「主上帝,全能 ê ah,你 ê 所做大 koh 奇怪;历世代 ê 王 ah,你 ê 道路义 koh 真实。」(启示录 15:3)
下面是出名 ê 传道者 Charles H. Spurgeon ê 夫人(伊 ê 身体无好势有二十五年久)所做 ê 见证:
过了 lóng 无做甚么 ê 一工了后,我倒 tī 一块 phòng 椅歇困。虽然房间 ê 电火真光,总是外口 ê 乌暗进入我 ê 身体,soah 遮盖我 ê 心灵 ê 目睭。我极力 beh 去 khiú hit 双「有力 ê 手」,就是常常 ín-chhōa 我行路 ê 全能 ê 手,总是我 lóng 看 bōe-tio̍h。
我真悲伤来问讲,主为甚么 án-ni 对待伊 ê 一个 gín-ná!伊为甚么 hō͘ 我 tú-tio̍h chit 款 ê 艰难、痛苦?伊为甚么将 chit-ê 苦楚久长缠 tī 我身上,soah 一直无法度来侍候伊 ê「需要人料理 ê 奴仆」?
Chiah-ê 问题真紧就得 tio̍h 回答,是用真奇妙 ê 言语来回应,无需要人 ê 翻译,只要用我留心注意 ê 心灵 ê 言语就够额。Tī chit 段肃静 ê 时间,只有 hiâⁿ 火柴 teh to̍h 所发出 phit-phit-pha̍k-pha̍k ê 声。突然我听 tio̍h 一个温柔 ê 声音,清清楚楚 ê 音乐,亲像 tī 窗 á kha 有鸟 á teh 唱出美好 ê 歌调。
我大声问讲:「这是甚么声?」Tī chit-ê 寒冷 ê 暗时,绝对无可能有鸟 tī 外面唱歌。Hit-ê 温柔 ê 鸟 á 歌声又 koh 听 kah 清清楚楚,温柔 koh 神秘 hō͘ 我感觉真稀奇。然后我 ê 至好朋友 hoah 讲,这是壁炉内 ê hit 支柴所发出来 ê!炉火将留 tī 柴内,已经 khǹg-tī 柴内久久 ê 音乐放出来。
可能 chit 支柴,tī 伊美好 ê 时有听 tio̍h 鸟 á khiā-tī 伊 ê 顶面唱 chit 条歌,伊记起来,收起来,隐藏起来。总是以后伊老 lah,tēng lah,一年 koh 一年 ê 生瘤,soah 将 chit 条歌封起来,封 kah 密 chiuh-chiuh。直到火舌来烧 chit 支柴,烧 hō͘ 伊发出歌声,成做献上 ê 牲礼。Chit 时,我 chiah 明白,病痛 ê 火 hō͘ 咱 ê 内面放出 o-ló ê 歌声,hō͘ 咱 ê 心神真正得 tio̍h 洁净。咱 ê 父上帝得 tio̍h 荣耀。
有人 ná 亲像 chit 支柴,冷冷 tēng-tēng,无感情,lóng m̄-bat 唱出美好 ê 歌。是咱周围 ê 炎炎 ê 火 hō͘ 咱放出真神 ê 声调,hō͘ 咱快快乐乐来遵行伊 ê 旨意。想到 chia,壁炉 ê 火继续 teh 烧。Chit 种 ê 譬喻真奇妙,hō͘ 我 ê 灵甜蜜、sù-sī 好势。
「Tio̍h!tī 火中唱歌!」天父有时用这唯一 ê 方法,教咱死死、冷冷、硬硬 ê 心,出和谐 ê 歌声。所以,hō͘ 火炉「比平常加添七倍 ê 热」(但以理 3:19)