gín-á kap伊hip相。無講驚一下面青sún-sún,bih青狂雨ê代誌。隔日早起,蔥命來chhōe牧師,tàm頭敬禮,問伊:“敢m̄是主放sak咱?”牧師知影,暗殺失敗,阿明犧牲。Hit陣青狂雨kap hit個súi查某gín-á救著一條豬哥命。蔥命the̍h一張紙念:“明á chài伊用肉體替chē-chē人受難。”Tō是阿明用羅馬字寫ê最後ê話。原來暗殺ê計謀蔥命早tō知影,tiām-tiām無講也無問,tèⁿ m̄知。目屎lún--leh,雙手抱tī心頭,牧師應:“主無放sak伊。親像主耶穌釘十字架ê時,伊叫主a,你thái會放sak你ê親生kiáⁿ?M̄-kú主無放sak伊。”Kā蔥命行禮。

告別式hit時,牧師tī台á頂講:“…主a,請你拯救阮,用正手牽阮,thang hō͘敬畏你ê人得著救。…”告別式soah,蔥命來chhōe牧師,the̍h一個塑膠袋á交hō͘伊,內面一本厚冊,基督山恩仇記,無khǹg槍也無藥á,問牧師:“主用正手牽伊,thang為真理gia̍h旗á起來ia̍t,hō͘敬畏主ê人得著救。…為啥物失敗?”牧師tiām-tiām kā塑膠袋kap冊收起來。伊知影,這個thàn食ê老人蔥命,tī chia失去伊ê kiáⁿ,mā失去信主ê心。伊為伊懇求痛心艱苦。

1979年正月初一,美國kap台灣斷絕外交。買蚵á te ê人客又koh kā蔥命tâu:“台灣taⁿ知慘a。”Tēⁿ飯丸ê勇a受氣,罵人客:“知啥物慘?!家己soah攏無半撇?!”Hit年受難節警備總司令部並無暗殺蔣經國ê案件記錄。Kan-na hit日小北á派出所派人調查,賣虱目魚湯ê販á鄭恩明4月初9 tī公共便所暴死,講是pháiⁿ gín-á食毒,記錄是按呢寫。

1984年,「台灣獨立革命軍第5小組案 」破案。掠呂清波、賴信堅kap蔡水火三人。呂清波來往日本,主動聯絡台灣獨立革命軍總部,陰謀暴力推翻政府,算是主犯,判無期徒刑。從犯賴信堅、蔡水火二人,攏判25年。M̄-kú這個前後攏無查著1979年受難節暗殺蔣經國ê代誌。

1987年蔣經國過身前6個月,台灣39冬戒嚴令解除。蔥命hit年74歲,專工陪牧師娘去泰源監獄探監,看信堅牧師。牧師已經頭毛攏反白a,蔥命kā伊講:“咱解嚴a。”牧師歡喜,應:“我知影。”蔥命koh問:“敢是原來主無放sak咱?”牧師知影伊ê意思,應講:“咱信心永遠,伊無放sak咱。”蔥命想起八冬前,受難節暗殺失敗,失去伊ê kiáⁿ ê時,牧師講ê話:親像耶穌釘十字架,伊叫主a,你敢放sak你ê親生子?M̄-kú主並無放sak--伊。這時蔥命koh再念阿明寫ê話:明á chài伊用肉體替chē-chē人受難。牧師tìm頭,用目光牽牧師娘kap蔥命,kā這二個一世人蔥á命ê老查某人講:“Tio̍h照顧,靠家己。”牧師娘真自信講:“有人beh kā咱tìm石頭,咱kā伊ê手掠leh,m̄ hō͘ 伊tìm石頭。Thang gia̍h旗á為真理起來ia̍t。阿們。”