伊 the̍h chit 粒价值连城 ê 钻石,tī 顶面画一痕,用锤 á kā 伊 kòng 一下。Chit 粒钻石 tī 伊 ê 手中 pit 做两 pêng。真正是猴脚猴手 ah!真浪费 ah!Chiah-ni̍h 随便做,真不应该 ho͘h!
实际上 m̄ 是 án-ni,你 kiám 知,beh 将 hit 粒石 kòng 一下,是经过真 chōe 日,真 chōe 时 ê 研究 kap 规画 chiah án-ni 做。伊 ê 美质,伊 ê 瑕疵,伊 ê 可能 pit ê 所在,lóng 研究 kah 真详细,而且负责切切割 ê 人是世界 siōng-gâu ê 宝石师傅。
你想 kòng hit-ê 是错误 ê mah?M̄ 是,反 tńg 是 hit-ê 师傅本领 ê 表现。Kòng chit 下,显露出 siōng 完美 ê 形状,光亮、高贵 ê 状态。Kòng chit 下,ná 亲像会毁坏 hit 粒钻石,其实是 hō͘ 伊得 tio̍h 完美 ê 新生,变做两粒极 súi 无比 ê 宝石。Tùi 石矿所挖出来,外表粗粗,niau-niau ê 一粒,会变做两粒精美 ê 宝石,有经验 ê 大师傅 ê 眼光,chiah 看会出来。
有一日,你 beh 成做是装饰 tī 王冠 ê 宝石。你现在 tī 主 ê 手中,伊知 án 怎处理你。除了上帝 ê 大疼痛所许可,bōe hō͘ 任何「kòng 一下」落 tī 你忧伤 ê 灵顶面。你 thang 安心,tùi 你 ê 经历会 thang 看 tio̍h 言语所 bōe-tàng 表达 ê 祝福,心灵 bōe-tàng 想像 ê 富足。---J. H. M.
英国宗教小说家 George MacDonald ê 册有 án-ni 讲:「我奇怪上帝为甚么创造我!」另外一人回答讲:「可能你 iáu 看 bōe 出甚么目的,伊 iáu-bōe kā 你创造完成,你 m̄ 知 ê,是 hit-ê 过程。」
人若会相信 in iáu teh 创造过程中,将家己交托 hō͘ 创造者(就是上帝)去处理。伊照伊 ê 高超 ê 计划,亲像做磁 ê 师傅处理磁土一样。In 真紧就知,伊 ê 手,捏 koh 压,虽然会痛,lóng 是对 in 有利益,thang 接受。有时,in m̄-nā 应该相信,也应该注意上帝 ê 旨意:「beh chhōa 真 chōe kiáⁿ 儿进入荣耀 ê 内面。」(希伯来 2:10)