《赖永祥讲书》

 | | | 转寄

册房经理、质疑俗语字

作者 赖永祥 2005.08.21

赖永祥讲书 (004)

孙耀云是桥á头后卫庄ê人，1883年由黄月德引chhōa信主，tī 1886年由巴克礼牧师洗礼，仝hit年到册房做印刷工，服务33年久，hit中间有升做经理，koh做公报社主任。1896~1903年担任太平境教会执事，1903~1911年担任长老，退休了后转籍去东门教会。早时通称册房，就是今教会公报社ê前身，负责推销宗教书刊，及出版白话字教会报。

林锦生kap册房经理孙耀云有真好ê交情，伊讲孙先生，边幅不修，穿衫chhìn-chhái ，出入短衫布裤， 足拖木屐，从外表看，是粗夫俗子之类，其实并m̄是无一点á学问。伊平时喜爱读裨官小说， 收藏奇书古本，对俗语偏字ê收集研究，koh khah有奇特ê兴趣。一工伊问锦生讲：「你是甘牧师ê字典编修员，字典 tioh雅俗齐备。雅者正字音义，有康熙字典，有够依据，自然做起来khah简单；俗者俗语，散散参错，乱杂无据。虽然有「十五音」字汇，会当做参考；但mā有bē当hō͘人满意ê所在，beh按怎tō好?」伊koh继续问讲：「譬如馅(āⁿ)饼ê「馅」，水饺ê「饺」，恁ê字典甘有chia-ê字? koh譬如淘井ê「淘」，汰米ê「汰」，你m̄知bat无? 顶面四字虽然m̄是常用ê字，却是浅显ê俗语字。等锦生teh beh回答ê时，耀云接煞koh问讲：「Koh譬如俗语“Kāu soa-sap” ê “soa-sap”，其正字是啥物?」锦生头àⁿ-kē-kē ，一tia̍p-á-kú了后，才回答讲「琐屑」。耀云拍phok-á koh笑笑á讲：「人讲后生可畏，这句话无m̄-tio̍h!听你ê回答，会当知影你确实m̄是泛泛之流；甘字典实在是真幸哉！」 (甘字典说明 soa-sap 就是人办事有chē-chē tíⁿ-pòaⁿ ê 意思，「讲话 kāu soa-sap」是用例之一，但无写出「琐屑」二字)

甘为霖编ê《厦门音新字典》，有收正字、仝音异形字、俗字，mä有收所谓ê高级字(有字形但khha少实用)、罕用字、偏字kap怪字，个别占一chōa,列记读音kap解义。注音用罗马字，正字kap字首用大写；俗语音一律用小写。抬头单字先记字头大写ê罗马字读音，续落去是汉字，最后是字义解说。抬头俗语先列语音，续落去是记正字kap读音，用括号围起来，譬如：La̍k(六Lio̍k)，才koh再列解说。

正字ê音义以《康熙字典》为准，问题无chē;但俗语字是编者倚靠当时tī闽南kap台湾通用ê「十五音」ê字汇以外，无册好参考，无字典好根据，只有是道听途说。俗语所该属ê正字，有ê口传失真，真chē是有语无字。虽然不辞辛劳探访查问，往往为tio̍h斟酌一字半语，消磨真chë时间，犹koh be-tàng定案。

锦生得tio̍h耀云ê鼓励，甚至tī伊辞退编修工作了后，犹koh继续走寻(chhōe)探讨俗语字，总共得tio̍h参考书所无ê 53字，tī 1911年ê春天交hō͘甘为霖。(根据《七十年前ê回忆》)