Thèng 候比行路 khah oh,因为 thèng 候需要耐心、吞忍。忍耐是难得有 ê 美德。上帝围篱笆来保护伊 ê 子民,tùi 保护 ê 角度看是好。
总是若是篱笆 ná 起 ná 高,到篱笆外 lóng 看 bōe-tio̍h,咱就 beh 怀疑,咱 ê 一生是 m̄ 是 lóng 限制 tī chit-ê 环境,kiám iáu 有机会离开 chit-ê 小范围 kap 服务。有时咱 bōe-thang 了解,为甚么无 khah 大 ê 范围来服务、事奉,为甚么 bōe-thang 离开 chit-ê 真 oh 活动起来 ê 所在。不过,上帝 ê iân-chhiân 有伊 ê 意思,「义人 ê 脚步是耶和华所安置。」 (诗篇37:23)。
George Mueller tī chit-ê 经文边 á 有注解写,「m̄-nā 是行 ê 脚步,也包含停 ê 脚步」。有人想 beh 冲破上帝 ê 篱笆,这是大大 ê 错误。主 hō͘ 基督徒 siōng 大 ê 准绳,就是无离开上帝所 kā 伊安顿 ê 所在,直到「云柱」 (出埃及记13:21)开始向前起行。――tùi「主日学时报」
咱若一旦学会晓一切 tāi-chì lóng thèng 候主 ê 引 chhōa,咱 beh 知,咱 ê 能力 beh tī 平行行做 tiong 达到最高点。咱 ê 中间真 chōe 人 lóng 欠缺想 ài 有 ê 力量,总是上帝召咱去做每一项 ê 工作, lóng beh 赐 hō͘ 咱有够额完全 ê 力量。保持信心 thèng 候伊 ê 引 chhōa 就是得力量 ê 秘诀。凡若无照伊 ê 道路行 ê,lóng 是浪费时间 kap 精神。留心 thèng 候伊 ê 引 chhōa。――Samuel Dickey Gorden
假使一个人受逼静静无采取任何 ê 行动,只 khiā tī 岸顶看性命 ê 大涌 chhiâng-chhiâng 滚,伊 ê 性命 kiám 讲是失败 ê mah?绝对 m̄ 是,因为胜利是 ài 靠 khiā 在,安静 thèng 候去得胜。Án-ni 做,可能比你以前无闲 chhih-chhih,phah 拚生活 khah oh 几千倍。Khiā 在,thèng 候,无灰心,无失望,顺 thàn 上帝旨意,将工作 ê 机会 kap 荣耀留 hō͘ 别人,tī 众人无闲快乐进行 ê 时,你本身 ōe-thang 保持安静,有自信 koh 快乐,是何等 ê 好 ah。
Siōng 伟大 ê 人生就是「到 lín 已经做成 lóng 总 ê 事,也犹原 khiā 在。」 (以弗所6:13) ――J. R. Miller