《《原鄉．夜合》 客語詩集》

 | | | 轉寄

客人花 Hak ngìn fâ

作者 曾貴海 白話字：邱淑華 2008.03.23

愛香花ke客家人
Oi hiông fâ ke Hak Kâ ngìn
帶著樹蘭含笑桂花同夜合
Tai tén su làn hàm chhiáu kui fâ tùng ya ha̍p
佇落腳ke地方
Thê lo̍k kiok ke thi fông
種下族群香
Chung hâ chhu̍k khiùn hiông

沒分春夏秋冬
Mò fûn chhûn ha chhiû tûng
一年四季開滿庭院屋家
Yit ngiàn si kui khôi mân thìn yan vuk khâ
日日夜夜
Ngit ngit ya ya
客家人ke生命花謝了又開
Hak kâ ngìn ke sên miang fâ chhia liáu yu khôi


Ngài還記得
Ngài vàn ki tet
隔壁莊ke表姊嫁ke時節
Kak piak chông ke peú chí ka ke sṳ̀ chiet

阿婆偷偷摘幾串樹蘭
 phò theû theû chak kí chhon su làn
插入兩邊髻棕
Chhap ngi̍p lióng phién ki chûng
牽著ngài ke手
Khiân tén ngài ke sú
行去食喜酒
Hàng hi sṳ̍t hí chiú

仰頭看佢
Ngo theù khon kì
笑到比新娘更嬌惜
Seu to pí sîn ngiòng ko kiêu siak