《台语荒漠甘泉（全罗版）》

 | | | 转寄

"Hok-poe móa-chhut-lâi"

作者 陈清俊 翻译 2012.05.27

listen

Gō͘ ge̍h jī-chhit (Gō͘ ge̍h jī-cha̍p-chhit ji̍t)

"The̍h lâi hō͘ góa." (Má-thài 14:18)

Chit-sî, lí sī-m̄-sī tú-tú ūi-tio̍h chióng-chióng ê khùn-lân, khiàm-kheh, chhì-liān, kín-kip teh chhau-hoân? Che sī Siōng-tè kiòng-èng khì-béng ê hong-hoat beh ū Sèng-lêng koàn-móa. Nā-sī ū chèng-khak ê liáu-kái, chiū khòaⁿ che sī sin ê chiok-hok, sin ê chín-kiù ê ki-hōe, sī tùi pa̍t-ūi tit-bōe-tio̍h ê.

Chú kóng, "the̍h lâi hō͘ góa." Ēng sìn-sim kap kî-tó the̍h khì-béng kàu I ê bīn-chêng. Chēng-chēng tī I bīn-chêng, bô ka-kī tín-tāng, thèng-hāu I chòe kang. I bô kiò lí chòe, chiū m̄-thang chòe jīm-hô kang. Hō͘ Siōng-tè ū sî-kan lâi chòe, I it-tēng ōe chòe. Tng chhì-liān ui-hia̍p lí kàu bô-sîn, sit-táⁿ, koh khùn-khó͘ ê sî, Siōng-tè beh ēng lí só͘ m̄-bat ê hong-hoat, hián-chhut I ê un-tián kap êng-kng tī lí ê sin-chiūⁿ.

"The̍h lí ê su-iàu lâi hō͘ góa." --- A.B. Simpson "Koh góa ê Siōng-tè beh chiàu I êng-kng ê pù-ū, tī Ki-tok Iâ-so͘, pó͘-chiok lín it-chhè ê khiàm-kheh." (Hui-li̍p-pí 4:19)

Hô-téng ê goân-thâu --- "Siōng-tè"! Hô-téng ê kiōng-èng --- "I êng-kng ê hong-hù"! Hô-téng ê koán-tō --- "Ki-tok Iâ-so͘"! Chiong lí it-chhè só͘ su-iàu ê kau-thok hō͘ "I êng-kng ê hong-hù", sī thiⁿ só͘ sù hō͘ lí ê koân-lī. Tī I úi-tāi ê thiàⁿ tiong-kan, I ǹg lí khai-hòng hit ê hong-hong hù-hù ê pó-chông, ēng sûn-chin ê sìn-sim chìn-ji̍p khì hiòng I the̍h, lí chiū bô koh óa-khò pa̍t-hāng jīm-hô ê mi̍h-kiāⁿ. --- C.H.M.

Hok-poe móa-chhut-lâi (Si-phian 23:5)

Móa koh-chài móa,
Chú thang i-óa,
Múi poe thîn-móa,
Hô lâu kóng-tōa,
Bô pó-liû, chin khoah,
Hong-sēng chiap-sòa,
Thiàⁿ-thàng koàn-móa.

Móa koh-chài móa,
Chú chhin-chhiú chhōa,
Kám-un niá-siū,
O-ló I kiù,
Móa-chiok chhim, lêng,
Lêng cheng, ba̍k bêng,
Sim khò Iâ-so͘,
Boán-chiok ta̍k pō͘.

Móa koh-chài móa,
Kóng I thiàⁿ tōa,
Chhim koh-khah chhim,
Chhùi kóng, koa gîm,
Koân koh-khah koân,
Kî-biāu thiàⁿ thoân,
O-ló chheng-siōng,
I miā bû-chiong. -- Margraret E. Barber

“I kì-jiân bô sioh ka-kī ê Kiáⁿ, ūi-tio̍h lán chèng lâng hiàn I, kiám bô sòa chiong bān mi̍h pe̍h-pe̍h hō͘ lán mah?” (Lô-má 8:32)


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org