《《一位台湾女信徒ê自述》》

 | | | 转寄

第一章 11）进入淡水女学院

作者 吴月娥, 台译：Lîm Chùn-io̍k 2020.05.31

当我tùi头围庄公学校毕业去读宜兰ê高等科ê时，头围基督教会来一个少年 cha-bó͘ gín-á，她教主日学，弹风琴，koh教全体会友唱圣诗；她是淡水女学院ê毕业生，名叫姚氏阿拿。阮阿妈真kah意阿拿老师，她认为「若是我ê cha-bó͘ 孙阿娥mā去淡水读册，她tio̍h ē-tàng弹奏风琴，教圣诗，而且成做主日学ê老师。」所以她徵求阮父母ê同意，kā我送入淡水女学院，m̄-koh，阮老父无同意；伊主张讲「Cha-bó͘ gín-á读宜兰高等科毕业to̍h有够额ā，咱田庄人无需要去读高等女学校。」M̄-koh，阮阿妈一屑á都无beh放弃，几nā pái去礁溪说服阮老父，致使伊终其尾同意à。Tùi礁溪到淡水，坐火车tio̍h四点半钟以上，所以当然tio̍h tòa宿舍，m̄-koh，ta̍k个月ê费用是20元。Chit笔钱hō͘ 阮chit-ê中产家庭带来沉重ê负担，佳哉因为有阿妈ê帮赞，我chiah ē-tàng穿淡水女学院ê制服。He是1936年ê春天。

淡水女学院ê校长是一位加拿大宣教会派来ê大约40岁ê妇人，是身材苗条ê金发女郎。我bē记得chit间学校ê创立日期，m̄-koh我认为是tī 1915年左右成立，因为头一届ê毕业生比我khah大十七、八岁（译注：1884年，加拿大长老教会传教士马偕创立淡水女学堂，he是台湾第一间女学校；1901年，该学堂因马偕别世一度停办；1907年再度复校，改名「淡水女学校」；1915年，增设高等女子部，改名为「淡水高等女学校」；1922年，又改名为「私立淡水女学院」，to̍h是月娥ê学校；1945年后bat kah淡水中学合并，成做淡水中学女子部，后来koh分离，改称作「私立纯德女子中学」，1956年kah淡江中学合并）。基督教tī 1865年传来到台湾南部，1972年传来到北部。当时是一位加拿大ê宣教师，名叫马偕博士，伊家己一个人来到台湾，tùi淡水chiūⁿ陆，tùi hia开始传教。伊聚集少年人，建立中学校来培训传道师，而且建立「偕医馆」（后来台北市ê马偕病院是teh记念马偕），为台湾人做出重大ê贡献。另外，伊koh tī中学校附近设立女学堂，来自台湾各地，无法度进入公立学校ê人，以及牧师kah传教者ê子女lóng聚集óa来。因为chit间学校是以传福音做目的ê学校，所以圣经课程mā是常规课程ê一部分，m̄-koh一般人并m̄知这是一间以宗教为目的ê学校。看tio̍h无法度进入公立学校ê gín-á ē-tàng轻松进入chit间学校，致使有人讲chit间学校ê学生lóng是无优秀ê gín-á。

台湾前总统李豋辉mā是淡水中学ê毕业生。最近有一个tī台湾小学教20 gōa年久ê老师问我：「李总统是淡水中学出身ê，伊ná有法度进入台大？」伊kah-ná感觉不可思议，chiah ē án-ne问，m̄-koh，一个gín-á ê环境kah伊未来ê表现，人是无法度知影ê。Tio̍h算tī田庄学校得tio̍h siōng好ê成绩，若是来到城市，伊mā ē lak到中kē级。田庄学校ê竞争m̄是真激烈，mā无gín-á升入去中学校，父母tī教育方面mā无gōa积极。

结婚后ê 15年内，我去头城从事医疗工作，我ê gín-á去读头城国民学校。In lóng得tio̍h siōng好ê成绩，m̄-koh，将来若beh进入一流ê中学、大学，tio̍h考虑需要kā in转入去台北市ê国民学校。所以，tī in小学三年、四年ê时，我to̍h kā in转去读台北ê学校，后来，in tī台北受tio̍h升学考试ê致荫，三人lóng ē-tàng进入一流ê中学kah大学。

淡水是一个风景真súi ê所在；淡水河ê对面to̍h是观音山，淡水市街一直伸展到它ê山kha；淡水ê海岸线有台湾唯一ê山球（golf）场，mā有我ê母校tī hia，包括它ê中学校kah神学院。淡水女学院是一栋两层楼ê英国式红砖建筑，有绿色ê草坪kah花坛；学校传出ê钢琴声kah合唱团ê歌声，不时teh安慰沿街路经过ê人ê心灵。

我来到淡水女学院ê目的之一是学钢琴，因为án-ne，我随时去上钢琴课。这是一项课外ê私人课程，tio̍h额外支付一学期ê学费；我ê钢琴教授是来自加拿大ê泰勒老师，当时tī台湾无人ē赢过她；她是西方音乐启蒙者ê名声，传遍全台湾。

Ta̍k礼拜阮kan-taⁿ有一pái钢琴课，了后ta̍k工lóng tio̍h ka-kī练习。学校有五间小琴房，内底有钢琴，歇困ê时ē-tàng免费使用。Tùi一年级到四年级，学习钢琴ê人数ē-sái讲是bē少，所以下课ê钟声一响，chhìn-chhìn-chhái-chhái kā老师行礼了后，ta̍k人to̍h紧chông去琴房。

Tī厝里放暑假了后koh tńg去学校，我看tio̍h：「陈仁爱老师beh去读东京青山学院音乐系，钢琴学习停止」ê告示，感觉真失望。陈仁爱老师是牧师ê cha-bó͘ kiáⁿ，淡水女学院毕业。结局，这是kan-taⁿ维持一学期ê简短课程。

Tùi 1936年第二学期开始，我注意tio̍h学校ê气氛kah-ná真奇怪；Argo校长kah安藤教务长tńg去in ê母国chìn前，并无对学生讲再会。当学生tī不安中结束第二学期ê时，in发见日本政府开始驱逐外国人，而且接收学校。In mā注意tio̍h学校被改做普通学校，无koh再是一间宣教学校，而且tī hit年年底，有坂一世校长kah真chē日本人教师陆续被差派来学校。学生m̄知影目前为止，原本ê老师已经去tó位，kan-taⁿ知影以下ê老师是来自日本：有坂一世老师（淡水中学、淡水女学院ê校长），堤老师（教务长、教历史kah地理），田中心一老师（国文），田村老师（数学），岩崎老师（英语），冈村初子老师（体育），渡边老师（裁缝），大土井老师（家事），佐藤老师（音乐），齐藤老师（物理kah化学）。

中村敬辉老师教美术；伊是台湾人，名叫陈敬辉，伊ê bó͘ 是日本人。伊以前to̍h tī chit间学校教课，改日本名了后，chiah ē-tàng继续留tī chia教册。