《雙文開講》

 | | | 轉寄

麻油雞kap芳草橄欖雞 （ṲI）

作者 Ông Cheng-bûn 2005.11.13

多林ê笑容有kha開lah，他講：「凱伊—今—今á日beh煮一款法國南部ê菜，是氣味特別ê雞。希望妳會kah意。」

Chiah講到凱伊，他就粗腳重蹄衝入來，大聲問：「Lín阿母聖誕節送你ê禮盒khǹg去toh?我需要內底ê芳草！」

凱伊tùi櫥á內chhōe出一個淺茄á色ê盒á，內底有兩罐色緻無siâng款ê橄欖油，kap一包曝乾ê芳草，發出迷迭香kap薰衣草ê味。裝油ê玻璃矸á是四角形ê，頂面貼有手繪ê水彩風景圖，畫ê是橄欖園風光。矸á頂koh黏一隻薰衣草色ê絲所作ê尾蛺á。裝芳草ê布袋mā是有印風景圖，充滿日光ê田園，有深綠色ê絲杉發tī石牆邊。

「Oah！多林in老母真有品味！」我hō͘ hit-ê精緻ê禮盒感動tio̍h。
「是ah！她知影多林特別kah意chit味『普羅文斯雞』，就趁去法國南部旅行ê時，替他帶橄欖油kap當地ê芳草tńg來。她對作料ê要求真koân。」
「什麼是『普羅文斯雞』？」

這是凱伊所愛ê話題，他ê目珠金起來：「Ah！這是充滿地中海ê日光kap芳味ê菜：就是將piak過ê雞肉，kap蒜頭、洋蔥、甜椒、柑á蜜作伙用橄欖油來炒，然後倒兩碗雞湯落去，來燉，普羅文斯ê芳草百里香、迷迭香、鼠尾草、薰衣草等等芳料kā撒(sám)落去，beh起鼎ê時，koh khǹg二十幾粒烏橄欖入去，加強橄欖味kap口感。橄欖芳kap草藥芳lām作伙，真讚！今á日有正統ê普羅文斯芳料，保証hō͘妳感受tio̍h普羅文斯青藍無雲ê天！Ah！雞腿tio̍h m̄-thang hō͘臭火焦去！」凱伊芳草the̍h teh，koh衝入去灶腳loh。

我將禮盒蓋好，收入去櫥á內，輕輕摸hit隻薰衣草色ê尾蛺á，想hit位老母ê心情。「希德佳想beh帶hō͘你普羅文斯ê日光kap歡喜ê心情。」我希望我ê口氣無帶責備ê味。

多林深深吐大氣：「我真想beh愛她、敬她，總是我mā不時想beh逃出她關心控制ê網，阮無法度避免互相傷害。」

外面ê雨愈落愈大，風將雨滴重重摔tiàm窗玻璃。
「咱m̄是beh討論講道ê tāi-chì？咱來講耶穌tī加利利ê迦拿，婚禮上將水變作酒ê故事好無？Tī hit-ê故事內底，耶穌ê老母mā有出現。」
「我感覺解釋神蹟chiok困難。」
「若是咱親身經驗過神蹟，根本m̄免用理性去解釋。」
「將水變作酒，m̄是救人出死入生，mā m̄是醫治ê神蹟。約翰福音講：這是耶穌所行ê第一ê神蹟，我真bē了解。」
「酒，咱ē-tàng將它看作是hō͘人變歡喜、變輕鬆ê力量。婚禮ê筵席，是人kap人作陣慶祝一個新ê關係ê開始，gín-á beh脫離家庭，kap人生ê同伴tàu陣行，做序大人--ê beh學習放棄控制權，hō͘ gín-á家己來飛。He其實是一個真緊張ê場合，特別若是婚宴拖了長長長，看起來無盡頭ê時，人會thiám kah無氣力來歡喜。Tī咱人生，豈m̄是有真chē chit款時刻？Tī為家己新ê人生掙扎ê時，咱無力去感受愛kap歡喜，只有感受會tio̍h欠缺、阻擋kap傷害。」
「耶—耶穌ê老—老母看tio̍h ê是欠缺。她看tio̍h酒用了去ah。」多林講：「親像阮母á，隨時lóng注意到欠缺、錯誤kap失面子ê tāi-chì。」
「總是耶穌ê老母知影，她ê kiáⁿ ē-tàng補足欠缺，hō͘人得到豐富、快樂ê新氣力。」
「總是他回答講：『我kap你有什麼干涉？我ê時iáu未到。』他無ài因為老母下令，他就去做。他有他ê時間，老母mā tio̍h學習尊重他。我真kah意chit點。他是一位敢去傷害阿母ê kiáⁿ。」多林笑kah親像小丑á，我m̄知他是作孽，á是認真teh講。
「總是無他ê老母提醒，ná會有後面歡喜kap豐富ê奇蹟leh？」我堅持立場，為老母講話。

故鄉台灣，我ê阿母bat耐心等待，等待我脫出憤世嫉俗ê刺毛蟲衫，細細膩膩用家己ê翅來飛。阿母bat耐心等待，等待壓迫阮心ê無情結構，漸漸解消去。她m̄-bat放棄希望。她知，苦酒、老薑母kap深色ê麻油，tī溫火ê耐性陪伴，會成作金黃、甘甜、溫熱ê奇妙湯汁。

「食飯loh！」大kho͘凱伊將多林抱起來，親像攬一隻活跳跳，一直扭動ê大龍蝦。希德佳過去是怎樣家己一個人將chit-ê gín-á抱起抱落，四界求醫？她ê腰脊骨，tī chē-chē冬ê勞動中，是àn怎iáu ē-tàng挺kah hiah直leh？ 凱伊幫助多林坐入去輪椅，將他sak入去灶腳，我tòe入去。南國芳草ê芬芳撲面，燉雞ê氣味迷人。桌頂有一罐冰過ê白葡萄酒，青綠ê酒矸á頂，水氣結作細粒珍珠。將酒倒入圓肚ê玻璃酒杯，酒色清黃，親像清早ê時，日頭iáu未出來，天邊ê黃白色緻，卻已經teh預報日頭ê路程。

我將吸管插入多林ê酒杯，杯á貼óa他正pêng ê面，手貼óa他青白ê皮膚，幫助他lim酒。然後，我chiah來品自己杯內ê酒。清涼ê酒，流落喉了後，chiah開始變溫去，去到腹內，開始燒起來。酒hō͘我放鬆，hō͘我笑起來。多林本來無力、垂tī胸前ê頭mā 起來，看我，對我笑，講：「多謝你來。」

食一嘴芳草橄欖雞，bē記得窗外ê風雨。我teh想hit-ê淺茄á色ê禮盒。有一位老母將南方ê日光kap芳味，包tńg來hō͘她ê kiáⁿ。她ê kiáⁿ可能暫時bē-tàng愛她，因為他iáu teh追chhōe家己ê自由。她ê kiáⁿ kap她鬥氣，互相傷害。總是，普羅文斯ê日光、芳味kap歡喜，穿透用情緒砌起來ê厚牆，透過味覺，透過鼻覺，將老母ê關懷送到kiáⁿ兒ê身上。（全文完）